Na STB zapeŭnili, źmieny ŭ Padatkovy kodeks, jakija rychtujucca, dazvolać pradprymalnikam «vyrastać sa štonikaŭ». I paspryjajuć sacyjalnaj spraviadlivaści, kab nie było takoha, što «kamuści supčyk redki, a kamuści žemčuh drobny».
Navošta padatak na bahaćcie
Adnym z novaŭviadzieńniaŭ u Padatkovym kodeksie stanie padatak na bahaćcie. Razmova idzie ab vykarystańni prahresiŭnaj škały padatkaabkładańnia pry dachodzie zvyš 200 tysiač rubloŭ. Dla biełarusaŭ z takim dachodam płanujuć padniać staŭku padachodnaha padatku z 13 da 25%. A dla IP, čyj dachod pieravysić 500 tysiač rubloŭ, chočuć padniać padatak da 30%.
U tok-šou «Pa sutnaści» na STB patłumačyli, čamu vyrašyli ŭvieści takija padatki.
«Čamu ciapier u Biełarusi ŭźnikła nieabchodnaść źviarnucca da takoj miery? U nas rezka źjaviłasia vielmi šmat zamožnych ludziej? Apanienty ŭłady havorać, što takim čynam dziaržava choča zarabić hrošaj, kab karmić siłavikoŭ i biudžetnikaŭ ź inšych śfier», — zadaje pytańnie viadučaja Alena Syrova.
Pa słovach ekanamista Alaksandra Kazłova, prahresiŭnaja škała, pad jakoj ciapier razumiejuć «padatak na bahaćcie», raniej užo isnavała ŭ padatkovaj praktycy Biełarusi. Byli padatki i pa 20, i pa 25 pracentaŭ.
Kazłoŭ ličyć, što, z adnaho boku, uviadzieńnie prahresiŭnaj škały dazvolić pavialičyć padatkovyja pastupleńni i niejkim čynam vyrašyć prablemu niedachopu hrošaj u biudžecie. Z druhoha — heta moža być źviazana z sacyjalnaj spraviadlivaściu: «Jość takoje vykazvańnie: «Kamuści supčyk redki, a kamuści žemčuh drobny».
Ekanamist padkreśliŭ, što jon asabista nie bačyć nijakaj hłabalnaj prablemy z uviadzieńniem hetaha padatku ŭ Biełarusi. Padobny padatak isnuje i ŭ inšych krainach.
«Tak, spačatku niejkaje šarachańnie budzie. Ale potym usio narmalizujecca», — ličyć jon.
Novy padatak moža zakranuć kala 9 tysiač čałaviek.
Pa mierkavańni dyrektara Biznes-sajuza pradprymalnikaŭ i najmalnikaŭ imia prafiesara Kuniaŭskaha Žanny Tarasievič, pradprymalniki novaha padatku nie spužajucca. Jana ŭdakładniła, što hadavy dachod u 200 tysiač datyčyć nie tolki pradprymalnikaŭ, a luboha hramadzianina:
«Heta mohuć być i najomnyja rabotniki. Naprykład, mieniedžar, jaki pracuje dyrektaram na pradpryjemstvie, ci doktar, pasłuhi jakoha dobra apłačvajucca».
«Jak tolki źjaviŭsia ŭ Padatkovym kodeksie padatak na bahaćcie, na bahatyja aŭtamabili i hetak dalej, u biznesu paŭstaŭ popyt na zakon, jaki my niadaŭna krytykavali, ab źmienie ŭ zakanadaŭstvie pa pytańniach pradprymalnictva, — dadała Tarasievič. — Tamu što dla luboha subjekta jość mahčymaść i prava vybaru. Ja mahu być nie indyvidualnym pradprymalnikam, nie płacić vysokija padatki pa 25%. <…>
U prajekcie zakona praduhledžany biasšvovy pierachod — heta raz. I pa-druhoje, tam ža praduhledžana, što subjekty haspadarańnia ŭžo nie da 15, a da 50 čałaviek, jakija stanuć jurydyčnymi asobami, zmohuć karystacca tymi lhotami albo sproščanymi režymami, jakimi možna było karystacca da ciapierašniaha času. A heta daje mahčymaść jakraz «vyrastać sa štonikaŭ».
Kolki ŭ Biełarusi indyvidualnych pradprymalnikaŭ
Žanna Tarasievič nazvała ličbu pradprymalnikaŭ u krainie:
«Kali brać usich indyvidualnych pradprymalnikaŭ, to heta dzieści kala 263 tysiač dziejučych. Heta nie šmat. Ale ź inšaha boku, my pavinny razumieć: kali my biarom handlara, to heta ludzi 50+. Jany buduć pracavać jašče 5-10 hadoŭ.
Dalej užo pryjšoŭ internet-handal, roźničnyja handlovyja sietki i hetak dalej. Tamu hetym ludziam pierastroicca i pajści ŭ vytvorčaść dastatkova składana. Jany ŭ asnoŭnym u rehijonach».
U toj ža čas Tarasievič adznačaje, što takim ludziam treba «prosta dapamahčy pierajści ŭ cyvilizavany razrad, naprykład, pryvatnaha ŭnitarnaha pradpryjemstva, kali ŭ nas mianiajucca ŭmovy».
Kirył Kazakoŭ dadaŭ, što ŭ Biełarusi indyvidualnymi pradprymalnikami byli «dziela taho, kab płacić raz na hod zusim krychu».
Doktar ekanamičnych navuk Iryna Novikava zapiarečyła:
«Moža, heta było i dobra. Bo jany samazaniatyja. Jany sami sabie davali rabotu, nie patrabavali dapamohi pa biespracoŭi. Jany nie siadzieli doma, zarablali, kab prakarmić siabie i svaju siamju. Heta ž taksama moža być metaj dziaržavy».
Čytajcie jašče:
Bahatyja taksama płačuć. U Biełarusi chočuć uvieści padatak na zvyšprybytki i darahija aŭto
Kolkaść IP skaračajecca. Jak heta ŭpłyvaje na sabranyja padatki i čamu tendencyja praciahniecca
Ciapier čytajuć
Aryštavany viadomy nieŭrołah Rusłan Badamšyn. Jon byŭ na chatniaj chimii12
Kamientary