«Šeść tysiač za leki i punkcyju płacili nie vy, a dziaržava». Biełaruski, jakija robiać biaspłatnaje EKA, sutyknulisia z prablemaj

Z 2021 hoda ŭ biełaruskich žančyn jość mahčymaść zrabić adno EKA za košt dziaržsrodkaŭ. Zhodna z aficyjnaj statystykaj, sa studzienia pa kastryčnik 2023 hoda ŭ Biełarusi było vykanana 1006 cykłaŭ ekstrakarparalnaha apładnieńnia, ź jakich 410 paśpiachova zaviaršylisia ciažarnaściu.

Na ŭsiu krainu tolki try ŭstanovy achovy zdaroŭja, kudy možna źviarnucca pa biaspłatnuju sprobu EKA (dźvie ź ich znachodziacca ŭ stalicy i adna ŭ Homieli). Heta Homielski abłasny dyjahnastyčny miedyka-hienietyčny centr z kansultacyjaj «Šlub i siamja», haradski kliničny radzilny dom №2 horada Minska, a taksama respublikanski navukova-praktyčny centr «Maci i dzicia».

Častka žančyn paśla niaŭdałaj pieršaj sproby ŭ dziaržaŭnaj klinicy idzie ŭ pryvatnuju pa lepšy servis. I zabrać embryjony ŭ vypadku źmieny ŭstanovy achovy zdaroŭja vielmi łahičnaje rašeńnie: nie treba budzie znoŭ prachodzić stymulacyju i punkcyju — a heta značyć i apłačvać usio heta. Ale dla taho ž radzilnaha doma heta strata hrošaj, jakija možna było b zarabić, pravioŭšy druhuju i nastupnyja sproby EKA ŭžo za hrošy samoj siamji.

Hetaj vosieńniu ŭ minskaj haradskoj radzilni № 2 vyrašyli zmahacca z tym, što patencyjalnyja klijentki sychodziać, i stali patrabavać padpisać dadatkovuju damovu, dzie jość punkt «My zhodny z tym, što zamarožanyja embryjony buduć vykarystoŭvacca dla nastupnych pieranosaŭ tolki va UAZ «HKRD № 2» i nie padlahajuć transparciroŭcy ŭ inšyja arhanizacyi» (heta tyčycca tolki tych, chto prychodzić mienavita pa biaspłatnuju sprobu EKA, astatnich na słovach sprabujuć uhavaryć).

Pavialičyć

Žančyny miarkujuć, što źviazana heta i z tym faktam, što ŭ žniŭni dźvie doktarki, jakija pravodzili EKA, syšli pracavać u pryvatnuju kliniku — častka klijentak vyrašyli, što chočuć praciahvać pracavać ź imi i zamovili transparciroŭku svaich embryjonaŭ u tuju samuju kliniku.

Jak piša adna z žančyn, joj rastłumačyli novaŭviadzieńnie, jakoje pieraškadžaje rasparadžacca svaimi embryjonami, tak:

«Šeść tysiač za leki i punkcyju płacili nie vy, a dziaržava».

Šmat u kaho navina vyklikała abureńnie — bo embryjony atrymany ź bijałahičnaha materyjału žonki i muža, čamu tady niechta inšy vyrašaje, što ź imi pavinna adbyvacca? Da taho ž, zamarozku i zachoŭvańnie embryjonaŭ siamja taksama apłačvaje samastojna. Naprykład, kab zrabić kryjakansiervacyju 1-2 embryjonaŭ na paŭhoda, treba addać kala 275 rubloŭ.

U supołcy budučych mam sumna žartujuć, što nastupnym krokam budzie toje, što ŭ vajennym bilecie chłopcam pačnuć adznaku rabić, što dziaržava apłaciła EKA. «I budzie chłopčyk słužyć nie 18 miesiacaŭ, a 36. Adpracoŭka!». 

Niechta miarkuje, što ŭ chutkim časie dziaržava pačnie prapanoŭvać param vykuplać svaje ž embryjony, kab kampiensavać vydatki na biaspłatnaje EKA.

Ale jość i tyja, chto znachodzić situacyju całkam narmalnaj:

«Za atrymańnie embryjonaŭ płaciła dziaržava, a potym vy prosta ich pieravozicie i ŭsio. Atrymlivajecca dla 2-j radzilni nijakaha zarobku, adny straty».

Čytačka «Našaj Nivy» źviarnułasia ŭ radzilniu № 2 i spytała, ci sapraŭdy nielha budzie transpartavać embryjony ŭ inšuju kliniku, kali zrobiš pieršuju biaspłatnuju sprobu EKA ŭ ich.

Adkaz byŭ łakaničny:

«Embryjony nie buduć padlahać transparciroŭcy».

 Čytajcie taksama:

«Ja pavinna rabić heta biaspłatna? Nie, adnaznačna». Surahatnaja maci pra žyćcio, chejt i stereatypy

Vyrab jajcakletak sa zvyčajnych kletak cieła moža całkam źmianić naša ŭjaŭleńnie pra baćkoŭstva

«Praz tryvožnaść nabrała 30 kiłahramaŭ». Čamu niekatoryja žančyny panična bajacca naradžać i što z hetym rabić

• 7
• 0
• 0
• 8
• 1
• 5
• 22
• 0