Telehram-kanał žonak mabilizavanych atrymaŭ płašku Fake paśla ataki prapahandysta Sałaŭjova i praŭładnaha sumnaviadomaha jurysta
Miesiendžar Telegram paznačyŭ płaškaj Fake kanał «Puť domoj» i rehijanalnyja čaty žonak mabilizavanych, jakija sprabujuć arhanizoŭvać u Rasii mitynhi za demabilizacyju mužoŭ. Praŭładny juryst Illa Ramiasło patłumačyŭ heta svaimi skarhami. Jon taksama źviazaŭ prajekt z eks-supracoŭnicaj štaba Navalnaha Tašaj Pieciarymavaj, piša «Ahienctva».
Płaška Fake uviečary ŭ čaćvier źjaviłasia ŭ kanała «Puť domoj» (amal 27 tysiač padpisčykaŭ), a taksama ŭ čataŭ kanała pa Krymie, Saratavie, Jarasłaŭli, Rastovie-na-Donie, Kalininhradzie, Novasibirsku i Omsku. U apisańni kanała i čataŭ taksama źjaviłasia paznaka «Uvaha: mnohija skardzilisia, što hety akaŭnt vydaje siabie za aficyjny».
Kanał adreahavaŭ na hetuju padzieju dopisam: «Budziem rasceńvać jak znak jakaści. Raźbirajemsia z techpadtrymkaj. My ŭsio roŭna idziom napierad i nie zdamosia! U kamientary «Ahienctvu» administratary kanała paćvierdzili, što pryčynaj źjaŭleńnia płaški stali masavyja skarhi. Toje, što adbyłosia, jany nazvali skaardynavanym napadam.
«Dumajem, vidavočna heta ataka Sałaŭjova i kampanii», — patłumačyli aŭtary.
Telehram-kanał Sałaŭjova 16 listapada apublikavaŭ śpis antyvajennych resursaŭ, jakija stvaryli ŭ Rasii zamiežnyja śpiecsłužby dla publikacyi niehatyŭnych navin. Siarod ich byŭ i «Puť domoj».
U toj ža čas juryst Illa Remiasło ŭ siabie ŭ kanale paviedamiŭ, što płaška źjaviłasia pa jaho skarzie na kradziež čužoj nazvy.
29 listapada jon pisaŭ, što ŭ telehramie jość dva kanały z nazvaj «Puť domoj» i što jon padaŭ ad pieršaha kanała skarhu na druhi. Pavodle jaho słoŭ, pieršy viadzie «vydatnaja vałanciorskaja, patryjatyčna-nastrojenaja, aficyjna zarehistravanaja arhanizacyja «Centr sadziejničańnia dobraachvotnamu pierasialeńniu «Puť domoj», jakaja dapamahaje rasijanam u «niedružalubnych krainach» i pra jakuju pišuć Maryja Bucina, Uładzimir Sałaŭjoŭ i inšyja.
Illa Remiasło viadomy svaimi rehularnymi infarmacyjnymi atakami na Alaksieja Navalnaha i jaho paplečnikaŭ.
Samaja hučnaja ź ich zdaryłasia padčas sproby palityka bałatavacca ŭ prezidenty ŭ 2018 hodzie: Remiasło na sajcie NavalnyLeaks abvinavaciŭ Navalnaha ŭ kradziažach i pieramovach z zachodnimi strukturami suprać Rasii. The Insider u 2019 hodzie apublikavaŭ pierapisku palittechnołaha, eks-kiraŭnika ŭpraŭleńnia administracyi prezidenta pa ŭnutranaj palityki Kanstancina Kościna, dziakujučy jakoj vyśvietliłasia, što jon udzielničaŭ u padrychtoŭcy prajekta NavalnyLeaks.
Pra kanał «Puť domoj» Remiasło pačaŭ pisać z 28 listapada. Jon źviazaŭ jaho z zamiežnymi śpiecsłužbami, jakija vykarystoŭvajuć svajakoŭ mabilizavanych, adnoj z aŭtarak kanała jon nazvaŭ eks-supracoŭnicu štaba Navalnaha Tašu Pieciarymavu.
Śledam za Remiasłom ab tym ža napisali prakramloŭskaje vydańnie Readovka i prarasiejski vajskovy błohier Siamion Piehaŭ (WarGonzo).
Pieciarymava ŭ hutarcy z «Ahienctvam» abvierhła jakuju-niebudź suviaź z kanałam «Šlach dadomu». «Ja dumaju, što ŭładzie treba było dyskredytavać niejkim čynam hety kanał i, vidać, patrebnaja była niejkaja asoba, źviazanaja z Alaksiejem Navalnym i z apazicyjaj. Paniaćcia nie maju, čamu nazvali mienavita mianie. Mahčyma, tamu što ja šmat pišu ŭ Twitter ab prablemach mabilizavanych», — vykazała zdahadku jana.
Kanał «Puť domoj» i adnajmiennyja rehijanalnyja čaty vosieńniu 2023 hoda pačali sproby arhanizavać mitynhi za demabilizacyju pryzvanych hod tamu rasijan. Ułady admovilisia uzhadniać im akcyi. Naprykład, u Maskvie padstavaj dla admovy staŭ kavid.
U paniadziełak, 27 listapada, kanał apublikavaŭ zvarot da rasijanaŭ. U im žonki mabilizavanych zajavili, što dziaržava adviarnułasia ad mabilizavanych i ich žonak — «tych, chto pieršy adhuknuŭsia na jaho klič ab dapamozie».
Taksama žančyny vykazali spadziavańnie, što Pucin pačuje ich, i paabiacali adstupić tolki paśla taho, jak mužyki viernucca dadomu.
Ciapier čytajuć
ZŠA pieradali Łukašenku najnoŭšyja amierykanskija leki dla pachudańnia14
Kamientary