Pamior Haston Hłok — stvaralnik znakamitaha pistaleta, jaki staŭ viadomym dziakujučy mas-kultury

Vynajdzieny im pistalet «Hłok» byŭ nie tolki pryniaty na ŭzbrajeńnie aŭstryjskaj armii, ale i staŭ papularnym u śpiecsłužbaŭ, amataraŭ strałkovaj zbroi i, na žal, złačyncaŭ u mnohich krainach śvietu, piša Bi-bi-si.

Hety pistalet uvajšoŭ u amierykanski ŭžytak nastolki hłyboka, što ŭ amierykanskaj anhlijskaj navat źjavilisia novyja vyrazy — glocked (jaki nosić «Hłok») i glocked up (zacykleny na hetaj zbroi).

Niahledziačy na suśvietnuju viadomaść svajho ahniastrelnaha stvareńnia, sam Haston Hłok byŭ samotnym, bolšuju častku času baviŭ u svaim aŭstryjskim majontku na bierazie voziera, i imia jaho redka zhadvałasia ŭ navinach.

Vyklučeńniem była, mabyć, viestka ab zamachu na miljardera, kali ŭ kancy 1990-ch biznes-partnior, kab schavać bujnyja kradziažy ŭ kampanii, vyrašyŭ pazbavicca ad jaho. Najomny zabojca siem razoŭ udaryŭ Hłoka pa hałavie humavym małatkom, adnak 70-hadovy vynachodnik daŭ adpor i zmoh paralizavać napadnika.

Hłok naradziŭsia ŭ 1929 hodzie, vyvučaŭ miechaniku ŭ Vienie, a ŭ 1963 hodzie zasnavaŭ nievialiki biznes u miastečku Dojč-Vahram pad Vienaj.

Jon pačaŭ z vytvorčaści karnizaŭ dla štor, a paźniej zaklučyŭ kantrakt na pastaŭku nažoŭ i sapiornych łapatak dla aŭstryjskaj armii. Kanstrujavańniem ahniastrelnaj zbroi Hłok zaniaŭsia tolki ŭ pačatku 1980-ch, kali aŭstryjskaja armija abviaściła tendar na zamienu pistaletaŭ.

Za hod kalektyŭ pa jaho kiraŭnictvam stvaryŭ i zapatentavaŭ lohki i nadziejny paŭaŭtamatyčny pistalet «Hłok-17» pad 9-mm patron.

Hety pistalet (i jaho madyfikacyi, niaznačna adroznyja ad bazavaj madeli) składajecca z 33 detalaŭ, raźbirajecca mienš čym za chvilinu, vytrymlivaje tempieraturu ad -40 da +200°C i da 300 tysiač strełaŭ.

Nie dziŭna, što jon byŭ pryniaty na ŭzbrajeńnie ŭ bolš čym 30 krainach.

Pistalet taksama tryvała ŭvajšoŭ u amierykanskuju pop-kulturu, fihurujučy ŭ halivudskich błokbastarach, milhajučy ŭ rukach u znakamitych hierojaŭ i zładziejaŭ u «Matrycy» i «Terminatary».

U adras Hastona Hłoka nie raz hučała i krytyka, praŭda, nie z boku strałkoŭ: prychilniki žorstkaha kantrolu nad ahniastrelnaj zbrojaj abvinavačvali vynachodnika ŭ papularyzacyi zbroi ź vialikim mahizinam, jaki lohka schavać.

Mabyć, samaj hučnaj spravaj, u jakoj byŭ užyty «Hłok», stała zabojstva ŭ kalifarnijskim bary 12 čałaviek, u tym liku palicejskaha, u 2018 hodzie. U vieterana-marpiecha Devida Łonha, jaki pakutavaŭ, jak vyśvietliłasia, ad psichičnaha razładu, byŭ aficyjna zarehistravany paŭaŭtamatyčny «Hłok», ale z pavialičanaj abojmaj, što ŭ Kalifornii ličycca niezakonnym.

Sam Hłok redka adkazvaŭ krytykam i admoviŭsia dałučycca da inšych vytvorcaŭ zbroi, jakija padpisali dobraachvotnuju ŭhodu z amierykanskim uradam ab kantroli nad zbrojaj u 2000 hodzie.

U 2009 hodzie Łukašenka raskazvaŭ, što ŭ jaho atačeńnia jość «Hłok».

• 0
• 0
• 0
• 0
• 1
• 0
• 0
• 0