Na prezidenckich vybarach u Tajvani pieramoh niepažadany dla Kitaja kandydat
Kandydat ad kiroŭnaj Demakratyčnaj prahresiŭnaj partyi dziejny vice-prezident Łaj Cynde atrymaŭ kala 41% hałasoŭ vybarščykaŭ.
Takija danyja pryvodzić CVK krainy paśla apracoŭki 80% biuleteniaŭ.
Kandydat ad Hamińdana Chou Jui, asnoŭny supiernik Cynde, nabraŭ kala 33% hałasoŭ i ŭžo pryznaŭ svajo paražeńnie, paviedamlaje vydańnie Focus Taiwan. Za treciaha kandydata, kiraŭnika Tajvanskaj narodnaj partyi Ke Veńčže, addali svaje hałasy kala 26% vybarščykaŭ.
Paśla pieramohi Łaj zajaviŭ ab rašučaści «abaranić Tajvań ad pahroz i zapałochvańnia z boku Kitaja», padkreśliŭšy pry hetym hatoŭnaść da pieramovaŭ ź Piekinam «na asnovie hodnaści i parytetu».
«Jak na prezidencie, na mnie lažyć vialikaja adkaznaść za padtrymańnie miru i stabilnaści ŭ Tajvanskim pralivie», — zaŭvažyŭ palityk pierad svaimi prychilnikami ŭ Tajbei.
Kitajskija ŭłady nazyvajuć jaho «zavadataram patencyjna niebiaśpiečnaj vajny ŭ Tajvanskim pralivie».
Raniej Łaj Cynde ŭ vypadku svajoj pieramohi zajaŭlaŭ pra namier skaracić ekanamičnuju zaležnaść ad Piekina i praciahnuć umacoŭvać adnosiny z ZŠA.
Za vybarami na Tajvani naziraje ŭvieś śviet, bo Piekin pahražaje vostravu vajnoj u vypadku, kali pa ich vynikach tajvancy zachočuć abviaścić ab farmalnaj niezaležnaści ad Kitaja.
Padčas pieradvybarnaj kampanii Łaj usio ž adznačyŭ, što płanuje zachavać status-kvo ŭ adnosinach z Kitajem: nie stanie farmalna abviaščać niezaležnaść Tajvania, ale budzie kateharyčna adchilać lubyja damahańni Piekina na kantrol nad vostravam.
Napiaredadni vybaraŭ kitajskija ŭzbrojenyja siły značna pavysili aktyŭnaść vakoł Tajvania.
Tajvanskaje Ministerstva abarony zajaŭlaje, što ŭ pavietry vakoł vostrava kursirujuć vosiem kitajskich vajskovych samalotaŭ, adzin ź jakich parušyŭ pavietranuju prastoru z paŭdniova-zachodniaha boku a šostaj ranicy pavodle miascovaha času — niezadoŭha da adkryćcia vybarčych učastkaŭ.
Taksama ŭ subotniaj zajavie Minabarony Tajvania havorycca, što šeść kitajskich vajskovych karabloŭ uziali vostraŭ u koła.
«Uzbrojenyja siły [Tajvania] sočać za situacyjaj. Bajavym pavietranym patrulam, karablam VMF i naziemnym rakietnym sistemam daručana reahavać na varožyja dziejańni ŭ vypadku nieabchodnaści», — zajaviła vajennaje viedamstva Tajvania.
Raniej ZŠA nie raz zajaŭlali, što ŭmiašajucca ŭ situacyju ŭ rehijonie ŭ vypadku vajennaj ahresii z boku Piekina.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie6
Kamientary