«Ikona moraŭ». Samy vialiki ŭ śviecie łajnier adpraviŭsia ŭ pieršy kruiz. Jak jon vyhladaje
U spusku na vadu braŭ udzieł Lijaniel Miesi.
Samy vialiki kruizny łajnier u śviecie Icon of the Seas («Ikona moraŭ») adpraviŭsia ŭ pieršaje siamidzionnaje płavańnie pa vyspach Karybskaha mora z porta Majami ŭ Fłarydzie, paviedamlaje Bi-bi-si
Daŭžynia karabla źjaŭlajecca rekordnaj i składaje 365 m. Dla paraŭnańnia, lehiendarny «Tytanik» byŭ amal na 100 mietraŭ karaciejšy (269 m), a daŭžynia najbujniejšaha avijanosca VMF ZŠA Gerald R. Ford — 333 mietry.
U cyrymonii spusku sudna na vadu ŭziaŭ udzieł kapitan zbornaj Arhienciny pa futbole Lijanel Miesi. Zaraz jon hulaje za kłub «Inter Majami».
Łajnier moža źmiaścić da 7600 pasažyraŭ, jakija buduć spać, jeści i zabaŭlacca na 20 pałubach z bolš čym 40 restaranami, kafe i barami. Tam taksama jość nievialiki park z trapičnaj raślinnaściu, teatr, karaokie, spartyŭnyja placoŭki dla hulni ŭ tenis i valejboł, atrakcyjony dla dziaciej i akvapark.
Sudna zarehistravana na Bahamskich vyspach i było pabudavana ŭ Finlandyi za 2 miljardy dalaraŭ.
Ruchaviki pracujuć na zvadkavanym pryrodnym hazie (ZPH).
Ekołahi raskrytykavali hety vid paliva, zajaviŭšy, što jaho vykarystańnie pryvodzić da vykidu ŭ atmaśfieru mietanu. Z adnaho boku, ZPH zharaje bolš čysta, čym tradycyjnaje sudnavaje paliva, jakim źjaŭlajecca, naprykład, mazut, ale sučasny ZPH na 85-95% składajecca ź mietanu.
Tamu pry ŭžyvańni ZSPH pavialičvajecca vierahodnaść uciečak mietanu ŭ atmaśfieru, a mietan źjaŭlajecca bolš niebiaśpiečnym parnikovym hazam, čym vuhlakisły haz.
Za 20-hadovy pieryjad mietan utrymlivaje ŭ 80 razoŭ bolš ciapła, čym vuhlakisły haz, tamu radykalnaje skaračeńnie mienavita padobnych vykidaŭ źjaŭlajecca žyćciova važnaj zadačaj u ramkach baraćby sa źmianieńniem klimatu.
«Heta — niapravilny krok, — zajaviŭ ahienctvu Reuters Brajan Komier, dyrektar marskoj prahramy Mižnarodnaha savieta pa čystym transparcie (ICCT). — Pavodle našych acenak, vykarystańnie ZPH u jakaści sudnavaha paliva pryviadzie da taho, što za čas ekspłuatacyi karabla ŭ atmaśfieru patrapić na 120% parnikovych hazaŭ bolš, čym kali b jon išoŭ na zvyčajnym sudnavym hazojli».
Raniej na hetym tydni ICCT apublikavaŭ spravazdaču, u jakim śćviardžajecca, što vykidy mietanu ad sudoŭ, jakija pracujuć na ZPH, vyšej, čym naležyć u adpaviednaści ź dziejučymi praviłami.
Adnak haspadary sudna, kampanija Royal Caribbean, śćviardžaje, što Icon of the Seas na 24% bolš enierhaefiektyŭny, čym taho patrabujuć praviły dla sučasnaha marskoha transpartu. Kampanija taksama płanuje pradstavić karabiel z nulavym uzroŭniem vykidaŭ da 2035 hoda.
Pa dadzienych Mižnarodnaj asacyjacyi kruiznych linij, kruiznaja industryja źjaŭlajecca adnym z najbolš chutkarosłych siektaraŭ turyzmu, pryčym, hałoŭnym čynam, jon pryciahvaje moładź. U 2021 hodzie ŭkład hetaha siektara turystyčnaha biznesu ŭ suśvietnuju ekanomiku skłaŭ 75 młrd dalaraŭ ZŠA.
Pry hetym z 54 kruiznych łajnieraŭ, jakija turfirmy buduć vykarystoŭvać sa studzienia 2024 hoda pa śniežań 2028, 63% pracujuć na ZPH. Zaraz na ZPH pracujuć tolki kala 6%.
***
Icon of the Seas — najbujniejšy kruizny łajnier u śviecie vahoj 250 800 ton i daŭžynioj amal 365 mietraŭ.
Budaŭnictva i nabyćcio samoha karabla abyšłosia Royal Caribbean International amal u 2 młrd dalaraŭ ZŠA (1,65 młrd jeŭra).
Pa danych sajta Royal Caribbean, košt kvitkoŭ varjirujecca ad 1723 da 2639 dalaraŭ ZŠA na čałavieka. Adnak u papularnaje Kaladnaje płavańnie košt vyraście da 5124 dalary ZŠA na čałavieka.
Prypynki pieršaha rejsa: Sent-Kits i Nevis i stalica Amierykanskich Virhinskich vyspaŭ: Šarłota-Amalija.
-
Iran atakavaŭ francuzskuju vajennuju bazu ŭ Abu-Dabi — adna z rakiet upała za niekalki mietraŭ ad kruiznaha łajniera z turystami
-
Nijakaha pałomnictva nieanacystaŭ: dom, dzie naradziŭsia Hitler, pieratvorać u palicejski ŭčastak i centr pravoŭ čałavieka
-
Zahinuŭ były prezident Irana Machmud Achmadziniežad
Kamientary