Unučka Šuškieviča raskazała, jak stała pamočnicaj Cichanoŭskaj
Užo niekalki miesiacaŭ Stanisłava Hlińnik pracuje asabistaj pamočnicaj Śviatłany Cichanoŭskaj. «Lusterka» pahavaryła ź dziaŭčynaj pra toje, čym jana zajmajecca na hetaj pasadzie.
29-hadovaja Stanisłava Hlińnik da niadaŭniaha času była supracoŭnicaj Sakrataryjata Kaardynacyjnaj rady. Z kanca 2023 hoda jana asabistaja pamočnica Śviatłany Cichanoŭskaj.
«Ja zajmajusia kamunikacyjaj ź ludźmi, ź jakimi jana sustrakajecca. Dapamahaju joj damaŭlacca ab sustrečach, uzajemadziejničać z partniorami, u tym liku padčas mižnarodnych vizitaŭ», — raskazvaje dziaŭčyna.
Daručeńni tyčacca tolki pracy — schadzić u kramu ci zabrać dziaciej sa škoły Cichanoŭskaja svaju pamočnicu nie prosić.
Stanisłava kaža, što, prysłuchoŭvajučysia da parady dzieda nie leźci ŭ palityku, paźbiahała palityčnych kołaŭ, pakul žyła ŭ Biełarusi, da 18 hadoŭ.
«Ale ŭsio roŭna ŭlapałasia, jašče ŭ Minsku. Navat niahledziačy na toje, što nie była ni ŭ jakich moładzievych arhanizacyjach, nie była aktyvistkaj niejkich ruchaŭ, usio roŭna prymudryłasia być čatyry razy zatrymanaj jašče da paŭnalećcia.
Ja zrazumieła, što, moža być, dzied i nie choča, kab ja tanuła ŭ našych biełaruskich apazicyjnych kołach, ale heta ŭsio roŭna adbudziecca, tamu što ja chaču źmienaŭ dla svajoj krainy. Jon chacieŭ dla mianie lepšaj budučyni. Nie chacieŭ, napeŭna, kab paŭtarała jaho los abo los tych, z kim jon pracavaŭ. Dumaju, što ja hetaha i nie rablu. U mianie svoj los. Ja darosły čałaviek, jaki moža sam prymać rašeńni ŭ svaim žyćci».
Rašeńnie dałučycca da kamandy Cichanoŭskaj jana pryniała lohka.
«Ja dziesiać hadoŭ pražyła ŭ Polščy, i paśla dźviuch razmoŭ z [dypłamatyčnym daradcam Cichanoŭskaj] Dzianisam Kučynskim, jaki, ułasna, i prapanavaŭ mnie pierajechać u Litvu i pasprabavać svaje siły ŭ ofisie, pahadziłasia. I za miesiac pierajechała».
«Nie było adkrytaj vakansii, na jakuju ja b mahła padać svajo reziume. Na hetuju pasadu pretendavali jašče niekalki kandydataŭ. Ale vybrali mianie», — dzielicca dziaŭčyna.
Stanisłava kaža, što jaje ŭjaŭleńni pra Śviatłanu Cichanoŭskuju z tym, jakaja jana nasamreč, nie supali.
«Mnie zdajecca, u publičnaj prastory Śviatłanu vielmi časta niedaaceńvajuć. Ja była pad vialikim uražańniem, kali my pačali pracavać razam, tamu što zrazumieła, što za try hady Śviatłana sfarmavałasia jak samy padrychtavany i navučany palityk. Jak čałaviek z samym bahatym dośviedam mižnarodnaj kamunikacyi, jaki jość ciapier u Biełarusi. Jak absalutny stoik. Jak čałaviek, jaki dziela ahulnaha dabra moža kruhłasutačna pracavać biez vychadnych. Jana ŭvieś čas adklikajecca na ŭsie prapanovy ab sustrečach, dapamohi i hetak dalej.
Śviatłana praź siabie prapuskaje ŭsie historyi i asabista čytaje ŭsio, što joj pišuć biełarusy. Ja nie ŭjaŭlała sabie, što ŭ nas praz try hady zastalisia ludzi, u jakich jašče zachavałasia takaja pracazdolnaść».
Dziaŭčyna zaŭvažaje, što Cichanoŭskaja byvaje strohaj načalnicaj, ale zaŭsiody pa spravie.
«Jana patrabavalnaja, adnak adzinaje jaje patrabavańnie — kab ludzi vykonvali tyja abaviazki, jakija na siabie biaruć. Jana dobry mieniedžar».
Stanisłava vučyłasia ŭ Licei BDU, Varšaŭskim univiersitecie, ciapier praciahvaje vučobu ŭ Varšaŭskim univiersitecie pryrodaznaŭčych navuk. Pracavała ŭ niaŭradavych arhanizacyjach.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ152
Kamientary