Marzaluk raskazaŭ, jakoha niabožčyka buduć sudzić nastupnym paśla Katruka
8 lutaha Viarchoŭny sud Biełarusi pačaŭ pieršy ŭ historyi krainy sudovy praces nad niabožčykam. Sudziać pamierłaha 9 hadoŭ tamu Uładzimira Katruka, abvinavačanaha ŭ zabojstvie žycharoŭ Chatyni. Viedajučy asablivaści łukašenkaŭskaha sudavodstva, vyniasieńnie abvinavaŭčaha prysudu — sprava techničnaja, i adrazu paśla Katruka sud hatovy ŭziacca za razhlad spravy inšaha pamierłaha.
U intervju telekanału ANT deputat Pałaty pradstaŭnikoŭ Ihar Marzaluk paviedamiŭ, što čarhovym niabožčykam, jakoha stanuć sudzić u Biełarusi, stanie Symon Sierafinovič, piša «Radyjo Svaboda».
«Sierafinovič, nacyjanalna-śviadomy dziejač Vialikaj Brytanii paśla vajny, načalnik palicyi Mira. Druhi praces paśla Katruka budzie nad im. Jon pa vušy ŭ kryvi», — skazaŭ Ihar Marzaluk.
Symon Sierafinovič pachodziŭ z vakolicaŭ Mira, naradziŭsia ŭ 1910 hodzie. Letam 1944 hoda dałučyŭsia da 30-j hrenadziorskaj dyvizii SS, zdaŭsia ŭ pałon amierykancam i pajšoŭ dobraachvotnikam u 2-hi Polski korpus. Paśla vajny žyŭ u Łondanie, udzielničaŭ u dziejnaści biełaruskaj dyjaspary.
U 1990-ch hadach suprać jaho ŭ Vialikabrytanii była raspačataja kryminalnaja sprava za vajennyja złačynstvy, jakuju, adnak, nieŭzabavie spynili z pryčyny stałaha vieku i chvaroby abvinavačanaha.
Ciapierašniaja kampanija režymu Łukašenki pa sudach nad daŭno pamierłymi ludźmi, źviazanymi sa złačynstvami časoŭ Druhoj suśvietnaj vajny — adzin z elemientaŭ inicyjavanaj i zaviedzienaj Hienieralnaj prakuraturaj na čale z Andrejem Šviedam kryminalnaj spravy adnosna «hienacydu biełaruskaha naroda». Praz takuju svojeasablivuju apielacyju da historyi režym, jaki straciŭ unutranuju lehitymnaść, namahajecca abhruntavać nieabchodnaść siłavoha zadušeńnia mirnych pratestaŭ i apraŭdać svajo znachodžańnie pry ŭładzie luboj canoj.
Viarchoŭny sud pačynaje razhlad spravy pamierłaha dzieviać hadoŭ tamu Uładzimira Katruka, jakoha abvinavačvajuć u złačynstvach u Chatyni
Chto taki Uładzimir Katruk — karnik Chatyni, jakoha pieršym pačali sudzić paśmiarotna
Hienprakuratura nakiravała ŭ sud pieršuju kryminalnuju spravu suprać pamierłaha
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki22
Kamientary