Jon pačuvajecca značna lepš i spadziajecca, što jana pryžyviecca.
62-hadovamu mužčynu ŭ ZŠA pierasadzili nyrku hienietyčna madyfikavanaj śvińni. Jon paśpiachova adnaŭlajecca paśla apieracyi i chutka zmoža vypisacca ź lakarni, piša Bi-bi-si.
Amierykanskija chirurhi nazyvajuć Ryka Słejmana, jaki pahadziŭsia na takuju navatarskuju apieracyju, sapraŭdnym hierojem.
Da hetaha času byli tolki testavyja vypadki transpłantacyi nyrak śvińni čałavieku: tak, u 2022 hodzie ich pierasadzili pacyjentu sa śmierciu mozhu.
Słejmana praapieravali 16 sakavika ŭ balnicy Massachusetts General u Bostanie, pracedura praciahvałasia čatyry hadziny.
Pośpiech apieracyi ŭ balnicy nazyvajuć «važnaj viachoj u pošukach bolš lohka dastupnych orhanaŭ dla pacyjentaŭ». Čałaviečych donarskich orhanaŭ na ŭsich, chto maje patrebu, nie chapaje, tamu pacyjenty niaredka čakajuć mahčymaści dla transpłantacyi praciahły čas.
U Ryka Słejmana daŭniaja historyja nyračnaj niedastatkovaści: u 2018 hodzie jamu ŭ hetaj ža balnicy pierasadzili čałaviečuju donarskuju nyrku, a da taho jon siem hadoŭ pravioŭ na hiemadyjalizie. Praź piać hadoŭ, u mai 2023 hoda, jaho arhanizm adrynuŭ donarskuju nyrku, i mužčynu pryjšłosia viarnucca da dyjalizu.
Heta taksama davałasia ciažka: jaho kryvianosnyja sasudy stolki razoŭ vykarystoŭvalisia dla dyjalizu, što ŭ jaho paŭstali ŭskładnieńni dostupu.
Kožnyja dva tydni pacyjentu davodziłasia kłaścisia ŭ balnicu dla likvidacyi trombaŭ i chirurhičnych apieracyj, što mocna paharšała jaho jakaść žyćcia.
Słejman uzvažyŭ usie za i suprać i advažyŭsia na transpłantacyju orhana ad žyvioły. «Ja bačyŭ u hetym nie tolki mahčymaść dapamahčy mnie, ale i mahčymaść dać nadzieju tysiačam ludziej, jakija nie vyžyvuć biez donarskich orhanaŭ», — kaža jon.
Navukoŭcy spadziajucca, što transpłantacyja madyfikavanych orhanaŭ žyvioł, pierš za ŭsio śviniej, ludziam palehčyć chraničny deficyt donarskich orhanaŭ. Akramia nyrak, užo jość dośvied pierasadki śvinoha serca.
Śvinaja nyrka dla pierasadki była padrychtavana kampanijaj eGenesys z Kiembrydža, štat Masačusiets. Žyvioła była hienietyčna madyfikavana, u jaje byli vydalenyja hieny, jakija mahli nanieści škodu čałavieku-recypijentu, a niekatoryja čałaviečyja hieny byli dadadzienyja dla pavyšeńnia sumiaščalnaści.
Tym nie mienš, Słejman usio roŭna prymaje preparaty, jakija padaŭlajuć adryńvańnie, i pakolki heta vobłaść niaźviedanaha, nichto nie biarecca pradkazać, jak doŭha budzie funkcyjanavać jaho novaja nyrka.
Kamientary