U centralnaj častcy ZŠA źjavicca novy biełaruski hramadska-kulturny centr
Biełarusy Minieapalisa nabyli sabie va ŭłasnaść dvuchpaviarchovy budynak niepadalok ad centra. Tam płanujecca stvaryć apartamienty dla časovaha pražyvańnia ŭciekačoŭ ź Biełarusi, kanfierenc-zału, kavorkinh, ofisy i centr pryjomu i adpraŭki humanitarnaj dapamohi, paviedamlaje Belarus.info.
Prybliznaja płošča pamiaškańnia 10 000 kvardatnych futaŭ, ci kala 929 kvadratnych mietraŭ.
Arhanizataram i asnoŭnym vykanaucam prajekta źjaŭlajecca Pavieł Sakurec.
«Nasamreč, my šukali budynak užo hadoŭ piać. Uvieś čas na rynku byli vielmi vialikija košty. A zaraz źjaviŭsia budynak za čatyrysta tysiač, i kali košt apuściŭsia da trochsot tysiač, to ja vyrašyŭ jaho kupić. Kolki ludziej dapamahali jaho nabyć? Pryblizna dziesiać čałaviek skłalisia pa piaćdziasiat dalaraŭ. Što tyčycca astatnich hrošaj, to ja pakłaŭ zadatak sto tysiač i jašče dźvieście tysiač mnie dajuć finansavańnie na piać hadoŭ,» — prakamientavaŭ Pavieł.
Ciapier płanujecca całkam pierabudavać usio, kab stvaryć ofisy, kavorkinh, zalu dla vystupaŭ biełaruskich artystaŭ. «Ale samaja hałoŭnaja meta, — adznačyŭ Pavieł Sakurec, — heta zrabić svojeasablivy chab».
Budaŭničyja raboty pačnucca 25 krasavika i buduć doŭžycca ad šaści da vaśmi miesiacaŭ.
«Kab usio zrabić, nieabchodna ŭkłaści jašče čatyrysta tysiač na ramont. Tamu pabačym, ci budu ja brać sudu na hetuju sumu, bo nie chaciełasia b takija hrošy samomu vykładać. Tam pabačym.» — dadaje arhanizatar.
Prajekt možna padtrymać finansava, kab paskoryć pracu.
Takim čynam na mapie źjavicca jašče adna biełaruskaja kropka, siarod jakich užo jość haramadska-kulturnaja zała pry sabory śviatoha Kiryły Turaŭskaha ŭ Bruklinie, biełaruski centr u Saŭt Ryviery (štat Ńju-Džersi), fundacyja Kračeŭskaha ŭ Kuinz (horad Ńju-Jork), a taksama šerah prychodaŭ biełaruskich cerkvaŭ Ńju-Džersi i Ńju-Jorku.
Ciapier čytajuć
«Biełaruś ciabie lubić». Repartaž z raźvitańnia ź Mikitam Miełkazioravym10
Kamientary