Dapamohuć navat jołačnyja hirlandy. Jak vyratavać aharod ad travieńskich zamarazkaŭ
U Biełarusi znoŭ abiacajuć viasnovy «minus». Što rabić, kab nie zastacca biez uradžaju?
Travień u hetym hodzie nadvorjem nie raduje. Asabliva zaniepakojenyja dačniki, jakija ŭžo, napeŭna, zasadzili aharody ŭ nadziei na bahaty ŭradžaj. Načnyja zamarazki mohuć skarektavać hetyja płany. A tamu načny «minus» lepš papiaredžvać — kab paśla nie sumavać, źbirajučy drobnuju bulbu ci nie vielmi smačnyja pamidory.
Što treba ratavać ad marazoŭ?
Travieńskija i červieńskija zamarazki ličacca samymi niebiaśpiečnymi dla raślin. Kali ŭ krasaviku bolšaść pasadak znachodziacca jašče ŭ zarodkavym stanie, u jakim jany niadrenna abaronienyja ad navakolnaha asiarodździa, to bližej da siaredziny traŭnia pačynajecca aktyŭny pieryjad ćvicieńnia. U hety čas raśliny najbolš uraźlivyja, i navat lohkija zamarazki mohuć mohuć ich zabić.
Pry hetym minusavaja tempieratura pryvodzić da zastyvańnia kletkavaha soku. U takim stanie kletki hinuć, a razam ź imi hinie i raślina. Heta nie tyčycca zielaniny — cybuli, časnaku i piatruški. Hetyja raśliny mohuć pieražyć maroz da 8-10 hradusaŭ, i jany vielmi ŭstojlivyja da viasnovych zamarazkaŭ.
Zusim inšaja reč — ahurki, pamidory, piercy, kabački, bakłažany, jahady, a taksama mnohija kostačkavyja drevy. Usie hetyja raśliny vielmi nie lubiać nizkuju tempieraturu, a prahnazavanyja -2 dla ich i ŭvohule mohuć stać śmiarotnymi.
Trochi inšaja situacyja z bulbaj. Jana taksama nie lubić marazoŭ, ale najbolš uraźlivaj hetaja kultura robicca bližej da kanca červienia.
Možna prosta nakryć
Ale što rabić, kali aharod zasadžany, a pa televizary abviaščajuć štarmavoje papiaredžańnie pra zamarazki? Jość całkam kłasičny sposab, jaki vykarystoŭvajuć, mabyć, usie dačniki. Kali napieradzie «minus», to ciepłalubivyja raśliny lepš nakryć. Tut dapamoža tradycyjny polietylen abo efiektyŭny palimierny spanbond. Kali ničoha takoha pad rukoj niama, možna zładzić i časovyja rašeńni z płastykavych butelek ci navat kardonnych skrynak.
Rabić heta varta jašče dniom, kali hleba jašče nahretaja. Raśliny sami pa sabie nie vyłučajuć ciapła, hrecca jany buduć jakraz ad tempieratury ziamli. Dla taho, kab praciahnuć hety prahreŭ, jość prosty łajfchak: pierad tym, jak nakryć raśliny, nieabchodna palić hlebu nahretaj na soncy vadoj. Vilhotnaja ziamla addaje ciapło kudy lepš.
Čamu b nie vyklikać «doždž»?
Jašče adzin sposab zdajecca dziŭnym, ale vopytnyja dačniki ŭpeŭnienyja ŭ jaho efiektyŭnaści. Jany rajać bližej da pachaładańnia apyrskać raśliny vadoj — kali ŭžo pachaładaje, ale nižej za nul tempieratura jašče nie apuścicca.
Tut dapamoža śpiecyjalnaja nasadka na šłanh abo kłasičnaja palivačka. Kali na ŭčastku jość sistema raspyrskvańnia — usio atrymajecca jašče lepš. Daždžavać varta akuratna i nie zanadta bahata, dastatkova apyrskać liście raślin.
Jak heta pracuje? Bližej da minusavoj tempieratury vada pačnie aktyŭna vyparacca. Pavietra nad raślinami prahrejecca, što pieraškodzić choładu apuścicca na hlebu. Taki sposab dapamoža źbierahčy pasadki navat pry tempieratury da -7. Kali na ŭčastku jość pładovyja drevy, to pobač sa stvałami možna pastavić bočki z nahretaj na soncy vadoj — efiekt budzie prykładna takim ža.
Jak dapamohuć navahodnija hirlandy?
Časta dačniki zajmajucca tak zvanym mulčavańniem — zasypajuć pasadki sałomaj, torfam abo liściem. Rabić heta varta paśla viačerniaha palivu — tady płast arhaniki vyratuje hlebu ad zamarazkaŭ. Dapamahajuć minieralnyja ŭhnajeńni i tradycyjnaje akučvańnie, pra jakoje taksama nie varta zabyvacca.
Niekatoryja karystajucca i nietradycyjnymi mietadami. Naprykład, nakryvajuć pasadki starymi koŭdrami abo hazietami. Ale važna pamiatać: dla ciažkich materyjałaŭ treba zbudavać aporu.
Chtości stvaraje svojeasablivyja ciopłyja maty dla hradak — tut spatrebiacca miaški z sałomaj, jakija kładuć pierad pasadkami. Kali ŭ vas jość raśliny ŭ harškach, ich možna vystavić pobač z hradkami z ahurkami — raśliny zrobiać ciepłaabmien i pieražyvuć zamarazki.
Jość i zusim niezvyčajny łajfchak, jak abaranić tyja ž ahurki. Treba prosta raźviesić na hradcy navahodnija hirlandy. Ahieńčyki taksama dapamohuć raślinam sahrecca.
Kamientary