«Padumała, što mianie abrabavali»: siłaviki zabłakavali kartu repietytarcy, bo jaje vučań vyvodziŭ hrošy praz kryptu

Pra niepryjemnuju situacyju nastaŭnica raspaviała ŭ tyktoku. Natalla vykładaje anhlijskuju movu anłajn dla darosłych z usiaho śvietu — zrazumieła, što vučni, jakija znachodziacca ŭ roznych krainach, pieraličvajuć joj hrošy na kartku.

Niepryjemnaści ŭ repietytarki pačalisia kala dvuch miesiacaŭ tamu. Natalla chacieła raspłacicca za pakupki na kasie ŭ kramie, ale pačuła, što ŭ jaje na kartcy nie chapaje srodkaŭ. Heta navina ździviła žančynu, bo jana dakładna viedała, što hrošy tam jość.

— Ja pryjšła ŭ šok, bo heta maja asnoŭnaja kartka, na jakoj ja zachoŭvała amal usie hrošy. Ja ŭ vielmi redkich vypadkach zdymaju najaŭnyja, bo nu kamu jany ciapier patrebnyja? Zaraz ža ŭsio možna apłacić kartkaj. Padumała, što ašukancy skrali ŭsie maje hrošy. Ja adrazu ž patelefanavała ŭ bank, dzie mnie adkazali, što na moj rachunak nakłali aryšt pa patrabavańni RUUS horada, u jakim ja navat nie žyvu.

Dalej Natalla patelefanavała ŭ milicyju. Vyśvietliłasia, što aryšt nakłali praź jaje vučnia-biełarusa, jaki žyvie za miažoj. Adzin ź jaho pieravodaŭ hrošaj nie spadabaŭsia siłavikam.

— Reč u tym, što jon vyvodziŭ srodki z kryptavaluty, pieravodziŭ ich na svaju biełaruskuju kartu i ŭžo ź biełaruskaj karty adpraŭlaŭ hrošy mnie. Ja naohuł nie ŭjaŭlała, što hetyja hrošy byli ŭ kryptavalucie da hetaha.

Jak raniej paviedamlałasia, sioleta z 1 sakavika biełaruskija siłaviki z roznych viedamstvaŭ atrymali kruhłasutačny dostup da płaciažoŭ biełarusaŭ, a razam z tym mahčymaść błakavać apieracyju terminam da 10 dzion. Ułady zajaŭlali, što padobnyja zachady dapamohuć pieramahčy machlaroŭ.

Mienavita praz heta ŭ Natalli i pačalisia prablemy.

— Ja akazałasia apošnim čałaviekam u łancužku z 5-6 čałaviek. Heta značyć, chtości kamuści pieravioŭ srodki, hetyja ludzi akazalisia ašukancami, ašukancy vyvieli hrošy ŭ kryptu. U hetaj krypcie jany pradali hrošy inšamu čałavieku, toj pradaŭ hrošy jašče kamuści… Moj vučań kupiŭ hetuju kryptavalutu, pieravioŭ u biełaruskuju valutu i hetyja hrošy pryjšli mnie na kartu. I ŭ vyniku moj rachunak całkam zabłakavali.

Repietytarka kaža, što ŭžo dva miesiacy nie moža ničoha dabicca, kolki b ni tłumačyła siłavikam, što nie maje nijakaha dačynieńnia da pieršapačatkovych ašukancaŭ. Hałoŭnaja prablema ŭ tym, što joj zabłakavali nie sumu za adzin urok, a ŭsie srodki na karcie.

— Viarnicie mnie hrošy, jakija ja zarabiła, ź jakich ja płaču padatki. Ale mnie kažuć, što heta niemahčyma, bo praces zapuščany. I voś pakul hety łancužok nie raźviažacca, pakul na kožny rachunak nie pryjdzie z banka infarmacyja, mnie nie mohuć razbłakavać maju kartu. Ja patelefanavała, musić, va ŭsie adździeły milicyi, va ŭsie śledčyja kamitety. Zastałosia tolki ŭ Administracyju prezidenta pisać skarhu.

Natalla kaža, što praz hety niepryjemny vypadak pierastała trymać hrošy na kartcy — pakidaje tam maksimum na adzin pachod u kramu, a astatniaje zdymaje najaŭnymi.

@nata_mila_english

Kto stałkivałsia s takoj situacijej ? Čto diełať ?

♬ orihinalnyj zvuk - nata_mila_english

Videa ŭ tyktoku sabrała kala 235 tysiač prahladaŭ. U kamientaryjach byli ludzi, jakija śćviardžajuć, što taksama sutyknulisia z anałahičnymi prablemami. Adznačyŭsia jašče adzin repietytar ź Minska, jakomu zabłakavali kartku praz mamu adnaho z vučniaŭ, jakaja pieraličyła jamu hrošy na zaniatki.

Raniej «Naša Niva» prasiła prakamientavać novy zakon Łukašenki pradstaŭnika «Bajpoła» Stanisłava Łupanosava. Toj tłumačyŭ, što da novaha zakona sistema pracavała zusim inakš.

— Raniej siłaviki nie mieli pramoha dostupu da padobnaha rodu infarmacyi. Kab atrymać taki dostup, śledčy abo apieratyŭnik musiŭ rabić zapyt u bankaŭskuju ŭstanovu na błakiroŭku abo zapyt źviestak. Zrabić heta možna było tolki z sankcyi prakurora.

Z 1 sakavika, na dumku byłoha siłavika, sama bankaŭskaja tajamnica pa fakcie pierastała być takoj, bo siłaviki z roznych viedamstvaŭ atrymali pastajanny dostup da novaj sistemy.

— Sistema budzie analizavać płaciež. Kali jana paličyć jaho padazronym, infarmacyju pieranakirujuć da adnaho ź siłavych viedamstvaŭ, dzie ŭ ručnym režymie niejki siłavik budzie prahladać, što adbyvajecca, analizavać tranzakcyju. U toj ža čas siłaviki pa ŭłasnym žadańni zmohuć dasyłać bankam patrabavańni zabłakavać rachunak toj ci inšaj asoby, zabaranić rabić abo prymać hrašovyja pieravody.

Łupanosaŭ ličyŭ, što siłaviki zmohuć vykarystoŭvać novyja mahčymaści dla represij i ŭskładnieńnia žyćcia častcy hramadstva.

Pieršapačatkova paviedamlałasia, što siłaviki atrymajuć mahčymaść błakavać rachunak na termin da 10 dzion. Ale, kali mierkavać pa kamientarach pad videa Natalli, časam zdarajecca, što praz 10 dzion rachunak sapraŭdy razbłakoŭvajuć, ale ŭ chutkim časie błakujuć znoŭ.

• 6
• 0
• 7
• 4
• 0
• 3
• 27
• 0