Samy šmatludny zavočny sud: pačynajecca razhlad «spravy analitykaŭ Śviatłany Cichanoŭskaj»

U Minskim abłasnym sudzie 31 maja ŭ farmacie śpiecvytvorčaści pačynajecca razhlad kryminalnaj spravy «analitykaŭ Śviatłany Cichanoŭskaj», piša «Viasna».

Abvinavačvajuć adrazu 20 čałaviek: Alaksandra Dabravolskaha, Ryhora Astapieniu, Filipa Bikanava, Juryja Drakachrusta, Andreja Kazakieviča, Hannu Krasulinu, Jaŭhiena Kryžanoŭskaha, Dzianisa Kučynskaha, Vieraniku Łapućka, Alaksandra Łahvinca, Hannu Lubakovu, Vasila Navumava, Maryju Rohavu, Piatra Rudkoŭskaha, Alesiu Rudnik, Natallu Rabavu, Paŭła Usava, Taćcianu Čulickuju, Alaksandra Šłyka, Kaciarynu Šmacinu.

Spravu budzie razhladać sudździa Uładzimir Areška.

Zhodna z materyjałami spravy, usich ich abvinavačvajuć u ździajśnieńni «złačynstvaŭ ekstremisckaha charaktaru» ŭ suviazi z kampanijaj pa vybarach Alaksandra Łukašenki, a taksama ŭ postelektaralny pieryjad:

• zmova z metaj zachopu dziaržaŭnaj ułady niekanstytucyjnym šlacham (č. 1 art. 357 KK RB);
• udzieł u ekstremisckim farmiravańni i ŭvachodžańnie ŭ skład takoha farmavańnia ŭ metach ździajśnieńnia złačynstva ekstremisckaj nakiravanaści (č. 3 art. 361-1 KK);
• spryjańnie ŭ publičnych zaklikach da zachopu dziaržaŭnaj ułady; ździajśnieńnie inšych dziejańniaŭ na škodu nacyjanalnaj biaśpiecy Respubliki Biełaruś; zaklikach, skiravanych da zamiežnaj dziaržavy, zamiežnaj i mižnarodnaj arhanizacyi, ździajśnieńnie dziejańniaŭ na škodu nacyjanalnaj biaśpiecy Respubliki Biełaruś z vykarystańniem ŚMI i sietki Internet (č. 6 art. 16, č. 3 art. 361 Kryminalnaha kodeksa Respubliki Biełaruś (u redakcyi ad 26 traŭnia 2021 hoda);
• spryjańnie ŭ naŭmysnych dziejańniach, nakiravanych na raspalvańnie sacyjalnaj varožaści i varožaści pa prykmiecie inšaj sacyjalnaj prynaležnaści, učynienych hrupaj asob (č. 6 art.16, č. 3 art. 130 KK RB). 

Akramia taho, Alaksandra Dabravolskaha abvinavačvajuć u kiraŭnictvie ekstremisckim farmavańniem (č. 1 art. 361-1 KK).

Usie abvinavačanyja pakinuli Biełaruś, u dačynieńni da ich pravodziłasia śpiecyjalnaja vytvorčaść.

«My ličym dadzienuju «spravu» palityčna matyvavanym pieraśledam. Usie advolna zhrupavanyja asoby ŭ «spravie» zajmalisia vyklučna prafiesijnaj dziejnaściu, jakaja nie moža kłasifikavacca ŭ adpaviednaści z pradjaŭlenymi abvinavačańniami. My ličym hetuju «spravu» praciaham bieśpierapynnaj ataki suprać biełaruskaj niezaležnaj analityčnaj, ekśpiertnaj i žurnalisckaj supolnaści z boku biełaruskich uładaŭ. A taksama źviartajem uvahu na toje, što abvinavačvać ekśpiertaŭ i žurnalistaŭ u sprobach zachopu ŭłady i ekstremiźmie — heta absurd, — vystupili z zajavaj analityki.

— My nie spadziajemsia na spraviadlivy sud. Na žal, my nie majem sumnievaŭ u tym, što budziem «asudžanyja» na akreślenyja ŭ abvinavačańniach terminy, jak i tysiačy biełarusaŭ i biełarusak, asudžanych pa padobnych palityčna matyvavanych spravach».

Aproč taho, u Bresckim abłasnym sudzie budzie prachodzić praces u dačynieńni da opiernaj śpiavački Marharyty Čachoŭskaj, Illi Salankova i Uładzisłava Navažyłava. U spravie fihuruje adrazu 14 artykułaŭ KK, u tym liku «abraza Łukašenki», «sadziejničańnie ekstremisckaj dziejnaści» i inš.

U Minskim haradskim sudzie buduć zavočna razhladać spravu ŭ dačynieńni da daradcy Śviatłany Cichanoŭskaj Franaka Viačorki.

• 1
• 0
• 7
• 2
• 0
• 0
• 6
• 0