«Padsankcyjnyja» aŭto sa Štataŭ prapanujuć dastaŭlać u Biełaruś praz Hruziju. Nakolki heta daražej?
Z 4 červienia Litva i inšyja susiednija krainy ES nie prapuskajuć u Biełaruś mašyny, maładziejšyja za 5 hadoŭ i z abjomam ruchavika ad 1,9 litra. Achvotnym nabyć takija aŭto ŭ ZŠA prapanujuć dastaŭku praz Hruziju. Voś kolki heta budzie kaštavać.
Zialonaje śviatło tolki dla małalitražak
Praź niekalkich dzion paśla poŭnaha banu na afarmleńnie mašyn, maładziejšych za 5 hadoŭ, aŭto z abjomam ruchavika da 1,9 litra pačali znoŭ afarmlać i vypuskać u Biełaruś.
Aŭtamabili z abjomam ruchavika, bolšym za 1,9 litra, pa-raniejšamu nie afarmlajuć na ekspart i nie vypuskajuć ź ES u Biełaruś, kali z momantu vypusku nie prajšło 5 hadoŭ.
Ludziam, jakija ŭžo nabyli aŭto ŭ Štatach, ale ich mašyny nie paśpieli adpravić u Kłajpiedu, prapanujuć adpraŭlać ich u hruzinski port Poci. Z Hruzii mašyny aŭtavozami abiacajuć dastavić u Biełaruś.
Taki samy maršrut prapanujuć i tym, chto tolki zadumaŭsia pra kuplu mašyny va ŭzroście da 5 hadoŭ i z ruchavikom, bolšym za 1,9 litra. Taksama pišuć, što Litva nie afarmlaje ŭ Biełaruś elektrakary i hibrydy va ŭzroście da 5 hadoŭ. Tamu hetyja mašyny taksama treba budzie dastaŭlać praz Hruziju.
Rychtujcie hrošy
Naturalna, što dastaŭka mašyn takim šlacham budzie značna daražejšaj. Marskaja dastaŭka budzie kaštavać bolš pryblizna na 300 dalaraŭ. Za dastaŭku aŭtamabila pa sušy (z Hruzii ŭ Biełaruś) nazyvajuć ad 2500-3000 dalaraŭ. Dla paraŭnańnia: z Kłajpiedy da Minska dastaŭka kaštuje kala 1200 dalaraŭ.
Atrymlivajecca, što praz uskładnionuju łahistyku mašyny sa Štataŭ z abjomam ruchavika 1,9 litra i bolš prybaviać u canie kala 2-2,5 tysiačy dalaraŭ.
Kupla niekatorych aŭto z-za akijanu moža stracić sens
Dadatkovyja 2000-2500 dalaraŭ zrobiać kuplu niekatorych mašyn niemetazhodnaj. U vypadkach, kali madel budzie pradavacca, naprykład, z ruchavikom 1,5 i 2,0, to apošniuju vidavočna kuplać budzie biez sensu.
Ale ŭ šerahu papularnych madelaŭ, jakija viazuć sa Štataŭ, prosta niama ŭ liniejcy ruchavikoŭ z abjomam da 1,9. Siarod ich, naprykład, Ford Mustang, Chevrolet Camaro, BMW roznych madelaŭ.
Kamientary