Ułady ZŠA prapanujuć $10 miljonaŭ za infarmacyju pra hramadzianina Rasii

Jak piša The Washington Post, fiederalnaje vialikaje žury na hetym tydni vystaviła abvinavačańnie, a akruhovy sud štata Meryłend vydaŭ ordar na aryšt 22-hadovaha hramadzianina Rasii Amina Styhała, jaki, pa słovach prakuroraŭ, zastajecca na svabodzie. Fiederalnyja ŭłady prapanujuć uznaharodžańnie ŭ pamiery da 10 miljonaŭ dołaraŭ za infarmacyju pra jaho miescaznachodžańnie.

Amin Styhał abvinavačvajecca ŭ datyčnaści da maštabnaj kibierataki, viadomaj jak WhisperGate, na kampjutarnyja sistemy ŭkrainskaha ŭrada pierad pačatkam vajennaj ahresii Rasii. Ataka taksama była nakiravanaja na adnu z krain-sajuźnic Ukrainy ŭ Centralnaj Jeŭropie i ŭklučała «probinh» (pramacvańnie) kampjutarnych sistem uradavych abjektaŭ ZŠA ŭ Meryłendzie.

Jak havorycca ŭ abvinavaŭčym zaklučeńni, WhisperGate pačałasia prykładna za miesiac da pačatku vajny. Vykonvajučy instrukcyi aficeraŭ rasijskaj vajskovaj raźviedki z HRU, Styhał uzłamaŭ kampjutary dziasiatkaŭ ukrainskich dziaržaŭnych struktur, u tym liku tych, što mieli adnosiny da krytyčna važnaj infrastruktury.

Mužčyna vykarystaŭ prahramnaje zabieśpiačeńnie, zamaskiravanaje pad prahramy-vymahalniki, kali dostup da fajłaŭ błakujecca da toj pary, pakul nie budzie vypłačany vykup. Ale na samaj spravie fajły byli całkam vydalenyja.

WhisperGate taksama skraŭ i źliŭ asabistyja danyja, u tym liku miedycynskija karty tysiač ukraincaŭ, što, pa słovach fiederalnych uładaŭ ZŠA, pavinna było «pasiejać zaniepakojenaść siarod ukrainskich hramadzian» adnosna biaśpieki i nadziejnaści sistem ich urada.

U kastryčniku 2022 hoda Styhał i rasijskija vajskoŭcy taksama ŭzłamali transpartnuju infrastrukturu adnoj z krain Centralnaj Jeŭropy, jakaja padtrymlivała Ukrainu, akazvajučy joj cyvilnuju i vajskovuju dapamohu. Što heta za kraina, u sudovych dakumientach nie kankretyzujecca.

Fiederalnyja prakurory taksama śćviardžajuć, što sa śniežnia 2020 hoda i dahetul rasijskija vajskoŭcy skanavali abaronienyja ŭradavyja kampjutary pa ŭsim śviecie, u jakaści «papiaredniaha kroku da atrymańnia niesankcyjanavanaha dostupu». Tolki na veb-sajty ŭrada ZŠA, raźmieščanyja na abaronienych kampjutarach u Meryłendzie, rasijskija vajskoŭcy i Styhał zrabili 63 praniknieńni dla vyjaŭleńnia ŭraźlivaściaŭ.

Uznaharoda za infarmacyju pra miescaznachodžańnie Styhała budzie vypłačanaja Fondam «Uznaharoda za dapamohu pravasudździu» (Rewards for Justice) Dziarždepartamienta ZŠA.

«Złamyśniki, jakija atakujuć našych sajuźnikaŭ, pavinny viedać, što my budziem pieraśledavać ich pa ŭsioj strohaści zakona», — cytuje vydańnie słovy prakurora ZŠA ŭ Meryłendzie Ereka Berona (Erek Barron).

• 9
• 0
• 3
• 0
• 3
• 1
• 4
• 0