Jany abvinavačvajucca ŭ pierapraŭcy cyharet ź Biełarusi. Akruhovaja prakuratura Zamości nakiravała ŭ rajonny sud Lublina abvinavaŭčaje zaklučeńnie, piša Reform.news.
38 čałaviek, pavodle viersii abvinavačvańnia, źjaŭlajucca ŭdzielnikami čatyroch asobnych arhanizavanych hrup. Dla pierapraŭki cyharet praź miažu jany vykarystoŭvali hruzavyja ciahniki, jakija iduć praź pierachod u Tarespali. Schiemu kantrabandy raskryli supracoŭniki Nadbužanskaha adździaleńnia pahraničnaj achovy. Jano ž i viało śledstva.
Jak paviedamili ŭ pamiežnaj achovie Polščy, abvinavačanyja pracavali z hramadzianami Biełarusi, jakija hruzili cyharety ŭ ciahniki ŭ našaj krainie. Zvyčajna ich chavali ŭ kantejnierach, a taksama ŭ vahonach z vuhlom, draŭninaj abo drankaj.
Schavaŭšy cyharety, biełaruskija partniory kantrabandystaŭ infarmavali ich ab numarach vahonaŭ ź nielehalnym hruzam.
U dalejšym členy AZH arhanizoŭvali praz supracoŭnikaŭ polskich terminałaŭ dastaŭku vahonaŭ u miescy, zručnyja dla vyhruzki kantrabandy. Cyharety vyvozilisia na lehkavych aŭtamabilach i furhonach.
Tytuniovyja vyraby dalej pierapradavalisia pakupnikam va ŭnutranych rajonach Polščy. Biełaruskija partniory kantrabandystaŭ atrymlivali svajo ŭznaharodžańnie praz kiroŭcaŭ-dalnabojščykaŭ i mašynistaŭ ciahnikoŭ, ź jakimi pieradavalisia hrošy.
Hrupy dziejničali ź lipienia 2019 hoda pa kastryčnik 2021 hoda. Za hety čas, pavodle źviestak pamiežnaj achovy, jany zmahli pierapravić bolš za 1,67 młn pačkaŭ cyharet na sumu 11,72 młn złotych. Škoda dla polskaj kazny aceńvajecca ŭ 39,24 młn złotych (kala 10 młn dalaraŭ).
Padčas pieratrusaŭ byli kanfiskavanyja 154 litry ałkaholnych napojaŭ biez polskich akcyznych marak, hazavyja pistalety, bolš za 7 kh narkatyčnych rečyvaŭ, a taksama dva aŭtamabili ź pierabitymi vin-numarami.
Dachody ad kantrabandy ŭdzielniki złačynnych hrup układvali ŭ nieruchomaść i darahija aŭtamabili.
Bolšaść padazravanych pryznali svaju vinu i supracoŭničali sa śledstvam. 24 fihuranty padali zajavy ab hatoŭnaści dobraachvotna panieści pakarańnie, uzhodnienaje z prakuroram. Pad vartaj utrymlivajucca 10 abvinavačanych.
Kamientary