Talk aficyjna adniesieny da rečyvaŭ, jakija «vierahodna, vyklikajuć rak». Takoje rašeńnie pryniała Suśvietnaja arhanizacyja achovy zdaroŭja na padstavie vynikaŭ daśledavańnia Mižnarodnaha ahienctva pa vyvučeńni raku (MAVR).
U adnosinach da ludziej pryčynna-vynikovaja suviaź pamiž talkam i rakam nie była dakazanaja. Ale pry dośledach na pacukach byli atrymanyja «dastatkovyja dokazy», što talk moža vyklikać rak jaječnikaŭ. A daśledavańni na kletkach pakazali «pierakanaŭčyja dokazy», havorycca ŭ pres-relizie SAAZ.
Tamu SAAZ pryniała rašeńnie adnieści talk da kancerahienaŭ i pryznała, što ŭ peŭnych umovach jon moža pavyšać ryzyku ankałahičnych zachvorvańniaŭ.
Ekśpierty nie zmahli vyklučyć vierahodnaść pamyłak, źviazanych z mahčymym zabrudžvańniem talku aźbiestam. Ale ŭ dakumiencie adznačajecca, što rabočaja hrupa «vykarystała tolki tyja daśledavańni, u jakich zabrudžvańnie talku aźbiestam było vielmi małavierahodnym».
Talk — heta pryrodny minierał. Jon da hetaha času šyroka vykarystoŭvajecca ŭ mnohich krainach u dziciačych prysypkach i ŭ niekatoraj kaśmietycy.
U 2023 hodzie na fonie sieryi skandałaŭ z zachvorvańniami na rak jaječnikaŭ kampanija Johnson & Johnson spyniła vypuskać dziciačuju prysypku na asnovie talku i zapłaciła miljardy dalaraŭ, kab urehulavać sudovyja pazovy.
Kamientary