Padrabiaznaści teraktu Kryhiera pad Aziaryščam — razburanyja špały i nivodnaha paranienaha

Prapahandystka Ludmiła Hładkaja narešcie apublikavała svoj raniej anansavany repartaž pra sud nad niemcam Ryka Kryhieram, jaki skončyŭsia śmiarotnym prysudam.

Pa słovach Hładkaj, Kryhier pryjechaŭ u Biełaruś 2 kastryčnika 2023 hoda «z telefonami i bieśpiłotnikam». 

Jamu pradpisvałasia

«pravieści ŭ Asipovičach raźviedku i fatahrafavańnie abjektaŭ pa kaardynatach. Instrukcyi prykładalisia. I voś 4 kastryčnika Ryka fatahrafuje terytoryju v/č 97115, vajskovuju techniku. Na nastupny dzień — učastak čyhunačnych puciej, vahony, pahruzačna-razhruzačnuju płatformu pobač z čyhunačnaj stancyjaj «Aziaryšča»,

pasłaŭšy danyja svajmu kurataru pa imieni Mikałaj.

Paśla taho Kryhier

«atrymlivaje kaardynaty i fota tajnika z samarobnaj vybuchovaj pryładaj (SVP), a taksama instrukcyju, jak ustalavać jaje na čyhuncy. Tajnik Kryhier znajšoŭ u lesapasadcy ŭ Pieršamajskim rajonie Minska, pad aporaj ŁEP. Dastaŭ zaplečnik z SVP (nie mienš za 3 kh vybuchovaha rečyva aktohien), pieravioz i ŭstalavaŭ na čyhunačnych puciach «Aziaryšča».

Paśla taho Kryhier, pavodle prapahandystki, adspravazdačyŭsia pra vykanańnie zadańnia, viarnuŭsia ŭ minski hatel i źbiraŭsia 6 kastryčnika vylecieć u Baku.

Vybuch adbyŭsia 5 kastryčnika ŭ 23:22, jak śćviardžaje Hładkaja, «jakraz pierad prybyćciom na stancyju pasažyrskaha ciahnika». U vyniku hetaha nibyta byli, pavodle słoŭ pradstaŭnika čyhunki,

«całkam razburanyja špały, rejki zrušanyja, vyhnutyja vonki, paškodžanyja čyhunačnaje pałatno, macavańnie, raskidany ščebnievy bałast z utvareńniem varonki, aholenaja armatura…»

Paśla taho Ludmiła Hładkaja ščodra cytuje pakazańni žycharoŭ damoŭ, jakija znachodzilisia niepadalok ad miesca vybuchu. Usie, viadoma, mocna pierapałochalisia, u niekatorych z voknaŭ pavylatała škło, a ŭ adnoj sa śviedak navat nibyta pahnuła žaleznyja dźviery. 

Pa słovach Hładkaj, adzin sa śviedkaŭ śćviardžaŭ, što 6 kastryčnika na puci, dzie zakłali vybuchoŭku, pavinna była hruzicca vajskovaja technika. Praz vybuch hetuju pahruzku zatrymali, «a značyć, heta mahło paŭpłyvać na mabilnaść vojskaŭ».

Zatrymany niemiec nibyta adrazu pryznaŭsia tolki ŭ ahienturnaj dziejnaści, ničoha astatniaha nie pryznavaŭ, a tamu heta ŭsio, maŭlaŭ, doŭha i ŭparta dakazvali praz 

«pakazańni dziasiatkaŭ śviedak, paciarpiełych, žycharoŭ najbližejšych da miesca vybuchu vulic, ludziej, jakija byli na čyhunačnaj stancyi ŭ momant i paśla vybuchu. Heta i apytańni słužačych v/č, taksista, jaki vioz Kryhiera, vyniki apieratyŭna-vyšukovaj dziejnaści, pakazańni abvinavačanaha, jakija davaŭ na papiarednim śledstvie, pry praviercy pakazańniaŭ na miescy. Heta i vyniki ekśpiertyz (daktyłaskapičnaj, vybuchatechničnaj, hienietyčnaj i inšych), zapisy z kamier videanazirańnia, infarmacyja z mabilnych abvinavačanaha, pierapiski, vyniki pieratrusaŭ».

U sudzie ad dačy pakazańniaŭ Kryhier nibyta admoviŭsia, tamu začytvali tolki tyja, što jon daŭ padčas śledstva. Na inkryminavanyja jamu złačynstvy jon, maŭlaŭ, pajšoŭ dobraachvotna i vyklučna dziela hrošaj.

Vajavać ža va Ukrainie, pavodle łukašenkaŭskaj prapahandystki, Kryhieru prapanoŭvali ažno za 2 tysiačy jeŭra ŭ miesiac. Hetaja suma, viadoma, moža ŭrazić biełarusaŭ, ale kab jana mahła spakusić hramadzianina Hiermanii — vielmi sumnieŭna.

Jak viadoma, sud skončyŭsia vyniasieńniem Ryka Kryhieru śmiarotnaha prysudu. Hładkaja nazyvaje kankretnyja proźviščy tych, chto jaho vynosiŭ. Sudździoj byŭ Aleh Łapieka, a dziaržaŭny abvinavaŭca — Taćciana Hrakun.

Ryka Kryhier, pavodle Hładkaj, prysud abskardžvać nie staŭ, i jon užo nabyŭ moc.

• 3
• 1
• 1
• 0
• 6
• 4
• 7
• 0