Niaŭžo fondy nie dapamahajuć palitviaźniam, jakija napisali prašeńnie ab pamiłavańni? Naturalna, heta niapraŭda
Pa słovach žurnalistki Volhi Łojka, rodnyja tych, chto moža vyzvalicca praz pamiłavańnie, bajacca, što byccam by dabračynnyja fondy nie dapamohuć takim eks-palitviaźniam. My zapytalisia pra heta ŭ pradstaŭnikoŭ dźviuch bujnych arhanizacyj dapamohi.
Jak kaža Łojka, byłyja palitviaźni i ich rodnyja nie sprabujuć zrazumieć, ci hatovyja fondy im dapamahać, bo ź Biełarusi niebiaśpiečna «ŭsio heta ščylna adsočvać». Ale jany «adčuvajuć ahulny vajb i chvalujucca».
Fond «Bajsoł» pastajanna źbiraje dapamohu byłym palitviaźniam, a taksama tym, chto ciapier za kratami, i ich siemjam. Naprykład, ciapier u «Bajsoła» idzie zbor u dapamohu dzieciam palitviaźniaŭ, kab sabrać ich u dziciačy sadok ci škołu.
Kiraŭnik «Bajsoła» Andrej Stryžak kaža, što vykazanyja Volhaj Łojka strachi rodnych źniavolenych nie adpaviadajuć rečaisnaści:
«U našym ałharytmie prosta niama takoha punktu jak udakładnieńnie, na padstavie čaho vyjšaŭ čałaviek — skančeńnie terminu, pamiłavańnie ci niešta jašče. «Bajsoł» akazvaje dapamohu palitviaźniam niezaležna ad pryčyn, pa jakich čałaviek vyzvaliŭsia. Tak było, jość i budzie».
Pradstaŭnica pravaabarončaj inicyjatyvy Dissidentby Maryna Kasinierava taksama zapeŭnivaje — tyja, chto vyjšaŭ pa pamiłavańni, mohuć raźličvać na dapamohu fondaŭ:
«U fondaŭ i arhanizacyj nikoli nie stajała takoha pytańnia, [ci dapamahać tym, chto vyjšaŭ pa pamiłavańni]. My dapamahajem usim z adnolkavaj pavahaj i razumieńniem».
Kasinierava adznačaje, što za ŭvieś čas pracy jana nikoli nie sutykałasia z takimi strachami, ad kaleh jana taksama nie čuła pra takoje. Dissidentby štomiesiac pracuje z paŭsotniaj siemjaŭ palitviaźniaŭ, a to i bolej, tamu, tłumačyć aktyvistka, u fondu vialikaja vybarka.
«Mažliva, takuju infarmacyju mohuć raspaŭsiudžvać prapahandysty ci śpiecsłužby, kab zabłakavać dapamohu ci pasiejać raskoł u hramadskim ruchu», — miarkuje Kasinierava.
«Naša Niva» — bastyjon biełaruščyny
PADTRYMAĆCiapier čytajuć
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary