«Zabłakavana bolš za 4000 aŭtamabilaŭ». Što biełarusy robiać z mašynami, jakija zachraśli ŭ Kłajpiedzie
Prajšło ŭžo bolš za dva miesiacy, jak biełarusy nie mohuć zabrać z porta ŭ Kłajpiedzie aŭtamabili, nabytyja ŭ ZŠA, Kanadzie i Karei. Pahladzieli, što robiać ludzi i jakija jość alternatyvy.
Namahajucca dahrukacca da prezidenta Litvy
Kali vieryć tekstu pietycyi, jakuju biełarusy dadali na sajcie openpetition.eu, u litoŭskim porcie Kłajpieda znachodzicca bolš za 4000 aŭto z ZŠA, Kanady i Karei, jakija biełarusy nie mohuć vyvieźci ź Litvy praz sankcyi i dadatkovyja patrabavańni ad mytni.
Pietycyja adrasavana prezidentu Litvy, ministru finansaŭ i kiraŭniku litoŭskaha mytnaha departamienta.
Aŭtary pietycyi prosiać dać kalidor dla ekspartu aŭtamabilaŭ, nabytych hramadzianami Biełarusi ŭ ZŠA, Jeŭropie i Karei jašče da taho, jak stała viadoma pra novyja patrabavańni.
Pa stanie na 19 žniŭnia pad pietycyjaj padpisałasia 1066 čałaviek.
Pra toje, što takich mašyn moža być sapraŭdy šmat, taksama śviedčyć kolkaść udzielnikaŭ śpiecyjalnaha čata ŭ telehramie. U im naličvajecca 2658 udzielnikaŭ.
Jakija jość alternatyvy?
U tych, čyje aŭtamabili zachraśli ŭ Litvie praz novyja patrabavańni i abmiežavańni, jość niekalki varyjantaŭ, jak vyjści ź situacyi.
Aŭtamabil možna dastavić u Biełaruś alternatyŭnym šlacham praz Hruziju. Pieravozčyki prapanujuć dastaŭku moram u kantejniery abo adrazu aŭtavozam. Pieršy varyjant bolš praciahły pa časie, ale krychu tańniejšy.
Za dastaŭku aŭto z Kłajpiedy ŭ Minsk praz Hruziju moram prosiać 4500-6000 dalaraŭ u zaležnaści ad kampanii pieravozčyka i pamieru aŭto.
Za dastaŭku z Kłajpiedy ŭ Minsk praz Hruziju aŭtavozam biaruć 6000-7000 dalaraŭ u zaležnaści ad kampanii i pamieru aŭto.
Dastaŭka takim čynam takoha bujnahabarytnaha transpartu, jak pikapy, kaštuje kala 9-11 tysiač dalaraŭ.
Inšy varyjant — pasprabavać pradać aŭtamabil, pakul jon znachodzicca ŭ porcie. Dla hetaha ŭ miesiendžarach taksama stvoranyja admysłovyja čaty.
Jašče adzin varyjant — znajści čałavieka z hramadzianstvam abo DNŽ u adnoj z krain ES i razmytnić aŭtamabil na jaho. A heta 10% myta, plus 21% PDV. Ale navat paśla vypusku ŭ volny abarot na terytoryi ES takuju mašynu ŭsio adno daviadziecca pradavać u Jeŭropie, bo jaje ekspart u Biełaruś u lubym vypadku zabaronieny. Tamu i hety varyjant naŭrad ci karystajecca vialikim popytam.
Čakajuć la mora pahody
U adnym z apytańniaŭ u čacie bolš za pałova respandentaŭ, čyje aŭto zachraśli ŭ Litvie, adkazvali, što praciahvajuć spadziavacca na cud. I pakul jany ledź nie ŭ pramym sensie čakajuć la mora pahody, kožny dzień kapaje ad 5 da 20 jeŭra za zachoŭvańnie aŭto na terytoryi porta.
Jašče ŭ 35% apytanych aŭtamabili znachodziacca ŭ stadyi čakańnia adpraŭki alternatyŭnym šlacham.
Tolki ŭ 13% z udzielnikaŭ apytańnia mašyny ŭžo adpravilisia z Kłajpiedy ŭ Minsk alternatyŭnym šlacham.
Jakija aŭto jeduć naŭprost ź Litvy ŭ Biełaruś?
Aŭtamabili z abjomam ruchavika mienšym za 1,9 litra, a taksama mašyny z ruchavikami bolšaha abjomu, kali im spoŭniłasia 5 hadoŭ, praciahvajuć kuplać i nakiroŭvać u port Kłajpiedy.
Aŭto z abjomam ruchavika, bolšym za 1,9 litra, i maładziejšyja za 5 hadoŭ, a taksama hibrydy i elektramabili adrazu nakiroŭvajuć sa Štataŭ u Hruziju.
Praz heta ich dastaŭka stała daražejšaj pryblizna na 1500— 2000 dalaraŭ u paraŭnańni z dastaŭkaj praz Kłajpiedu. Razam z tym pavialičvajecca i termin dastaŭki. Praz Hruziju mašyny jeduć na 1-1,5 miesiaca daŭžej, čym heta było praź Litvu.
Ciapier čytajuć
Połk Kalinoŭskaha paviedamiŭ pra hibiel troch bajcoŭ3
Kamientary