Jeŭrakamisar pa pytańniach biaśpieki i abarony zaklikaŭ Zachad rychtavacca da napadu Rasii
Litoŭski jeŭraparłamientaryj Andrus Kubilus, prapanavany na pasadu jeŭrakamisara pa pytańniach biaśpieki, abaronnaj pramysłovaści i kosmasu, u svaim intervju ŭpłyvovamu finansavamu vydańniu Financial Times zajaviŭ, što Zachodniaja Jeŭropa pavinna padrychtavacca da mahčymaha napadu Rasii, piša Delfi.lt.
Palityk zaklikaŭ krainy nazapašvać bojeprypasy i zapasy, zajaviŭšy, što heta lepšy sposab pašyryć zbrojevuju pramysłovaść błoka i padrychtavać jaje da vajny, jakuju možna čakać u bližejšyja niekalki hadoŭ.
«Čamu my nie kirujemsia kryteryjem vajennaj biaśpieki, zhodna ź jakim my pavinny nazapašvać u krainie peŭnuju kolkaść artyleryjskich snaradaŭ abo inšaj pradukcyi, takoj jak vybuchoŭka?»— raspavioŭ vydańniu deputat Jeŭraparłamienta.
Svaju ideju Kubilus pryraŭniaŭ da Pahadnieńnia ab pryrodnym hazie, zhodna ź jakim krainy pavinny nazapašvać resursy i dzialicca imi z susiednimi krainami, jakija zaznajuć deficyt hazu. «Heta pavyšaje biaśpieku dziaržaŭ-členaŭ i adnačasova stvaraje pastajanny popyt na vytvorčaść, što źjaŭlajecca samaj vialikaj prablemaj dla abaronnaj pramysłovaści. U halinie nie chapaje stabilnych doŭhaterminovych vytvorčych zakazaŭ», — zajaviŭ A.Kubilus.
Staršynia JEK Ursuła fon der Lajen u aŭtorak pradstaviła novy skład JEK i napramki palityki ci «partfieli», jakimi jana paprosić kiravać na praciahu nastupnych piaci hadoŭ. Deputat Jeŭraparłamienta ad Litvy Andrus Kubilus atrymaŭ partfiel jeŭrakamisara ŭ pytańniach abarony i kosmasu.
Kamientary
Jaki napad moža ździeśnić Rasija na krainy NATA, kali jana va Ukrainie asablivych pośpiechaŭ za 2.5 hady tak i nie dasiahnuła?