Daktary dzielacca z «Našaj Nivaj» svaimi nazirańniami: sioleta vypadkaŭ zachvorvańniaŭ na Covid-19 značna bolš, čym było ŭ anałahičny pieryjad minułaha hoda.
Letam stała šmat pacyjentaŭ ź pnieŭmanijaj, što nie charakterna dla hetaha času
Hetym letam u balnicy traplała šmat ludziej ź pnieŭmanijaj.
«Pa nazirańniach, pik pačaŭsia ŭ žniŭni. Zvyčajna spačatku ludzi skardziacca na ahulnaje niedamahańnie, kašal, tempieraturu kala 38, jakaja nie spadaje ciaham 3-5 dzion. U niekatorych prajaŭlajucca vanity i młosnaść», — tłumačyć doktar, jaki pracuje ŭ balnicy.
Pa słovach daktaroŭ, testy daloka nie zaŭsiody vyznačajuć, što ŭ čałavieka mienavita kavid, ale pa ŭsich simptomach vidać, što heta jon.
Taksama surazmoŭca adznačaje, što takaja kolkaść pnieŭmanij, jakaja nazirałasia hetym letam, nie charakternaja dla hetaha pieryjadu.
«Da kavidu ciapier u pryncypie staviacca jak da hrypu. U vypadkach, kali test nie paćviardžaje dyjahnaz, pacyjentam staviać dyjahnaz hryp. Ciapier ahułam staŭleńnie da kavidu nie takoje, jak było 2-3 hady tamu, bo ŭsie razumiejuć, što jon nikudy ŭžo ad nas nie dzieniecca».
Niahledziačy na toje, što kolkaść zachvorvańniaŭ ź pnieŭmanijaj vialikaja, doktar adznačaje, što śmiarotnaść, na ščaście, ad ciapierašnich štamaŭ nizkaja. Ale virulentnaść u ich vielmi vysokaja, niaredka ŭ siemjach chvarejuć adrazu pa niekalki čałaviek.
«Taksama možna adznačyć, što kali raniej dzieci chvareli na kavid značna radziej, to ciapier adnolkava šmat vypadkaŭ jak siarod darosłych, tak i siarod dziaciej».
Doktar z palikliniki taksama paćviardžaje, što niedzie z druhoj pałovy leta pačaŭ naziracca rost zachvorvańniaŭ. Ale pakolki masavaje testavańnie ŭžo nie praktykujuć, vyznačyć realnuju kolkaść chvorych na kavid niemahčyma.
Siarod tych, chto chvareŭ na pnieŭmaniju, byli i publičnyja ludzi. Naprykład, śpiavak Ivan Zdaniuk u žniŭni raskazvaŭ u sacsietkach, jak u apošnija dni adpačynku ŭ Turcyi ŭ jaho trymałasia tempieratura 39,7. Stan Ivana byŭ taki, što ŭ minskim aeraporcie jaho čakała mašyna chutkaj dapamohi. Pierad vystupleńniem u Lidzie na śviacie horada daktary zrabili jamu ŭkoł, kab atrymałasia vyjści na scenu. Amal adrazu paśla kancerta śpievaka zabrali ŭ balnicu ź pnieŭmanijaj.
Na pnieŭmaniju skardziłasia taksama papularnaja biełaruskaja błohierka, zasnavalnica ŭłasnaj kliniki žanočaha zdaroŭja ŭ Minsku F-clinic Natalla Fiedziukovič. Jana pakazvała ŭ sacsietkach, jak u pierapynkach pamiž klijentkami dychaje kisłarodam.
Aficyjnaja infarmacyja ad Minzdaroŭja
Pra rost zachvorvańniaŭ na kavid zhadvajuć i na aficyjnym uzroŭni. Zahadčyk adździaleńnia imunaprafiłaktyki Respublikanskaha centra hihijeny, epidemijałohii i hramadskaha zdaroŭja Kirył Ihnataŭ zajaviŭ, što ŭ krainie adznačajecca pavieličeńnie kolkaści vypadkaŭ zachvorvańnia Covid-19. Ihnataŭ źviazaŭ heta z nadychodam vosieńskaha siezonu.
A što ŭ susiedziaŭ?
Padobnyja tendencyi nazirajucca i ŭ susiednich krainach. Tak, naprykład, naprykancy žniŭnia hałoŭny sanitarny inśpiektar Polščy Pavieł Hžaščeŭski vystupiŭ z paradami viartacca da praktyki našeńnia masak. Takija zajavy jon abhruntavaŭ tym, što ŭ krainie nazirajecca imklivy rost zachvorvańniaŭ na kavid.
Zhodna sa spravazdačami Ministerstva zdaroŭja Polščy, rost zaražeńnia pačaŭsia ŭ lipieni, kali fiksavałasia kala 60 vypadkaŭ na dzień. Da kanca lipienia ich kolkaść pavialičyłasia da bolš čym 200, a ŭ žniŭni dasiahnuła bolš za 400.
Rost zachvorvańniaŭ na Covid-19 taksama adznačajuć i ŭ Litvie.
Ciapier čytajuć
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi55
Kamientary
Simptomy: spačatku vielmi mocna dzieryć horła, potym słabaść, tempieratura, "sabačy" kašal. Amal miesiac spatrebiłasia na lačeńnie...