Ihar Tur z žonkaj pasialiŭsia ŭ łukašenkaŭskim ekśpierymientalnym pasiołku. Kab mietr jamu abyšoŭsia tańniej, usie kamunikacyi apłacili ź biudžetu
My vyśvietlili, dzie žyvie siamja prapahandysta i što heta za paciomkinskaja vioska, ahladać jakuju pryjazdžaŭ asabista Łukašenka.
Siamja prapahandysta z ANT Ihara Tura — jon sam, žonka Ksienija i dvoje dziaciej — hetym letam pierasialiłasia ź Minska ŭ pryvatny dom pad stalicaj. Z taho času Tur i jaho žonka rehularna demanstrujuć u sacsietkach, jak abžyvajuć novaje žyllo — spačatku jany pachvalilisia darahoj kuchniaj, niadaŭna pakazali dziciačy pakoj.
Raniej było nieviadoma, dzie dakładna pasialiłasia siamja Turaŭ, tolki toje, što ich dačka pajšła ŭ škołu ŭ Astrašyckim Haradku — tuju samuju, dzie kaliści vučyŭsia Kola Łukašenka.
Fasad doma ni razu nie traplaŭ u kadr, ale pa detalach interjeraŭ, architekturnych elemientach i pa krajavidach, jakija adkryvajucca z akon doma, nam udałosia vyznačyć jaho miescaznachodžańnie.
Ihar Tur ź siamjoj pasialiŭsia ŭ ekśpierymientalnym pasiołku Novaja Akolica ŭ Astrašyckaharadockim sielsaviecie, na Druhoj minskaj kalcavoj darozie, pobač z Raŭbičami.
Hety pasiołak u dziaržaŭnych vydańniaŭ prezientavaŭsia jak piłotny prajekt, jaki musiŭ zakryć patrebu miascovych žycharoŭ u žylli. Budavać biez ahladki na zakony i normy jaho zahadaŭ Łukašenka, płanujučy pašyryć praktyku na ŭsiu krainu.
Jak my vyličyli miesca, dzie žyvie prapahandyst Tur
Naša ŭvaha adrazu spyniłasia na pasiołku Novaja Akolica. Na kadrach ź interjeru, jakija pakazvali Tur i jaho žonka, za voknami byli bačnyja frahmienty damoŭ z adnolkavym architekturnym afarmleńniem — što zusim nie charakterna dla typovaj katedžnaj zabudovy, dzie panuje poŭny raznaboj stylaŭ, materyjałaŭ i koleraŭ.
U miežach sielsavieta z centram u Astrašyckim Haradku jość niašmat miescaŭ, dzie ŭzvodzili cełyja kvartały pa adzinym prajekcie. Heta značna zvuziła koła pošuku faktyčna da adnoj Novaj Akolicy, jakaja na słychu z 2023 hoda, kali raptoŭna ŭsie daviedalisia, što jana ŭžo budujecca.
Asnoŭnaj padkazkaj dla vyznačeńnia kankretnaha doma stali vokny. T-padobnaja raźbiŭka francuzskich akon z hłuchoj nižniaj častkaj, jak u domie siamji Tura, sustrakajecca tut tolki ŭ damach, pabudavanych pa prajekcie «Brestžyłbuda». Ale i hetaha było niedastatkova: kampanija ŭźviała bolš za paŭtuzina padobnych damoŭ na Jubilejnaj vulicy, pryčym u dvuch varyjantach — ź pierapadzistym schilnym dacham i z płoskim.
Detali z kadraŭ unutry doma dazvolili zvuzić pošuk jašče bolš. U dziciačym pakoi za aknom bačny nievialiki łapik ź jełak i biaroz, za jakim — adkrytaja placoŭka i siłuety dvuchpaviarchovych čorna-biełych damoŭ udalečyni. Pry hetym tyja damy raźmieščanyja nie prosta nasuprać, a, vidavočna, pad inšym vuhłom.
Na kuchni, za biełaj zanavieskaj, jakaja zakryvaje vialikaje akno, možna zaŭvažyć jašče adzin dom — adnapaviarchovy, sa schilnym dacham, što znachodzicca značna bližej. Ale jon taksama raźmieščany pad inšym vuhłom, čym dom Tura.
Dva dadatkovyja bakavyja vokny kuchni ź vidam na dziciačuju horku dazvolili dakładna zvuzić vybar. Na płanach damoŭ «Brestžyłbuda» tolki ŭ varyjancie sa schilnym dacham na hetaj ścianie zaprajektavany dva akny, a nie adno vuzkaje, jak u varyjancie z płoskim dacham. Takim čynam, zastalisia tolki try mahčymyja damy.
Supastaŭleńnie płaniroŭki, vidaŭ z voknaŭ i spadarožnikavych zdymkaŭ Novaj Akolicy dazvoliła vyznačyć kankretny budynak. Usie prykmiety supali z domam pa adrasie vuł. Jubilejnaja, 37 — na rahu z Narodnaj vulicaj.
Jak i na kadrach ź dziciačaha pakoja, za jaho zadnim fasadam prachodzić vuzkaja pałasa dreŭ, za jakoj adkryvajecca pustaja placoŭka budučaha skviera, a jašče dalej — šerah dvuchpaviarchovych damoŭ z čorna-biełymi fasadami.
Novaja Akolica — što heta za rajon?
Pra novy žyły rajon u vioscy Akolica Minskaha rajona, ciapier viadomy jak Novaja Akolica, stała viadoma ŭ červieni 2023 hoda, kali Alaksandr Łukašenka raskazaŭ, što było vyrašana pabudavać viosku i što hetuju spravu daručyli Anatolu Sivaku.
U Biełarusi amal kožny prablemny abjekt — ad zakinutych budoŭlaŭ da pustych biznes-centraŭ u centry Minska — pačynaŭsia z asabistaha dazvołu i pratekcyi Łukašenki.
Ekśpierymientalny pasiołak u Akolicy pačaŭsia z tych ža hrablaŭ: Łukašenka daŭ Sivaku poŭny kart-błanš, zajaviŭšy, što toj moža «choć palcam na piasku» čarcić — buduć tak i budavać.
«Treba pabudavać chutka i efiektyŭna pryhožuju viosku — ludzi z zadavalnieńniem tam buduć žyć, kupiać hetyja ŭčastki», — zajaŭlaŭ tady Łukašenka.
Užo ŭ žniŭni 2023 hoda tahačasny ministr architektury i budaŭnictva Rusłan Parchamovič paviedamiŭ, što pačalisia raboty pa ŭźviadzieńni novaha žyłoha rajona — Novaja Akolica.
U toj ža čas hiendyrektar «Brestžyłbuda» Alaksandr Ramaniuk raspavioŭ, što kampanija praviała madernizacyju svajoj vytvorčaści, kab pierajści ad typovych šmatpaviarchovak da budaŭnictva małapaviarchovych damoŭ. U Novaj Akolicy pradpryjemstva płanavała pabudavać dziesiać adnakvaternych damoŭ.
Pavodle aficyjnaj viersii, hetyja damy pavinny byli stać arendnym žyllom dla vajskoŭcaŭ. I heta vyhladała łahična — pasiołak uzvodzicca na terytoryi byłoha palihona pry vajskovaj čaści №3310, dzie bazujecca 2‑ia asobnaja śpiecyjalnaja milicejskaja bryhada Unutranych vojskaŭ.
Adnak u vyniku ŭ adnym z damoŭ, pabudavanych «Brestžyłbudam», pasialiŭsia zusim nie vajskoviec, a bajec infarmacyjnaha frontu — prapahandyst Ihar Tur.
Łukašenkaŭskija ahledziny
Litaralna praz dva miesiacy — 27 kastryčnika 2023 hoda — u Novuju Akolicu pryvieźli Alaksandra Łukašenku, kab pakazać jamu pieršuju hatovuju vulicu — Jubilejnuju, dzie ŭžo stajała bolš za dziasiatak damoŭ.
Da budaŭnictva «ŭzornaha» rajona pryciahnuli dvanaccać budaŭničych arhanizacyj ź Minskaj vobłaści, a taksama pradpryjemstvy Ministerstva architektury i budaŭnictva i rehijanalnyja struktury ź inšych abłaściej.
Heta była kłasičnaja aŭralnaja budoŭla, dobra znajomaja Parchamoviču jašče z časoŭ pracy ŭ Mahiloŭskaj vobłaści, dzie padobnaj usiebiełaruskaj tałakoj razbudoŭvali małuju radzimu Łukašenki.
Łukašenka zahadaŭ budavać «pa-haspadarsku» — to-bok biez ahladki na zakanadaŭstva i narmatyvy, jakija, pavodle słoŭ čynoŭnikaŭ, abciažarvajuć i zaciahvajuć budaŭnictva, robiać žyllo daražejšym.
«Kali jość daručeńnie prezidenta, biurakratyju možna za siekundu likvidavać», — prakamientavaŭ tady zahad Łukašenki Ihar Tur.
Dziaržaŭnaja sistema sama sabie dała ziamlu ŭ prynadnym miescy, sama sabie dazvoliła zapluščyć vočy na ŭłasnyja ŭzhadnieńni, sama ž i pradaje hatovyja damy – idealnyja pazakankurentnyja umovy dla dziaržaŭnych zabudoŭščykaŭ.
Pry hetym ideja nie była novaj — prykładna pa tym ža pryncypie dziesiacihodździami ŭzvodzili ahraharadki. Tolki ciapier prajekt zrabili «pryvabnym»: nie ŭ hłybincy, a ŭ prystaličnaj zonie, dzie ziamla i biez taho darahaja.
Novaja Akolica adroźnivajecca vyhodnym raźmiaščeńniem — siudy nie treba było zavablivać žycharoŭ, bo pobač daŭno raście darahaja katedžnaja zabudova. Damy ŭ Novaj Akolicy atrymali krychu asučaśnieny dyzajn, z čorna-biełymi fasadami i imitacyjaj mietaličnym sajdynham dreva, pazbylisia niepatrebnaha cokalu i dziesiaci prystupak pierad uvachodam, ale adčuvańnie tannaj kazionnaj kandovaści hetaj zabudovy pieramahčy nie ŭdałosia.
Vulicu da pryjezdu Łukašenki, jak heta zvyčajna byvaje z «prezidenckimi prajektami», davodzili da ładu ŭ śpiešcy. Heta bačna navat pa drobiaziach: na prezientacyjnych płanšetach — hrubyja pamyłki druku, a da darožak nie paśpieli vykłaści kišeni dla parkoŭki mašyn.
Ale dla miascovych budaŭnikoŭ heta nie prablema: u krainie, dzie pracoŭnaja siła tannaja, darožku možna pierakłaści i dvojčy, i trojčy. Łukašenka zastaŭsia zadavoleny, a heta, jak viedaje kožny čynoŭnik, važniej za ŭsio astatniaje.
Cikava, što repartaž pra Novuju Akolicu na telekanale ANT rabiŭ mienavita Ihar Tur. «Chutka niekatoryja žurnalisty mocna paškadavali, što havorka pra časovaje karystańnie, a nie paŭnapraŭnaje vałodańnie», — kazaŭ jon u efiry.
U kancy siužeta Tur paviedamiŭ, što šerah dziaržaŭnych orhanaŭ nibyta ŭžo vykazali žadańnie nabyć damy ŭ Akolicy jak arendnaje žyllo dla svaich supracoŭnikaŭ. Ci nie staŭ adnym z takich ščaślivych arandataraŭ sam prapahandyst?
Tym časam hramadskaje abmierkavańnie hienieralnaha płana Akolicy, bieź jakoha farmalna nielha było pačynać maštabnaje budaŭnictva, adbyłosia ŭžo paśla taho, jak pieršaja vulica była całkam vybudavana. Praviali jaho tradycyjna ŭ «zručny» čas — z 18 śniežnia pa 1 studzienia, kali bolšaść ludziej zaniataja padrychtoŭkaj da śviataŭ i naŭrad ci sočyć za sajtami dziaržaŭnych orhanaŭ.
Što prapanoŭvajuć
Pavodle hienieralnaha płana zabudovy, Novaja Akolica achoplivaje kala 210 hiektaraŭ ziamli, dałučanaj da vioski Akolica. Zaraz pačali asvojvać kala 50 hiektaraŭ, dzie płanujecca ŭźvieści 228 indyvidualnych damoŭ u dvanaccać etapaŭ. Pieršyja dva etapy praduhledžvali paralelnaje prajektavańnie i budaŭnictva 65 damoŭ.
Što da sacyjalnaj infrastruktury, to ŭ Akolicy pabudujuć dziciačy sad na 150 miescaŭ, škołu na 720 miescaŭ, ambułatoryju na 60 naviedvańniaŭ u źmienu. Novyja abjekty raźmieściać bližej da novaj zabudovy.
Pa asabistym zahadzie Łukašenki darohi ŭ pasiołku zrabili ź bietonu, a nie z asfaltu. Unutranyja vulicy majuć adnabakovy ruch, a ruch hruzavoha i techničnaha transpartu dazvoleny tolki pa ŭskrainach.
Usiaho ŭ pasiołku pradstaŭleny 19 typaŭ damoŭ roznaj architektury i płaniroŭki. Usie jany padklučanyja da vodapravodu, kanalizacyi i elektraaciapleńnia, a košt kvadratnaha mietra pačynajecca ad 2400 rubloŭ — prykładna 705 dalaraŭ.
Adnak «uzorny» prajekt maje i niehatyŭnyja baki. Typavyja damy nie praduhledžvajuć padvałaŭ, u ich niama haražoŭ ci haspadarčych pabudoŭ, dzie možna było b zachoŭvać invientar. Adsutničajuć i aharodžy — amal jak u amierykanskich pryharadach-suburbijach.
Pry hetym ziamla pad damami aficyjna nazyvajecca «ziamloj ahulnaha karystańnia», što razam ź finansavańniem infrastruktury ź dziaržaŭnaha biudžetu istotna źnižaje sabiekošt kvadratnaha mietra.
Inšymi słovami, padatki adnych biełarusaŭ pajšli na toje, kab vybranyja inšyja — jak ščaślivyja navasioły kštałtu Ihara Tura — atrymali biaspłatna vodapravod, kanalizacyju i elektrasietki ŭ čystym poli, dzie pabudavali novy rajon.
Dom, u jakim pasialiŭsia Ihar Tur, maje ŭ płanie prybliznyja pamiery 10 na 10 mietraŭ. Unutranaja płaniroŭka standartnaja dla typavych damoŭ: dźvie vialikija spalni pa pravy bok (pieršaja baćkoŭskaja, druhaja — dziciačaja) i adna mienšaja ŭ dalnim kancy, pa levy bok — prastornaja haścinaja, abjadnanaja z kuchniaj, asobna vyviedzieny vanny pakoj i tualet, a z tambura pry ŭvachodzie možna trapić u kacielniu.
Dla «Brestžyłbuda» prajekt nie navatarski, abodva varyjanty adnapaviarchovych panelnych damoŭ užo byli realizavanyja ŭ Žabincy i Małych Matykałach Bresckaha rajona, praŭda, biez takich śmiełych rašeńniaŭ, jak vokny da padłohi.
Kolki kaštuje
Ahulnaja płošča doma składaje kala 100 kvadratnych mietraŭ. Pavodle danych z prezientacyjnaha płanšeta, košt adnaho kvadratnaha mietra składaje 2500 rubloŭ (705 dalaraŭ), tamu ahulnaja cana doma — kala 250 tysiač rubloŭ, abo kala 75 tysiač dalaraŭ.
Dom takoj ža płoščy i cany pakazvali i Łukašenku. Amal usie varyjanty, niezaležna ad materyjałaŭ i składanaści budaŭnictva, jakija pakazvali na stendach Łukašenku, mieli canu kvadratnaha mietra blizkuju da 2500 rubloŭ.
Dla paraŭnańnia: niezabudavany ŭčastak płoščaj 15 sotak na ŭskrajku samoj vioski Akolica kaštuje kala 120 tysiač dalaraŭ.
Dziaržaŭnaja hazieta «Minskaja praŭda» zapeŭnivała, što damy ŭ Novaj Akolicy pryznačanyja dla tych, chto žyvie ŭ Minskim rajonie i maje patrebu ŭ palapšeńni žyllovych umovaŭ, nibyta z mahčymaściu zasialicca adrazu i vypłačvać kredyt na lhotnych umovach. Ale realnych paćviardžeńniaŭ hetaj infarmacyi niama.
Tolki ŭletku 2025 hoda na prodaž vystavili pieršyja damy ź pieršaj čarhi zabudovy Novaj Akolicy.
Pieršy dom — pa adrasie vuł. Jubilejnaja, 38, prosta praz darohu ad doma Ihara Tura. Płošča doma, uźviedzienaha pavodle prajekta Homielskaha DBK — 93 kvadratnyja mietry, učastak — 7 sotak. Pačatkovaja cana — 285 tysiač rubloŭ (prykładna 95 tysiač dalaraŭ) abo kala 1000 dalaraŭ za kvadrat.
Na stendzie, pakazanym Łukašenku ŭ 2023 hodzie, hety ž dom aceńvaŭsia ŭsiaho ŭ 235 tysiač rubloŭ (kala 70 tysiač dalaraŭ), z raźlikam 2437 rubloŭ za kvadrat (prykładna 715 dalaraŭ).
Nastupny — raźmieščany adrazu za hetym dom pa adrasie vuł. Narodnaja, 1. Taksama adnapaviarchovy panelny dom, ale ŭžo pa prajekcie Salihorskaha DBK. Jaho płošča składaje 129 m², učastka — 8 sotak. Pačatkovaja cana — 365 tysiač rubloŭ (kala 123 tysiač dalaraŭ), abo 950 dalaraŭ za kvadrat.
Na stendzie 2023 hoda taki dom aceńvaŭsia ŭ 327 tysiač rubloŭ (kala 96 tysiač dalaraŭ) — 2500 rubloŭ za mietr (kala 750 dalaraŭ).
Takim čynam, za dva hady cana damoŭ vyrasła amal na tracinu — i heta jašče da pačatku tarhoŭ, jakija zvyčajna tolki pavyšajuć canu. Chacia tarhi byli pryznačanyja na 11 lipienia 2025, abodva łoty ŭsio jašče nie pradadzienyja. Bolš nijakija damy z Novaj Akolicy na prodaž publična nie vystaŭlalisia.
Ci jość choć niejkija susiedzi ŭ Ihara Tura i jakim čynam jany atrymali sabie katedžy, pakul nieviadoma.
«Naša Niva» — bastyjon biełaruščyny
PADTRYMAĆŽonka Ihara Tura pakazała interjery siamiejnaha doma kala Astrašyckaha Haradka FOTY
Łukašenka žyvie ŭ sapraŭdnym mahnackim pałacy
Prapahandyst Ihar Tur vyrašyŭ pierasialicca bližej da Astrašyckaha Haradka
Ihar Tur patraciŭ minimum 30 tysiač na premijalnuju kuchniu FOTA
Pad Minskam chočuć stvaryć muziej kryžoŭ pad adkrytym niebam. Znajšłosia miesca i dla vusataj baby
U Akolicy pad Minskam adšukali mahiłu nastaŭnika Janki Kupały
Ciapier čytajuć
«Čaho ź ludziej ździekujeciesia?!» Łukašenka zahadaŭ prybrać maršrutki44
Kamientary
A Hrišunia, hovoriat, upotrieblajet silno.