Što saboj ujaŭlaje «Chiezbała», suprać jakoj pačaŭ naziemnuju apieracyju Izrail? Kolki ŭ jaje zastałosia bajevikoŭ?
Livanskaja isłamisckaja hrupoŭka «Chiezbała» da niadaŭnich časoŭ ličyłasia najbujniejšaj niedziaržaŭnaj vajskovaj arhanizacyjaj u śviecie, ale Izrail zdoleŭ jaje istotna asłabić i źniščyć amal usio jaje vyšejšaje kiraŭnictva. Jakija ciapier suadnosiny sił u kanflikcie?
«Chiezbała» (ad arab. «Partyja Ałacha») — livanskaja radykalnaja vajenizavanaja isłamisckaja hrupoŭka. Adnačasova źjaŭlajecca palityčnaj partyjaj ź miescami va ŭradzie i ŭ parłamiencie Livana. U mnohich krainach śvietu «Chiezbału» pryznali terarystyčnaj arhanizacyjaj (Biełaruś nie ličyć jaje takoj, a Rasija, Kitaj i Iran uvohule nazyvajuć hrupoŭku paŭnapraŭnaj palityčnaj siłaj). Kolkaść udzielnikaŭ i prychilnikaŭ «Chiezbały» składaje dziasiatki tysiač čałaviek nie tolki ŭ Livanie, ale i va ŭsim śviecie.
U płanie finansaŭ, resursaŭ i vajskovaj padrychtoŭki hrupoŭka amal całkam zaležyć ad Irana, jakomu dała aficyjnuju klatvu viernaści. Mocnaja suviaź pamiž Iranam i «Chiezbałoj» padmacoŭvajecca jašče i tym faktam, što pamiž imi praktyčna niama nijakich hieahrafičnych i palityčnych pieraškod. Iran moža spakojna i ŭ luboj kolkaści pastaŭlać resursy «Chiezbale» napramuju praź siabroŭskija Irak i Siryju, dzie isnuje vialikaja kolkaść prairanskich vajenizavanych hrupovak.
«Chiezbała» ŭźnikła ŭ ahni livanskaj hramadzianskaj vajny 1970-1990-ych u jakaści adkazu na pieršaje ŭvarvańnie Izraila ŭ Livan i z tych časoŭ aficyjna maje metu tatalnaha źniščeńnia jaŭrejskaj dziaržavy.
Izrail uryvaŭsia na terytoryju Livana dvojčy. Pieršy raz — u 1982 hodzie, kali Izrail vajavaŭ suprać Arhanizacyi vyzvaleńnia Paleściny i padčas kampanii zachapiŭ livanskuju stalicu Biejrut razam z poŭdniem krainy. Izrailskaja armija kančatkova syšła ź Livana tolki ŭ 2000 hodzie, a zatym praz 7 hadoŭ paŭtaryła ŭvarvańnie ŭžo suprać «Chiezbały», jakoje skončyłasia dziakujučy ŭmiašalnictvu AAN.
Livanskaja «Chiezbała» ŭjaŭlaje saboj paŭnavartasnuju armiju z roznymi rodami vojskaŭ. «Chiezbała» maje dobra abstalavanuju piachotu, tanki, BMP, RSZA, sistemy SPA, tysiačy bieśpiłotnikaŭ i balistyčnych rakiet. Kolkaść bajevikoŭ u «Chiezbały», pa słovach kiraŭnictva hrupoŭki, jašče ŭ minułym hodzie składała bolš za 100 tysiač čałaviek. Acenki zachodnich vyviedak nakont žyvoj siły «Chiezbały» byli našmat ściplejšymi: da 45 tysiač čałaviek.
Pry hetym za apošnija miesiacy Izrail zdoleŭ zabić ci paranić niekalki tysiač bajevikoŭ šlacham masavych padryvaŭ pejdžaraŭ i inšych pryład u Livanie, a taksama niejtralizavać amal usio kiraŭnictva «Chiezbały» (nižejšaha, siaredniaha i vyšejšaha źvieńniaŭ), uklučna ź jaje hałoŭnym lidaram Chasanam Nasrałoj. U dadatak da hetaha Izrail pry dapamozie avijacyi aktyŭna vyniščaje rakietnyja mahčymaści hrupoŭki, jaje składy z uzbrajeńniami i anhary z technikaj.
Izrail — adna z najbolš uzbrojenych krain na Blizkim Uschodzie. Armija abarony krainy pad nazvaj CACHAŁ doŭhi čas padtrymlivajecca Złučanymi Štatami i tolki ŭ minułym hodzie była prafinansavanaja amierykanskim biudžetam na amal $4 miljardy, ź jakich $500 miljonaŭ pajšli na technałohii supraćrakietnaj abarony Izraila. Sama kraina vydatkoŭvaje na patreby armii kala 4,5% VUP, što źjaŭlajecca 10-m pakazčykam u śviecie.
Pavodle źviestak Mižnarodnaha instytuta stratehičnych daśledavańniaŭ (IIS) na pačatak 2023 hoda ŭ Izraili naličvałasia 169 tysiač aktyŭnych vajskoŭcaŭ u armii, na fłocie i ŭ vajenizavanych farmiravańniach. Jašče 465 tysiač składajuć jaho reziervovyja siły, a 8 tysiač źjaŭlajucca častkaj jaho vajenizavanych farmiravańniaŭ.
U CACHAŁ na momant minułaha hoda było bolš za 2200 tankaŭ, 530 adzinak artyleryi i RSZA, 339 sučasnych źniščalnikaŭ, 142 viertaloty i 54 karabli, uklučajučy 5 padvodnych łodak.
Ciapier čytajuć
Biełaruski IT-miljarder Hurski: Maju pieršuju žonku zabiŭ hiembler2
Kamientary