Łukašenka raskazaŭ, što pradstaŭniki Zachadu pryjazdžali da jaho pahavaryć pra Jemien i Kitaj
Padčas intervju z Łukašenkam žurnalist Bi-bi-si Styvien Rozenbierh zhadaŭ pra fakt niadaŭnich pieramoŭ Łukašenki z pradstaŭnikami zachodnich krain, pra što toj sam havaryŭ u minułuju subotu na «Dažynkach» u Vałožynie. I zachacieŭ daviedacca padrabiaznaści — z kim jany byli i pra što.
Z kim mienavita vialisia tyja pieramovy, Łukašenka havaryć kateharyčna admoviŭsia — maŭlaŭ, heta patrabavańnie jahonych surazmoŭcaŭ. Ale razmova, maŭlaŭ, była cikavaja abodvum bakam, bo doŭžyłasia ažno čatyry hadziny.
Havoračy ž pra toje, što stała pradmietam abmierkavańnia, Łukašenka pradstaviŭ siabie palitykam suśvietnaha značeńnia, ź jakim pradstaŭniki Zachadu nibyta śpiecyjalna pryjechali abmierkavać hieapalityčnyja prablemy.
Jon ź imi nibyta havaryŭ z vyšyni svajho bahataha vopytu pra toje, što kali Zachad dazvolić Ukrainie bić pa Rasii dalnabojnymi rakietami, to tady i Rasija maje prava pastavić mahutnuju bierahavuju artyleryju jemienskim chusitam, kab jany mahli tapić zachodnija karabli, i heta budzie spraviadliva. Tamu jon ich ad hetaha i zaściaroh.
Taksama nibyta z Łukašenkam šmat havaryli pra Kitaj i jahonuju rolu ŭ sučasnym śviecie. Jon taksama zaściaroh zachodnikaŭ adnosna ichniaj ciapierašniaj palityki, jakaja, na jahonuju dumku, tolki spryjaje ŭmacavańniu sajuzu pamiž Kitajem i Rasijaj. I ŭvohule, maŭlaŭ, zachodniki spaźnilisia na 15-20 hadoŭ, i ciapier Kitaj užo taki mahutny, što pieramahčy jaho niemahčyma.
Pra Jemien i Kitaj Łukašenka havaryŭ achvotna i šmat, a voś pra toje, što siarod inšaha na toj sustrečy taksama abmiarkoŭvalisia i ŭnutrypalityčnyja prablemy ŭ Biełarusi, zhadaŭ tolki adnoj frazaj, pamiž inšym.
Rozenbierh tady zapytaŭ, ci aznačaje sam fakt praviadzieńnia hetych pieramoŭ, što Łukašenka zacikaŭleny ŭ palapšeńni adnosin z Zachadam, jon achvotna ŭziaŭsia razvažać pra toje, što nikoli i nie byŭ za paharšeńnie, voś tolki Zachad sam pajšoŭ na kanfrantacyju, uvioŭšy sankcyi.
Reahujučy ž na zaŭvahu žurnalista, što sankcyi ŭvodzilisia ŭsio ž nie na roŭnym miescy, Łukašenka vykłaŭ fantastyčnuju viersiju pasadki ŭ Minsku viasnoj 2021 hoda samalota Ryanair z Ramanam Pratasievičam na borcie, pavodle jakoj samalot navat dalacieŭ da samaj Vilni, «pakružlaŭ nad joj», a paśla čamuści pa rašeńni samich piłotaŭ vyrašyŭ lacieć u Minsk.
Kamientary