Nie tolki Nacbank. Uzłamany respublikanski partał elektronnych rachunkaŭ-faktur
Pavodle praŭkrainskich chakieraŭ, u hetyja dni adbyvajecca masavaja ataka na mnohija dziaržaŭnyja i pryvatnyja struktury Biełarusi. Ataka ŭžo zakranuła Nacyjanalny bank i Ministerstva pa padatkach i zborach.
Praŭkrainskaja chakierskaja hrupoŭka DumpForums paviedamiła ab uzłomie respublikanskaha partała «Elektronnyja rachunki-faktury» (ERF), jaki dazvalaje afarmlać, apracoŭvać, zachoŭvać i adpraŭlać rachunki-faktury ŭsim płacielščykam padatku na dabaŭlenuju vartaść. Partał źjaŭlajecca aficyjnym resursam Ministerstva pa padatkach i zborach Biełarusi.
«Siońnia my atakavali i całkam źniščyli infrastrukturu ERF Biełarusi. Naša kamanda praviała apieracyju pa vydaleńni krytyčnych danych, vyhruzcy baz danych hramadzian, źniščeńni veb-sajtaŭ i kala 300 virtualnych mašyn z unutranaj sietki partała, što paciahnuła za saboj poŭnaje, choć i časovaje, parušeńnie funkcyjanavańnia dziaržaŭnaha servisu.
My ŭzłamali mnohija bujnyja i siarednija kampanii, a taksama dziaržaŭnyja orhany Biełarusi. Hetaj akcyjaj my tolki nahadvajem, što kožny, chto padtrymlivaje ahresiju suprać Ukrainy, nie zmoža zastacca biespakaranym», — napisała hrupoŭka DumpForums 10 listapada.
U toj ža dzień Ministerstva pa padatkach i zborach paviedamiła ab pačatku praviadzieńnia «rehłamientnych rabot» na partale ERF, padčas jakich resurs budzie niedastupny. Termin hetych «rabot», pavodle ministerstva, skončyŭsia jašče 13 listapada.
Jak paviedamili śpiecyjalisty pa kibierbiaśpiecy z rasijskaha servisu Data Leakage & Breach Intelligence (DLBI), praŭkrainskija chakiery z DumpForums užo vykłali na svaim zakrytym forumie niekalki fajłaŭ z unutranych baz danych partała ERF, jakija ŭtrymlivajuć kala 125 tysiač unikalnych zapisaŭ z poŭnymi imionami karystalnikaŭ, ich pasadami, nazvami arhanizacyj, chešavanymi parolami razam z amal 10 tysiačami sapraŭdnych telefonnych numaroŭ.
Taja ž hrupoŭka ŭčora paviedamiła ab maštabnym uzłomie ŭnutranaj sietki Nacyjanalnaha banka Biełarusi, dziakujučy jakomu chakiery atrymali dziasiatki tysiač numaroŭ telefonaŭ, elektronnych pošt, adrasoŭ i poŭnych imionaŭ karystalnikaŭ razam ź inšym masivam techničnaj i sakretnaj infarmacyi banka.
Ciapier čytajuć
«Ja naviedaŭ samuju izalavanuju krainu Jeŭropy». Amierykanski błohier raskazaŭ, jak pryjazdžaŭ u Biełaruś u 2020-m i 2024-m2
Kamientary