Novaja niebiaśpiečnaja taktyka Rasii: razam sa śmiarotnymi dronami jana adnačasova zapuskaje bieśpiłotniki-prynady

Zavod u Rasijskaj asablivaj ekanamičnaj zonie «Ałabuha» niadaŭna pačaŭ vypuskać termabaryčnyja bieśpiłotniki razam z prynadami, paviedamlaje ahienctva Associated Press.

Termabaryčnyja bojehałoŭki stvarajuć vichor vysokaha cisku i tempieratury, jaki moža pranikać skroź toŭstyja ścieny. Jany vysmoktvajuć uvieś kisłarod na svaim šlachu i majuć strašnuju reputacyju z-za traŭmaŭ, jakija nanosiacca navat za miežami pieršapačatkovaha miesca vybuchu: paražeńnie lohkich, vačej, paškodžańnie mozhu.

Hety typ bojeprypasaŭ moža razburyć vielizarny budynak.

Sa słoŭ čałavieka, znajomaha z rasijskaj vytvorčaściu bieśpiłotnikaŭ, Rasija raspracavała płan prynad u kancy 2022 hoda i dała jamu kodavuju nazvu — «Apieracyja «Iłžyvaja cel».

Ideja ŭ tym, kab zapuścić uzbrojenyja drony razam ź dziesiatkami prynad, časam nabitych anučami abo pienapłastam, jakija na radary niemahčyma adroźnić ad tych, što niasuć sapraŭdnyja bomby. Takim čynam, ukrainskija vojski pavinny za doli siekundy prymać rašeńnie ab tym, jak tracić abmiežavanyja resursy, kab vyratavać žyćci i zachavać krytyčna važnuju infrastrukturu.

Termabaryčnyja drony ŭpieršyniu byli vykarystanyja letam. Pa acenkach ukrainskaha ekśpierta pa elektronicy Siarhieja Biaskrestnava, ciapier hetyja drony składajuć ad 3% da 5% usich bieśpiłotnikaŭ, jakija prymianiajucca suprać Ukrainy.

Drony-prynady, jak ličycca, składajuć bolš za pałovu bieśpiłotnikaŭ, jakija zapuskajuć pa Ukrainie. Ale pakolki radar nie moža adroźnić uzbrojeny bieśpiłotnik i dron-pustyšku, Ukraina nie moža dazvolić sabie prapuścić što-niebudź.

Taktyka rasijskich bieśpiłotnikaŭ z časam udaskanalvacca. Ciapier paśla taho, jak bieśpiłotniki zraschodujuć siły SPA, za imi časta iduć bolš mahutnyja rakiety.

Navat drony-prynady mohuć być karysnyja Rasii. Kali na ich kamiera pramoj tranślacyjaj, heta dazvalaje vyznačać miescaznachodžańnie srodkaŭ supraćpavietranaj abarony Ukrainy i pieradavać infarmacyju ŭ Rasiju ŭ apošnija momanty ekspłuatacyi drona.

Sumiesnaja vytvorčaść bieśpiłotnikaŭ — adnych dla dastaŭki bombaŭ, inšych dla adciahnieńnia ŭvahi — ekanomić vajennyja srodki Rasii. Vytvorčaść dronaŭ-prynad pačałasia raniej u hetym hodzie, i ciapier zavod vypuskaje kala 40 bolš tannych niaŭzbrojenych bieśpiłotnikaŭ u dzień i kala 10 uzbrojenych, košt jakich aceńvajecca ŭ 50 000 dalaraŭ, a vytvorčaść zajmaje bolš času, pa słovach čałavieka, znajomaha z rasijskaj vytvorčaściu bieśpiłotnikaŭ.

Ruchaviki i elektronika dla ŭzbrojenych «šachiedaŭ» i dronaŭ-prynad — heta sumieś kitajskaha i zachodniaha impartu, zhodna z frahmientami, jakija Associated Press ubačyła va ŭkrainskaj vajskovaj łabaratoryi. Bieź ich bieśpiłotniki nie zmohuć lotać. Niahledziačy na amal trochhadovyja sankcyi, Maskva ŭsio jašče moža pastaŭlać zapčastki — u asnoŭnym z Kitaja i praz trecija krainy Centralnaj Azii i Blizkaha Uschodu.

• 1
• 0
• 1
• 0
• 1
• 1
• 7
• 0