U Tbilisi apazicyja pierakryła darohu i pastaviła pałatki dla kruhłasutačnaha pratestu
«Kaalicyja za pieramieny» zaklikała ŭsich dałučycca da 24-hadzinnaj akcyi pratestu la budynku Tbiliskaha dziaržaŭnaha ŭniviersiteta, piša «Echo Kavkaza».
Adzin ź lidaraŭ apazicyjnaj kaalicyi Nika Hvaramija zajaviŭ, što pratesnyja «hulańni» čas spynić i varta pierajści da kankretnych dziejańniaŭ — «usio pierakryć» i pačać biesterminovuju akcyju pratestu – i na praśpiekcie Rustavieli, a zatym «pavolna i metanakiravana, spłanavana i mirna» pierakryvacca ŭsie aŭtamahistrali — da pryznačeńnia pieravybaraŭ u Hruzii.
Paralelna na praśpiekcie Rustavieli ŭ Tbilisi prachodzić akcyja «Viarnicie hołas». Mitynh zajavili adnačasova arhanizacyi, jakija viali nazirańnie za hałasavańniem na parłamienckich vybarach, i apazicyjnyja partyi, a taksama studenckija ruchi.
Centrvybarkam Hruzii napiaredadni zaćvierdziŭ vynikovy pratakoł parłamienckich vybaraŭ, jakija prajšli 26 kastryčnika. Ahučanyja ličby paćvierdzili papiarednija vyniki, pavodle jakich kirujučaja partyja «Hruzinskaja mara» zastajecca va ŭładzie na čaćviorty termin zapar.
Z abvieščanymi vynikami nie zhadžajecca nivodnaje z čatyroch apazicyjnych abjadnańniaŭ. Apazicyja patrabuje praviadzieńnia novaha hałasavańnia i mižnarodnaha rasśledavańnia parušeńniaŭ na vybarach 26 kastryčnika, vykazvajučy niedavier śledčym orhanam i sudovaj sistemie.
Kamientary