Ispanija mocna aštrafavała biudžetnyja avijakampanii za patrabavańni dapłačvać za ručnuju pakłažu i vybar miesca

Ispanskaje Ministerstva sacyjalnych pravoŭ i abarony pravoŭ spažyŭcoŭ paviedamiła, što ahulny pamier štrafaŭ dla piaci kampanij składzie 179 młn jeŭra, i ich pryčynaj stali «niepravamiernyja praktyki». Da ich ułady krainy taksama zaličyli admovu prymać najaŭnyja pry kupli kvitkoŭ u aeraporcie.

Samy vialiki štraf — 107,8 młn jeŭra — atrymała irłandskaja kampanija Ryanair, jakaja źjaŭlajecca najbujniejšym łaŭkostaram u Jeŭropie i druhim pa abjomach pieravozak u śviecie. Jana adnoj ź pieršych stała patrabavać dapłatu za ručnuju pakłažu (takaja praktyka pačałasia ŭ listapadzie 2018 hoda).

Vueling pavinna budzie zapłacić 39,3 młn jeŭra, EasyJet — 29,1 młn, Norwegian Air — 1,6 młn, a Volotea — 1,2 młn. Pamier štrafu vyznačany ŭ zaležnaści ad taho, nakolki surjoznymi ŭłady ličać parušeńni i kolki, na ich dumku, avijakampanii zarabili dziakujučy hetym parušeńniam.

Asobna ministerstva adznačyła praktyku Ryanair patrabavać «niepraparcyjnuju» dapłatu za razdrukoŭku pasadačnaha tałona ŭ aeraporcie.

Ułady Ispanii taksama abvinavačvajuć biudžetnyja avijakampanii ŭ tym, što ceny na ich kvitki vyznačajucca pavodle nieprazrystych pryncypaŭ — i heta tyčycca jak sajtaŭ samich pieravozčykaŭ, tak i ich partnioraŭ. Takaja praktyka, adznačyli va ŭradzie, «nie daje spažyŭcam mahčymaści paraŭnać prapanovy» i zrabić infarmavany vybar.

Ispanskaje ministerstva taksama zabaraniła avijakampanijam praciahvać praktyki, za jakija jany byli pakaranyja.

Pieršapačatkova Ispanija abviaściła pra štrafy ŭ mai hetaha hoda, ale avijakampanii abskardzili hetuju pastanovu. Adnak ich apielacyi byli adchilenyja.

Kiraŭnik Ryanair Majkł O'Liry nazvaŭ štrafy «niezakonnymi i nieabhruntavanymi» i zajaviŭ, što ispanskaje ministerstva nakłała ich «z palityčnych pryčyn». Jon taksama adznačyŭ, što raniej sudy Jeŭrasajuza pryznali prava avijakampanij vyznačać ceny i ŭmovy dla klijentaŭ biez umiašańnia ŭradaŭ.

«Hetyja niezakonnyja ispanskija štrafy hruntujucca na starym zakonie 1960-ch hadoŭ, jaki byŭ pryniaty da taho, jak Ispanija ŭvajšła ŭ Jeŭrasajuz. Jany pastaviać kryž na zdolnaści avijakampanij vyznačać bolš nizkija ceny na kvitki za košt skaračeńnia vydatkaŭ», — pryvodzić słovy O'Liry RTE.

Ryanair płanuje nieadkładna abskardzić rašeńnie ispanskaha ministerstva. Płanuje padać apielacyju i EasyJet. Pradstaŭnica avijakampanii patłumačyła, što EasyJet dazvalaje ŭziać na bort u jakaści ručnoj pakłažy nievialikuju torbu biez dapłat, i heta daje pasažyram mahčymaść «płacić tolki za toje, što jany chočuć».

Ispanskaja asacyjacyja avijapieravozčykaŭ ALA taksama vykazała niezadavolenaść rašeńniem ministerstva. Jana płanuje abskardzić zabaronu na dapłaty za ručnuju pakłažu ŭ sudzie. Adnak ispanskaja arhanizacyja pa abaronie pravoŭ spažyŭcoŭ Facua nazvała rašeńnie ministerstva «histaryčnym».

Pavodle danych sajta World Population Review, Ispanija zajmaje druhi radok rejtynhu samych naviedvalnych krain śvietu (na pieršym miescy — Francyja). Pavodle hetych źviestak, u 2024 hodzie Ispanija pryniała amal 84 młn turystaŭ.

• 13
• 0
• 1
• 2
• 0
• 0
• 0
• 1