Stvaralnika «piśmo.beł», palitviaźnia Alaksandra Łykšyna paŭtorna aryštavali. Jon u SIZA

 U hety ž čas pryznali «ekstremisckimi materyjałami» sajt inicyjatyvy «Piśmo.beł», a taksama staronki jaje ŭ sacsietkach. Jašče praź miesiac KDB pryznaŭ inicyjatyvu «ekstremisckim farmavańniem». Pavodle viedamstva, Mazur, Karaniuchin i Łykšyn majuć dačynieńnie da «Piśmo.beł».

Pavodle infarmacyi «Viasny», ciapier mužčyny znachodziacca ŭ SIZA, ich abvinavačvajuć pavodle art. 361-1 Kryminalnaha kodeksa (stvareńnie ekstremisckaha farmavańnia abo ŭdzieł u im).

«Piśmo.bieł» — servis dla adpraŭki listoŭ źniavolenym, jakim karystalisia tysiačy biełarusaŭ. Inicyjatyva ŭ tym liku dapamahała biełarusam zastavacca na suviazi z palitźniavolenymi, niahledziačy na vymušanuju emihracyju. Pry hetym tolki 10% listoŭ sychodziła palitviaźniam, u asnoŭnym servis byŭ raźličany na zvyčajnych asudžanych. Taksama karystalniki prymali ŭmovy resursu — nie parušać patrabavańni MUS i nie adpraŭlać zabaronienuju infarmacyju.

Hod tamu, u listapadzie 2023 hoda, u Žodzinie byli zatrymanyja Ihar Uhlik i Alaksandr Łykšyn, jakija nibyta źjaŭlalisia arhanizatarami servisu.

Siłaviki tady paviedamili, što zmahli atrymać dostup da bazy zakazaŭ, płaciežnych źviestak, asabistych dadzienych karystalnikaŭ i tekstaŭ listoŭ. Ale pa infarmacyi «Viasny», siłaviki nie zmahli atrymać dostup da servisu, a ŭsie asabistyja dadzienyja tych, chto dasyłaje listy, zachoŭvajucca na pošcie. Pa vyniku, u sakaviku 2023 hoda Ihara i Alaksandra asudzili da dvuch z pałovaj hadoŭ «chatniaj chimii».

Roŭna praz hod Alaksandra Łykšyna znoŭ zatrymali ŭ miežach kryminalnaj spravy. Razam ź im pa kryminalnaj spravie prachodziać taksama Alaksandr Mazur i Pavieł Karaniuchin. Adrazu paśla zatrymańnia mužčynaŭ źjaviłasia infarmacyja pra pryznańnie sajta inicyjatyvy «piśmo.bieł», a taksama staronki jaje ŭ sacsietkach «ekstremisckimi materyjałami». Užo napačatku śniežnia pierastaŭ adkryvacca sajt inicyjatyvy, jon niedasiažny ŭ Biełarusi i za miežami krainy.

12 śniežnia KDB abnaviŭ śpis «ekstremisckich farmavańniaŭ», kudy trapiła i inicyjatyva «Piśmo.beł». Pry hetym, u rašeńni viedamstva paznačanyja listapadaŭskija daty. Da inicyjatyvy, pavodle KDB, dačynieńnie majuć Alaksandr Mazur, Siarhiej Antusievič, Pavieł Krasoŭski, Pavieł Karaniuchin, Alaksandr Łykšyn.

Viadoma, što spačatku Mazura, Karaniuchina i Łykšyna ŭtrymlivali na «sutkach» pavodle administracyjnych spravaŭ. Ale paźniej ich pieraviali ŭ śledčuju turmu № 8 u Žodzinie ŭ miežach kryminalnaj spravy. Im inkryminujuć art. 361-1 Kryminalnaha kodeksa (stvareńnie ekstremisckaha farmiravańnia abo ŭdzieł u im). U čym dakładna abvinavačvajuć mužčyn — nieviadoma.

• 0
• 0
• 0
• 2
• 0
• 2
• 10
• 0