Bortpravadnik, jaki vyžyŭ paśla padzieńnia azierbajdžanskaha samalota ŭ Kazachstanie, raskazaŭ, jak usio vyhladała znutry

Pravadnik raskazaŭ, što padčas rejsa ŭ Hrozny pazaštatnaja situacyja na borcie samalota ŭźnikła jašče da momantu avaryjnaj pasadki.

«My vylecieli ŭ Hrozny ŭ 8:00 ranicy. Pry zachodzie na pasadku my ŭbačyli, što aeraport achutaŭ vielmi husty tuman. Kapitan pačaŭ źnižeńnie, ale z-za drennaj bačnaści byŭ vymušany pajści na druhi kruh, spadziejučysia, što tuman raśsiejecca. Adnak i druhaja, i treciaja sproby pasadki nie mieli pośpiechu», — paviedamiŭ Asadaŭ.

U vyniku, pavodle jaho słoŭ, piłot pryniaŭ rašeńnie nakiravacca da najbližejšaha aeraporta.

«Ale ŭ hety momant zvonku samalota daniośsia dziŭny huk. Ja adrazu vyjšaŭ u sałon razam z kalehaj Ajdan Rahimli. My pabačyli, što siarod pasažyraŭ pačałasia panika…», — dadaŭ bortpravadnik.

Pa słovach Asadava, situacyju ŭdałosia ŭziać pad kantrol:

«My supakojvali pasažyraŭ, kažučy, što niama pryčyn dla niepakoju, maŭlaŭ, usio ŭ paradku, zajmicie svaje miescy, pryšpilicie ramiani. U hety momant u vyniku ŭdaru, jaki adbyŭsia sa źniešniaha boku samalota, ja atrymaŭ parez ruki. Uziaŭ ručnik i pieraviazaŭ ruku, zaciahnuŭ tužej. Ajdan mnie dapamahła. My praciahnuli palot. Ja skazaŭ, kab Ajdan sieła na svajo miesca, a ja zaniaŭ svajo.

Paśla hetaha kamandzir ekipaža vyrašyŭ źmianić miesca pasadki z vodnaj pavierchni na sušu. Jon byŭ vymušany pajści na ekstrannuju pasadku, bo była parušanaja praca ruchavika samalota. A rabić ćviorduju pasadku na vadu pahražaje trahiedyjaj, samalot prosta b razarvała na častki, pakolki, nakolki ja viedaju, vada na takoj chutkaści ćviardziejšaja za bieton. Jon źmianiŭ svajo rašeńnie, i my palacieli ŭ bok sušy. My i pasažyry dziejničali pavodle instrukcyi».

Zulfuhar Asadaŭ prakamientavaŭ i infarmacyju šerahu rasijskich ŚMI pra toje, što padčas palotu vybuchnuŭ bałon:

«Heta niapraŭda. Kali b niešta zdaryłasia z kisłarodnym bałonam, to samalot razarvała b na častki. Infarmacyja, što na bort pranieśli hazavy bałon, taksama nie adpaviadaje rečaisnaści. Pry prachodzie na pasadku ŭsich pasažyraŭ praviarajuć, pranieści što-niebudź niemahčyma. Hetaja trahičnaja situacyja ŭźnikła ŭ vyniku źniešniaha ŭździejańnia na samalot».

Kali nie ličyć čas prylotu z Baku ŭ Hrozny, to, pa jaho słovach, u palocie bort pravioŭ prykładna kala hadziny. Piłoty sprabavali ŭtrymać samalot, nie traciačy vyšyni, kab potym była mahčymaść ździejśnić pasadku.

«Na moj pohlad, ziamli kranułasia spačatku piaredniaje šasi samalota. Kali b samalot całkam zakranuŭ pałasu, heta značyć i piaredniaje i zadniaje šasi adnačasova, to, mahčyma, nichto nie zastaŭsia b žyvym. Kali ziamli kranułasia piaredniaje šasi, samalot razarvała na dźvie častki, piaredniaja jaho kabina adlacieła.

Ja byŭ u prytomnaści, niahledziačy na kroŭ, ale było vielmi ciažka dychać. My z bortpravadnicaj Ajdan Rahimli lažali kala dźviarej, ja pasprabavaŭ ich adčynić, paśla praniknieńnia pavietra ŭ astatniuju častku sałona stała lahčej. My stali dapamahać pasažyram i razam ź imi vybiracca z samalota.

Na vychadzie nas čakała vyratavalnaja bryhada. Ja paklikaŭ ich, tamu što ŭ mianie było surjoznaje ranieńnie ruki, nie zastavałasia sił. Ja paprasiŭ ich dapamahčy vyzvalić z samalota pasažyraŭ, jakija vyžyli. Dziakuj im za akazanuju dapamohu!», — skazaŭ bortpravadnik.

Asadaŭ adznačyŭ, što nie spadziavaŭsia vyžyć paśla padzieńnia samalota:

«Kali my ŭpali na ziamlu, ja dumaŭ, što my ŭžo miortvyja. Tamu što była mocnaja trasianina. Niby ŭsio cieła tresła. Ja nie spadziavaŭsia vyžyć. Słava Ałachu, ja vyžyŭ. Škada, što členam našaha ekipaža i inšym pasažyram tak nie pašancavała. My vyžyli dziakujučy hieraizmu našaha kamandzira ekipaža i druhoha piłota».

Adkazvajučy na pytańnie, ci sutykaŭsia jon raniej z avaryjnymi situacyjami, Asadaŭ skazaŭ, što ŭ jahonaj praktycy było zdareńnie, kali pry pasadcy vybuchnuła koła samalota, i tady ŭsim udałosia vyžyć dziakujučy hieraizmu i prafiesijanalizmu piłotaŭ.

• 15
• 0
• 1
• 2
• 5
• 19
• 2
• 1