Stała viadoma, kolki bonusnych vypłat atrymaŭ u 2024 hodzie hienieralny dyrektar «Biełaruśkalija»
«Rabočy Ruch» atrymaŭ infarmacyju ab pamiery bonusnych vypłat, jakija ŭ 2024 hodzie atrymaŭ były hienieralny dyrektar «Biełaruśkalija» Ivan Hałavaty. Suma ŭražvaje.
Pavodle atrymanaj infarmacyi, u listapadzie 2024 hoda dyrektaru Ivanu Hałavatamu byŭ vydzieleny karotkaterminovy bonus za III kvartał 2024 hoda ŭ pamiery 21 519 rubloŭ, a ahulnaja suma vypłat u 2024 hodzie skłała 121 222 rubla. I heta akramia štomiesiačnaj zarabotnaj płaty, infarmacyi pra jakuju niama.
Hałavaty kiravaŭ «Biełaruśkalijem» dziesiać hadoŭ — z 2014 hoda. U listapadzie 2024 hoda Alaksandr Łukašenka zvolniŭ jaho i pryznačyŭ eks-kiraŭnika «Biełnaftachima» Andreja Rybakova novym dyrektaram pradpryjemstva. Pryčyny zvalnieńnia nie nazyvalisia.
«Voś tolki što my pryznačyli novaha kiraŭnika «Biełaruśkalija». Ivan Hałavaty vyzvaliŭsia. Daśviedčany, tałkovy kiraŭnik. Ich treba vykarystoŭvać na źniešnim treku ŭ ramkach SND. Jany ŭsie viedajuć ruskuju movu i ŭ miescach znachodžańnia taksama viedajuć ruskuju movu», — zajaviŭ tady Łukašenka.
Pa infarmacyi «Rabočaha Ruchu», Hałavaty ciapier pryznačany na pasadu pieršaha namieśnika dyrektara AAT «Nietry Niežyn» i kuryruje biełaruska-kitajski prajekt pa budaŭnictvie horna-abahačalnaha kompleksu na syravinnaj bazie Niežynskaha ŭčastka Starobinskaha radovišča kalijnych solaŭ. Inšych paćviardžeńniaŭ hetaj infarmacyi niama.
Hałavaty, dadaje «Rabočy Ruch», zapomniŭsia tym, što mienavita pad jaho kiraŭnictvam dušyli strajk šachcioraŭ u 2020 hodzie i dalej pravodzili masavyja palityčna matyvavanyja represii ŭ dačynieńni da harniakoŭ.
Kamientary