U kancy 2024 hoda na «Biełaruśkalii» pačałasia novaja chvala palityčnych zvalnieńniaŭ za aktyŭnaść u 2020-m. Pra heta vydańniu «Lusterka» raskazała krynica, znajomaja ź situacyjaj. Pavodle jaje słoŭ, zvalnieńni praciahnulisia i ŭ 2025-m: ludziej vyklikajuć na razmovu z kiraŭnictvam, paśla čaho zvalniajuć «adnym dniom».
Ihar (imia źmienienaje) pracavaŭ na «Biełaruśkalii» da 2021 hoda. U vieraśni 2020-ha jon dałučyŭsia da strajku na pradpryjemstvie, praz što byŭ zvolnieny. Ciapier mužčyna žyvie ŭ adnoj ź jeŭrapiejskich krain.
Byłyja kalehi Ihara, jakija praciahvajuć pracavać na pradpryjemstvie, paviedamili mužčynu pra novuju chvalu zvalnieńniaŭ. Jana pačałasia ŭ kancy śniežnia 2024-ha i praciahnułasia paśla Novaha hoda. Za hety čas zvolnili niekalki dziasiatkaŭ čałaviek na čaćviortym rudaŭpraŭleńni «Biełaruśkalija».
«Štodnia ŭ pracoŭny čas pa čatyry-piać čałaviek vyklikajuć na razmovu da kiraŭnictva, paśla čaho «adnym dniom» zvalniajuć, — śćviardžaje Ihar. — Kali chtości nie zhodny, to vyklikajuć siłavikoŭ i ŭ kajdankach vyvodziać za bramu».
Infarmacyju Ihara «Lusterku» paćvierdziŭ Dźmitryj (imia źmienienaje), jašče adzin były supracoŭnik «Biełaruśkalija», jaki zvolniŭsia ŭ 2020 hodzie.
Pavodle jaho źviestak, atrymanych ad byłych kaleh u Salihorsku, zvalnieńni prachodziać nie tolki na čaćviortym rudaŭpraŭleńni, ale i pa ŭsim «Biełaruśkalii».
«Znoŭ zvalniajuć za padziei 2020 hoda — akcyi, kamientary ŭ sacsietkach, nazirańnie za vybarami i da taho padobnaje. Pryjechali «dziadźki ŭ pahonach» [na pradpryjemstva]», — śćviardžaje mužčyna.
Ihar taksama kaža, što supracoŭnikaŭ «Biełaruśkalija» praciahvajuć zvalniać «za palityku». Mužčyna źviazvaje heta z prychodam na pradpryjemstva novaha kiraŭnictva.
«Zvalnieńni za palityčnuju aktyŭnaść byli i raniej, paśla strajku 2020 hoda jany iduć chvalami, — tłumačyć Ihar. — U listapadzie 2024-ha Łukašenka pryznačyŭ Ihara Rybakova novym hienieralnym dyrektaram «Biełaruśkalija». Toj, mabyć, vyrašyŭ vysłužycca šlacham praviadzieńnia novych čystak supracoŭnikaŭ.
Novaje kiraŭnictva dabivaje tych, kaho paškadavała staroje. Jany padniali śpisy tych, chto padpisaŭsia za strajk u 2020-m. Nieaficyjna pradjaŭlajuć mienavita heta, ale farmalna kantrakt razryvajuć pa pahadnieńni bakoŭ. U vypadku niazhody pahražajuć prablemami ź milicyjaj».
Kamientary