Va ŭkrainski pałon trapiŭ kuchar ź Nieapala. U Italii jaho asudzili za seksualny hvałt nad 9-hadovym dziciem
Džani Čeni vajavaŭ u składzie rasijskaj armii i trapiŭ u pałon pad Kupianskam. U Italii ŭ jaho było dva sudy pa ciažkich artykułach.
Były italjanski kuchar Džani Čeni trapiŭ va ŭkrainski pałon pad Kupianskam 7-8 studzienia. 51-hadovy ŭradženiec Nieapala zaklučyŭ kantrakt ź Minabarony Rasii 13 listapada 2024 hoda. Jon słužyŭ u 1-m hvardziejskim tankavym pałku.
Na radzimie Čeni ŭčyniŭ jak minimum dva ciažkija złačynstvy. U 1999 hodzie jon pad psichatropami zastreliŭ svajho kalehu pa achoŭnaj firmie ŭ Miłanie, u jakoj tady pracavaŭ. Čeni patłumačyŭ u sudzie, što z achviaraj u jaho ŭźnikli roznahałośsi. Sud adpraviŭ Čeni ŭ turmu na doŭhi termin, piša Napoli Today.
U 2008-m mužčynu palehčyli ŭmovy ŭtrymańnia: jon zmoh viarnucca ŭ rodny horad i vyjści na pracu, ale načavać pavinien byŭ u turmie. Tady ž jon paznajomiŭsia z žančynaj, a praz try hady, kali Čeni kančatkova vyzvaliŭsia, jany źjechalisia. Mužčyna ŭładkavaŭsia pracavać u restaran picajołam — kucharam, jaki hatuje picu.
Para časta naviedvała plamieńnicu žančyny. U 2012 hodzie 9-hadovaja dziaŭčynka raskazała maci, što Čeni da jaje damahaŭsia: jon uvieś čas sprabavaŭ zastacca ź joj sam-nasam, kranaŭ jaje ŭ intymnych miescach. Kali dziaŭčynka raskazała pra ŭsio baćkam, Čeni pahražaŭ jaje baćku zabojstvam, kali jon źvierniecca ŭ palicyju.
Śledstva praciahvałasia niekalki hadoŭ. U 2016-m sud prysudziŭ Čeni da siami hadoŭ i dvuch miesiacaŭ turmy za seksualny hvałt nad dziciem, jakomu było mienš za dziesiać hadoŭ. Prysud paśla niekalkich skarhaŭ nabyŭ moc u 2022 hodzie. Adnak Čeni źnik ź Italii.
Spačatku jon vyjechaŭ u Finlandyju, dzie paznajomiŭsia z žančynaj z Rasii. A paśla para pierajechała ŭ Samaru. Tam Čeni pracavaŭ kucharam u piceryi, jakaja naležyć hanarovamu konsułu Italii Džanhuida Breda. Restaratar raskazaŭ Today.it, što Čeni hod tamu zvolniŭsia i pierajechaŭ.
Čamu italjaniec vyrašyŭ pakinuć žonku i dvaich dziaciej i pajści na vajnu, nieviadoma. Italjanskija ŚMI miarkujuć, što jon moh ździejśnić čarhovaje złačynstva i zavierbavacca ŭ vojska z rasijskaj turmy.
U videa, jakoje apublikavaŭ kanał «Nie ždi mienia iz Ukrainy», Čeni havoryć, što byŭ «niezakonna mabilizavany ŭ Rasii» i choča viarnucca ŭ Italiju.
Ciapier čytajuć
Łukašenka sustreŭsia sa śpiecpasłańnikam Trampa Kitam Kiełaham12
Kamientary