Ejsmant zajaviŭ, što pry Zialenskim da 2022 hoda na Danbasie zahinuli tysiačy mirnych žycharoŭ. Heta praŭda?

Na kanale «Biełaruś 1» praciahvajecca cykł pieradač «Čas vybraŭ nas». Ivan Ejsmant vyrašyŭ sumiaścić farmat, jaki vielmi addalena nahadvaje «Namiedni» Leanida Parfionava, ź pieradvybarčaj ahitacyjaj za Łukašenku.

Kožny vypusk pryśviečany asobnamu hodu ŭ historyi Biełarusi i śvietu. Bolšaja častka efirnaha času advodzicca raskazam pra tyja ci inšyja dasiahnieńni suvierennaj Biełarusi, jakija prypisvajucca Łukašenku.

U sieryi, pryśviečanaj 2018 hodzie, Ejsmant uspomniŭ Uładzimira Zialenskaha, jaki stanie prezidentam tolki ŭ nastupnym, 2019-m. I paŭtaryŭ fejk rasijskaj prapahandy, jaki ŭžo daŭno źniapraŭdzili.

«Pavieryŭšy kazkam Zialenskaha, što jon spynić bojniu na Danbasie, ludzi hałasujuć za akciora. I toj ich padmanvaje.

Z prychodam viadomaha komika na Bankavuju Kijeŭ raźviazvaje ahresiŭnuju antybiełaruskuju palityku. Abstreły Daniecka i Łuhanska tolki ŭzmacniajucca. Hinuć tysiačy mirnych žycharoŭ», — miž inšym kidaje Ejsmant.

U śniežni 2021 hoda Uładzimir Pucin paraŭnaŭ situacyju ŭ Danieckaj i Łuhanskaj abłaściach z hienacydam: «Toje, što ciapier adbyvajecca na Danbasie, my z vami dobra bačym, viedajem. Heta, viadoma, vielmi nahadvaje hienacyd». Nieŭzabavie jon vykarystaŭ hetuju vidavočnuju dezynfarmacyju jak adnu z padstaŭ dla poŭnamaštabnaha ŭvarvańnia va Ukrainu.

Pa vyznačeńni AAN, hienacyd — heta dziejańni, jakija ździajśniajucca z namieram źniščyć, całkam ci častkova, jakuju-niebudź nacyjanalnuju, etničnuju, rasavuju abo relihijnuju hrupu jak takuju. Mała taho, što «narod Danbasa», pry ŭsich asablivaściach hetaha ŭkrainskaha rehijona, jak niejkaja asobnaja etničnaja abo nacyjanalnaja hrupa isnuje tolki ŭ rasijskaj prapahandzie, tak i statystyka nie paćviardžaje nijakaha hienacydu.

Pryčym havorka idzie nie stolki pra ličby AAN abo misii ABSIE, jakija rasijskija ŭłady i prapahandysty mahli b abvinavacić u praduziataści. Navat aficyjnaja statystyka ŭładaŭ «DNR» i «ŁNR» pa-zdradnicku abviarhaje tezis Ejsmanta pra tysiačy zabitych pry Zialenskim mirnych žycharach.

Infarmacyjaj pra zahinułych na akupavanaj terytoryi Danieckaj vobłaści štohod dzialiłasia viedamstva ŭpaŭnavažanaha pa pravach čałavieka «DNR». Tyja dakłady da hetaha času dastupnyja.

Tak, u 2017 hodzie zahinuli 32 mirnyja žychary, u 2018-m — 19, u 2019-m — 9, u 2020-m — 9, u 2021-m — 7. Niaciažka zaŭvažyć, što z 2019 hoda pry Zialenskim nie było nijakich tysiač zabitych mirnych žycharoŭ.

Darečy, ambudsmien «DNR» u dakładzie za 2020 hod adznačaŭ, što źmianšeńniu strat siarod cyvilnaha nasielnictva paspryjała abvieščanaje biesterminovaje pieramirje na Danbasie. Pieramirje heta było abvieščana jak raz pry Zialenskim. U tym ža dakładzie adznačana, što

«2020 hod adznačyŭsia samym nizkim pakazčykam śmiarotnaści za ŭvieś pieryjad uzbrojenaha kanfliktu».

Va ŭsich dakładach asobna padkreślivajecca, što bolšaść strat jak siarod cyvilnych, tak i siarod vajskoŭcaŭ prypadaje na 2014 i 2015 hady. Tady ŭzbrojenyja atrady, jakija padtrymlivalisia Kramlom, zachapili ŭkrainskija Słaviansk i Kramatorsk, čym spravakavali poŭnamaštabnyja bajavyja dziejańni.

Za dva hady zahinuŭ 3941 čałaviek, pryčym kolki ź ich cyvilnych, nie adznačajecca. Paśla pačatku pracesu mirnaha ŭrehulavańnia kolkaść zahinułych rezka skaračajecca. Usie hetyja ludzi nie zahinuli b, kali b Kreml nie ŭzbrojvaŭ sieparatystaŭ i nie sprabavaŭ adarvać častku inšaj dziaržavy. 

U «ŁNR» statystyku pa zahinułych nie publikavali. Ale viadoma, što za ŭvieś 2021 hod na akupavanaj častcy Łuhanščyny zahinuŭ adzin mirny žychar. Heta aficyjnaja zajava ŭładaŭ «ŁNR».

Uvohule, u 2021 hodzie ŭ «ŁDNR» zahinuli vosiem cyvilnych. A ŭžo ŭ nastupnym hodzie Uładzimir Pucin abvinavaciŭ ukrainskija ŭłady ŭ hienacydzie i pačaŭ poŭnamaštabnuju vajnu pad ściaham «vyratavańnia naroda Danbasa», u jakoj, pavodle danych AAN na śniežań 2024 hoda, byli zabityja ŭžo 12462 mirnyja žychary.

• 7
• 0
• 4
• 7
• 0
• 1
• 10
• 0