Łatuška zhadaŭ, jak 20 hadoŭ tamu Łukašenka pabajaŭsia jechać na pamiatnaje mierapryjemstva ŭ Aŭšvic
«Šejman daŭ rekamiendacyju admovicca».
Sioleta Śviatłana Cichanoŭskaja razam z suśvietnymi lidarami zaprošanaja ad Biełarusi na cyrymoniju 80-hodździa z dnia vyzvaleńnia kancłahiera Aŭšvic (Aśviencim). Udzieł ad Biełarusi voźmie i Pavieł Łatuška.
Łatuška, jaki ŭ 2005 hodzie byŭ pasłom Biełarusi ŭ Polščy, zhadaŭ, što na cyrymoniju 60-hodździa z dnia vyzvaleńnia kancłahiera Aŭšvic aficyjnaje zaprašeńnie nakiroŭvali ŭ tym liku Alaksandru Łukašenku.
«Prezident Polščy Alaksandr Kvaśnieŭski zrabiŭ čarhovuju sprobu ŭstalavać adnosiny z Łukašenkam. Jon skazaŭ mnie pra ideju zaprasić Łukašenku na pamiatnyja mierapryjemstvy 60-hadździa vyzvaleńnia Aśviencima. Heta adbyłosia padčas navahodniaha pryjomu ŭ prezidenckim pałacy. Paźniej my atrymali i aficyjnaje zaprašeńnie», — raskazvaje Łatuška.
Pa słovach byłoha pasła, jon pamiataje, što pisaŭ adpaviednuju prapanovu ŭ Minsk. Ale Łukašenka admoviŭsia ad pajezdki.
«Jon spałochaŭsia. Tady, nakolki ja pamiataju, dziaržaŭny sakratar Rady biaśpieki Viktar Šejman daŭ Łukašenku rekamiendacyju admovicca ad udziełu va ŭračystaściach, bo jany bajalisia taho, što padčas uračystaściaŭ, kali Łukašenka budzie prysutničać, mohuć być hałasy ci navat dziejańni pratestu suprać jaho prysutnaści ŭ hetym nastolki važnym histaryčnym miescy»,
— tłumačyć Łatuška.
Łukašenka ŭ vyniku nakiravaŭ staršyniu Savieta Respubliki Hienadzia Navickaha. Tady była adkryta pamiatnaja doška ab zakatavanych biełarusach u Aśviencimie.
Pa słovach Łatuški, Łukašenka niekalki razoŭ admaŭlaŭsia pryniać aficyjnaje zaprašeńnie zachodnich prezidentaŭ. Naprykład, kali prezident Francyi Emanuel Makron zaprašaŭ jaho na ŭračystaści, źviazanyja sa 100-hodździem zaviaršeńnia Pieršaj suśvietnaj vajny ŭ listapadzie 2018 hoda. U toj čas Łatuška byŭ pasłom u Francyi.
«My navat užo šukali hatel, z pratakołam pracavali pa detalach mahčymaha pryjezdu. Ale Łukašenka, jak zaŭsiody ŭ apošni momant, admoviŭsia i nakiravaŭ [staršyniu Savieta Respubliki] Michaiła Miaśnikoviča», — pryhadvaje Łatuška.
Ciapier čytajuć
Navukoviec raspavioŭ pra hieałahičnyja zahadki Biełarusi: irtuć ź ziamli i kratar ad padzieńnia mietearyta, jaki źniščyŭ usio žyvoje ŭ radyusie tysiač kiłamietraŭ44
Kamientary