Polskija miedyja zasumniavalisia ŭ napadzie ŭ Varšavie na Jana Malickaha, jaki stvaryŭ Prahramu Kalinoŭskaha
Polskaja palicyja praciahvaje pravierku zajavy prafiesara Jana Malickaha ab napadzie na jaho ŭ śniežni 2024 hoda. Vysnoŭ niama bolš za miesiac, nahadvaje Radyjo Svaboda.
Dyrektar Centra ŭschodniejeŭrapiejskich daśledavańniaŭ Varšaŭskaha ŭniviersiteta Jan Malicki śćviardžaje, što byŭ źbity nieviadomymi ŭ varšaŭskim Kazimiežaŭskim parku ŭ druhoj pałovie śniežnia 2024 hoda. Palicyja pravodzić pravierku ŭžo bolš za miesiac, ale pakul nie znajšła nijakich dokazaŭ, jakija b heta paćvierdzili, paviedamlaje polski sajt tvn24.pl.
Žurnalisty praanalizavali taksama zapisy z kamier videanazirańnia. Jany nibyta nie paćviardžajuć prysutnaści padazronych asob kala Malickaha.
Pavodle vydańnia, ratavalniki zafiksavali ŭ svajoj dakumientacyi, što pacyjent byŭ u stanie ałkaholnaha apjanieńnia i ŭpaŭ ź leśvicy:
«Pavodle našych vysnoŭ, Malicki skazaŭ im, što viartajecca ź imprezy. Jon nie skazaŭ, što jaho bili. Jon paprasiŭ advieźci jaho dadomu. Z pryčyny traŭmaŭ hałavy ratavalniki dastavili paciarpiełaha ŭ špital rajona Praha. Pavodle zapisaŭ, jany prybyli tudy ŭ 23:36. Pra źbićcio Jan Malicki taksama nie paviedamiŭ lekaram u špitali. Na dalejšuju dyjahnostyku jon nie pahadziŭsia i pa ŭłasnym žadańni pakinuŭ ustanovu praz vosiem chvilin paśla poŭnačy».
Ale paśla viartańnia dadomu jamu stała horš, i 20 śniežnia, na nastupny dzień paśla zdareńnia, jon vyklikaŭ chutkuju dapamohu. Jaho dastavili ŭ vajenny špital na vulicy Šaseraŭ. Tolki tam jon upieršyniu paviedamiŭ lekaram, što jaho źbili.
U razmovie z žurnalistami tvn24.pl jon pryznaŭsia, što ŭ miedycynskaj karcie jość «padzieńnie ź leśvicy».
U intervju haziecie Rzeczpospolita Jan Malicki raniej skazaŭ, što ŭ noč na 20 śniežnia ŭ Kazimiežaŭskim parku, što kala Varšaŭskaha ŭniviersiteta, na jaho napali dvoje mužčyn. Spačatku nieviadomyja spytali, jak jaho zavuć, a kali jon nazvaŭsia, udaryli pa hałavie. Prafiesar Jan Malicki straciŭ prytomnaść i ačuŭsia tolki ŭ mašynie chutkaj dapamohi. Pierad zdareńniem jon byŭ na sustrečy, jakaja skončyłasia pozna, a paśla pajšoŭ praz drenna aśvietleny Kazimiežaŭski park.
U prafiesara vyjaviłasia surjoznaja traŭma hałavy: pierałom čerapa, dźvie hiematomy i strasieńnie mazhoŭ.
Kamientary
Maje spačuvanni svajakam pana Jana, heta vielmi ciažkaje vyprabavańnie.