Ministr zamiežnych spraŭ Litvy nazvaŭ «niebiaśpiečna pamyłkovaj» ideju adnaŭleńnia impartu rasijskaha hazu dziela miru va Ukrainie
Ministr zamiežnych spraŭ Litvy Kiastucis Budrys nazvaŭ niebiaśpiečnymi idei pra mahčymaje adnaŭleńnie impartu Jeŭropaj rasijskaha hazu jak sposab padšturchnuć Rasiju da «mirnych pieramoŭ», jakija niadaŭna źjavilisia ŭ zachodnich ŚMI. Pra heta jon napisaŭ u sacsietcy X.
Pa słovach Budrysa, ideja ab adnaŭleńni impartu rasijskaha hazu krainami Jeŭropy jak nibyta ryčah upłyvu na «mirnyja pieramovy» pa Ukrainie, źjaŭlajecca «niebiaśpiečna pamyłkovaj».
«Jeŭropa daviedałasia na ŭłasnym dośviedzie, što rasijski haz — heta bolš, čym prosta tavar, heta hieapalityčnaja zbroja… Navat razvažańni pra viartańnie da impartu rasijskaha hazu ciapier byli b histaryčnaj pamyłkaj», — padkreśliŭ Kiastucis Budrys.
Kiraŭnik MZS Litvy nahadaŭ, jak Maskva nie raz vykarystoŭvała pahrozy spynić pastaŭki enierhanośbitaŭ i navat ažyćciaŭlała ich. I tolki poŭnamaštabnaje ŭvarvańnie Rasii va Ukrainu zaachvociła Jeŭropu narešcie pačać dziejničać i pazbaŭlacca ad zaležnaści ad rasijskich resursaŭ.
«Jeŭropa pavinna prytrymlivacca pravilnaha kursu: nie puskać rasijski haz, uzmacnić sankcyi suprać rasijskaha enierhietyčnaha siektara, padtrymać Ukrainu i inviestavać u doŭhaterminovuju enierhietyčnuju biaśpieku. Lubyja inšyja dziejańni byli b krokam nazad», — padsumavaŭ Budrys.
Raniej vydańnie Financial Times paviedamiła, što jeŭrapiejskija čynoŭniki nibyta pačali abmiarkoŭvać ideju mahčymaści viartańnia da zakupak hazu ŭ Rasii ŭ ramkach patencyjnaha ŭrehulavańnia vajny va Ukrainie.
Ciapier čytajuć
Cichanoŭski raskazaŭ, što treba było rabić u žniŭni 2020-ha33
Kamientary