U Małdovie dapuścili, što Rasija ŭ vyniku pieramoŭ pa Ukrainie vyviedzie vojski z Prydniastroŭja
Ułady Małdovy spadziajucca, što Rasija moža vyvieści svaich vajskoŭcaŭ z Prydniastroŭja ŭ vyniku pieramoŭnaha pracesu ŭ dačynieńni da Ukrainy. Pra heta ŭ efiry vydańnia Jurnal TV zajaviŭ premjer-ministr Małdovy Doryn Rečan.
U kiraŭnika małdaŭskaha ŭrada pacikavilisia, što pavinna adbycca, kab Rasija vyvieła svaje vojski z Prydniastroŭja.
«Ciapier jość mižnarodny kantekst, jaki moža pryvieści da taho, što Rasija moža vyvieści svaje vojski ź levaha bieraha Dniastra ŭ ramkach hetaha pieramoŭnaha pracesu. Mahčyma, nie abaviazkova ŭ mirnym pieramoŭnym pracesie, heta ciažka ŭjavić u bližejšy čas, ale ŭ pieramoŭnym pracesie, jaki tyčycca Ukrainy i novaj architektury biaśpieki ES», — adkazaŭ Doryn Rečan.
Ź jahonych słoŭ, Małdova budzie namahacca, kab pytańnie vyvadu rasijskich vajskoŭcaŭ «było na stale pieramoŭ». I lubyja pieramovy ab miry abo spynieńni ahniu va Ukrainie «tyčacca novaj architektury biaśpieki ŭ Jeŭropie».
Taksama ŭ Rečana spytali, ci nie płanuje Małdova vysłać rasijskaha pasła z-za taho, što rasijskija drony časta parušajuć pavietranuju prastoru krainy.
«Siońnia my zrabili vielmi važny krok [havorka pra zakryćcio Rasijskaha kulturnaha centra ŭ Kišyniovie], jaki, pryznaju, treba było zrabić raniej. My praciahniem rabić nieabchodnyja kroki dla abarony intaresaŭ našaj krainy», — padkreśliŭ małdaŭski premjer-ministr.
Adnosna zakrytaha Rasijskaha kulturnaha centra jon vykazaŭsia adkryta:
«Heta byŭ nie kulturny centr, a centr z ahientami ŭpłyvu. A tym, chto skardzicca, my kažam, što Małdova nie maje ničoha suprać ruskaj kultury, ruskaj movy. Rasija pavinna pavažać małdavan i nie pasyłać svaich ahientaŭ upłyvu, jakija maskirujucca pad dziejačaŭ kultury».
Kiraŭnictva Małdovy, u pryvatnaści prezidentka krainy Maja Sandu, nieadnarazova nastojvała na nieabchodnaści vyvadu rasijskich vajskoŭcaŭ z Prydniastroŭja. Pry hetym Kišynioŭ sprabuje damahčysia hetaha dypłamatyčnym sposabam. U toj ža čas niadaŭna jana papiaredžvała, što Rasija sprabuje vykarystoŭvać Prydniastroŭje dla destabilizacyi situacyi ŭnutry Małdovy. Tamu Maskva choča navat umacavać svaju prysutnaść na levym bierazie Dniastra.
MZS Małdovy vystaviła VIDEA, jak rasijskaha pasła vyklikali dla tłumačeńniaŭ
U Małdovie zakryjuć Rasijski kulturny centr
Małdova nazvała čatyry ŭmovy pa hazie dla Prydniastroŭja
Małdova pačała pastaŭlać haz u niepryznanaje Prydniastroŭje
Małdova aficyjna zajaviła pra niepryznańnie vybaraŭ Łukašenki
Prydniastroŭje damoviłasia z Małdovaj ab pastaŭkach hazu biez Rasii
Pavietranaja himnastka pakazała zakuliśsie pracy ŭ Biełdziaržcyrku6
Kamientary