Čamu Tramp prapanavaŭ pravieści pieramovy z Pucinym u Saudaŭskaj Aravii

Zajava Trampa prahučała ŭsiaho praź niekalki hadzin paśla taho, jak jon pravioŭ asobnyja telefonnyja razmovy z Pucinym i prezidentam Ukrainy Uładzimiram Zialenskim.

Tramp nie ŭdakładniŭ datu sustrečy, ale zhadaŭ, što jana moža adbycca ŭ najbližejšaj budučyni i ŭ joj navat moža ŭziać udzieł spadčynny prync Saudaŭskaj Aravii Muchamied bin Sałman.

U MZS Saudaŭskaj Aravii adkazali, što vysoka aceńvajuć razmovu pamiž Pucinym i Trampam, vitajuć prapanovu ab praviadzieńni samita ŭ karaleŭstvie, a taksama paćviardžajuć «svaje pastajannyja namahańni pa dasiahnieńni miru pamiž Rasijaj i Ukrainaj».

Prezident Ukrainy Uładzimir Zialenski paśla razmovy Trampa z Pucinym zajaviŭ, što Ukraina nie prymie nijakich pahadnieńniaŭ, zaklučanych pamiž Maskvoj i Vašynhtonam biez udziełu Kijeva.

Niejtralnaja placoŭka

Jak paviedamlałasia, placoŭku dla praviadzieńnia sustrečy Trampa i Pucina prapanoŭvali, u pryvatnaści, takija krainy, jak Kitaj i Abjadnanyja Arabskija Emiraty (AAE).

«Saudaŭskaja Aravija — łahičny vybar dla sustrečy Trampa i Pucina, bo jana źjaŭlajecca niejtralnaj placoŭkaj», — ličyć Poł Salem, vice-prezident Instytuta Blizkaha Uschodu ŭ Vašynhtonie.

Salem adznačaje, što praviadzieńnie sustrečy ŭ jeŭrapiejskaj krainie niemahčyma z-za ćviordaj pazicyi Jeŭropy pa vajnie va Ukrainie.

«Tradycyjna dla takich samitaŭ vybiralisia niejtralnyja miescy, naprykład, Ženieva. Adnak paharšeńnie adnosin Rasii sa Šviejcaryjaj i inšymi jeŭrapiejskimi krainami, vierahodna, pryviało da takoha alternatyŭnaha vybaru», — kaža prafiesar mižnarodnych adnosin doktar Chatar Abu Dzib.

Jon padkreślivaje, što Saudaŭskaja Aravija zmahła vybudavać davierlivyja adnosiny z Pucinym, a taksama nie pryznaje jurysdykcyju Mižnarodnaha kryminalnaha suda ŭ Haazie, jaki ŭ 2023 hodzie vydaŭ ordar na aryšt rasijskaha lidara, abvinavaciŭšy jaho ŭ vajennych złačynstvach va Ukrainie. Pucin moža svabodna naviedvać Saudaŭskuju Araviju, nie ryzykujučy być aryštavanym.

Rola pasiarednika

Saudaŭskaja Aravija vystupaje jak pasiarednica pry abmienie pałonnymi pamiž Rasijaj i Ukrainaj, što dapamahło joj zavajavać davier abodvuch bakoŭ.

Padčas niadaŭniaha abmienu viaźniami, taksama arhanizavanaha pry pasiarednictvie Er-Ryjada, Rasija vyzvaliła amierykanskaha nastaŭnika Marka Fohiela.

Pavodle śpiecpradstaŭnika ZŠA pa Blizkim Uschodzie Styva Uitkafa, klučavuju rolu ŭ vyzvaleńni Fohiela, jaki znachodziŭsia ŭ źniavoleńni bolš za try hady, adyhraŭ spadčynny prync Saudaŭskaj Aravii Muchamied bin Sałman.

Saudaŭskaja Aravija nieadnarazova prymała jak Zialenskaha, tak i Pucina, a taksama vystupała za zaklučeńnie ŭstojlivaha mirnaha pahadnieńnia pamiž krainami.

Uletku 2023 hoda Er-Ryjad arhanizavaŭ mižnarodnuju sustreču ŭ Džydzie z udziełam pradstaŭnikoŭ niekalkich dziaržaŭ.

Padčas vizitu Pucina ŭ Er-Ryjad u śniežni 2023 hoda spadčynny prync Muchamied bin Sałman nazvaŭ jaho «asablivym i vielmi pavažanym hościem Saudaŭskaj Aravii — jak na dziaržaŭnym, tak i na hramadskim uzroŭni».

Ekśpiert pa krainach Piersidskaha zaliva Abduła Baabud ličyć, što Saudaŭskaja Aravija imkniecca ŭzmacnić svaju rolu pasiarednika, padobna Amanu, Kataru i AAE, i choča ŭmacavać svoj status klučavoha rehijanalnaha hulca.

Baabud miarkuje, što praviadzieńnie sustrečy Trampa i Pucina ŭ Saudaŭskaj Aravii moža stać dypłamatyčnaj pasłuhaj Er-Ryjada, jakaja, u svaju čarhu, moža spryjać jaho bolšamu ŭklučeńniu ŭ stratehičnyja intaresy ZŠA, padobna padpisańniu ŭ 2020 hodzie «Aŭraamaŭskich pahadnieńniaŭ» — dvuchbakovych damoŭ ab narmalizacyi adnosin pamiž čatyrma arabskimi krainami i Izrailem.

Poł Salem ličyć, što Tramp imkniecca ŭmacavać suviazi ZŠA z Saudaŭskaj Aravijaj z ekanamičnych, finansavych, inviestycyjnych i stratehičnych pryčyn. Jon taksama adznačaje intares Trampa da mahčymaj damoŭlenaści pamiž ZŠA, Saudaŭskaj Aravijaj i Izrailem u budučyni.

Doktar Nidal Šukajr, prafiesar stratehičnych kamunikacyj, padkreślivaje, što Saudaŭskaja Aravija adyhryvaje klučavuju rolu ŭ blizkaŭschodniaj palitycy Trampa, asabliva ŭ pytańni paleścina-izrailskaha kanfliktu.

Jon taksama źviartaje ŭvahu na niadaŭni cisk ZŠA na Saudaŭskuju Araviju, asabliva paśla zajaŭ premjer-ministra Izraila Bińjamina Nietańjachu ab mahčymym pierasialeńni paleścincaŭ z Hazy, što Er-Ryjad rašuča adrynuŭ.

Naftavy faktar

ZŠA źjaŭlajucca najbujniejšym vytvorcam nafty ŭ śviecie, za imi iduć Saudaŭskaja Aravija i Rasija.

Poŭnamaštabnaje ŭvarvańnie Rasii va Ukrainu paŭpłyvała na suśvietnyja enierhietyčnyja rynki, i ekśpierty adznačajuć, što Saudaŭskaja Aravija adyhrała peŭnuju rolu ŭ stabilizacyi cenaŭ na naftu.

U śniežni 2024 hoda vosiem krain-čalcoŭ APIEK+, uklučajučy Saudaŭskuju Araviju i Rasiju, vyrašyli adkłaści pavieličeńnie zdabyčy nafty jašče na try miesiacy z-za bolš nizkaha, čym čakałasia, popytu na naftu, a taksama rostu zdabyčy z boku krain, jakija nie ŭvachodziać u kartel.

Abduła Baabud adznačaje, što Saudaŭskaja Aravija i Rasija majuć ahulnyja intaresy jak najbujniejšyja naftazdabyŭnyja krainy. Ekśpiert ličyć, što na samicie Trampa i Pucina havorka pojdzie nia tolki pra zakančeńnie vajny va Ukrainie, ale i pra suśvietnyja ceny na naftu i ekanamičnaje supracoŭnictva.

«Tramp moža pasprabavać zabiaśpiečyć vyhadnyja ceny na syruju naftu dla amierykanskich enierhietyčnych kampanij, asabliva ŭličvajučy jaho minułyja zakliki da źnižeńnia cenaŭ», — dadaje jon.

Jak nahadvaje Baabud, dla Trampa pryjarytetam zastajecca raźvićcio vuhalnaj, naftavaj i hazavaj halin, a nie «zialonaja enierhietyka», što adpaviadaje roli Saudaŭskaj Aravii jak adnaho z najbujniejšych eksparcioraŭ nafty.

Stratehičnyja intaresy

Pieršy aficyjny vizit Trampa ŭ jakaści prezidenta ŭ 2017 hodzie adbyŭsia ŭ Saudaŭskuju Araviju, što pavysiła dypłamatyčny status karaleŭstva na suśvietnaj arenie.

Tramp užo namiaknuŭ, što pieršaj zamiežnaj krainaj, kudy jon nakirujecca padčas svajho druhoha prezidenckaha terminu, znoŭ moža stać Saudaŭskaja Aravija, pryčym jon nazvaŭ peŭnuju canu za heta.

«Kali Saudaŭskaja Aravija zachoča kupić [našaj pradukcyi] na 450 ci 500 miljardaŭ dalaraŭ… Dumaju, ja, napeŭna, pajechaŭ by», — zajaviŭ jon žurnalistam u Avalnym kabiniecie ŭ minułym miesiacy.

Praź niekalki dzion spadčynny prync Saudaŭskaj Aravii skazaŭ, što karaleŭstva płanuje inviestavać 600 miljardaŭ dalaraŭ u ZŠA na praciahu nastupnych čatyroch hadoŭ.

«Ale ja budu prasić spadčynnaha prynca, jaki cudoŭny chłopiec, akruhlić hetuju sumu da 1 tryljona dalaraŭ», — zajaviŭ Tramp nieŭzabavie paśla hetaha. «Ja dumaju, jany pahodziacca, bo my byli vielmi dobryja da ich», — dadaŭ jon.

Doktar Nidal Šukajr ličyć, što Tramp razhladaje Saudaŭskuju Araviju jak klučavoha stratehičnaha i ekanamičnaha partniora.

Jon taksama adznačaje, što Tramp imkniecca zabiaśpiečyć daminujučuju ekanamičnuju rolu ZŠA ŭ Piersidskim zalivie, asabliva na fonie pavarotu byłoha prezidenta Džo Bajdena ŭ bok Azii.

Pavodle prafiesara Chatara Abu Dziba, Tramp taksama sprabuje ŭmacavać upłyŭ ZŠA ŭ Saudaŭskaj Aravii i rehijonie ŭ cełym u ramkach stratehičnaha supiernictva Vašynhtona z Kitajem.

Choć Saudaŭskuju Araviju krytykavali za parušeńni pravoŭ čałavieka, Abu Dzib i Šukajr śćviardžajuć, što niadaŭna praviedzienyja ŭ karaleŭstvie reformy, takija jak skasavańnie relihijnaj palicyi i dazvoł žančynam kiravać aŭtamabilem, palepšyli jaho mižnarodny imidž, zrabiŭšy jaho mienš uraźlivym da palityčnaha cisku z boku administracyi Trampa.

• 5
• 1
• 0
• 3
• 0
• 2
• 1
• 0