Brudnaja rabota ŭ nul

Pradpryjemstvy pa pierapracoŭcy adkidaŭ adstajuć ad kultury narodu.

Užo dva miesiacy dziejničaje ukaz prezydenta, pavodle jakoha impartery i vytvorcy plastykavaj pradukcyi albo pradukcyi, zapakavanaj u hetuju taru, musiać płacić kala 240 tys. z tony hetaj syraviny na jaje pierapracoŭku. Niešta padobnaje isnuje i ŭ Eŭropie. Ale tam zakanadaŭstvam zamacavany abaviazak vytvorcy i handlovaj firmy prymać nazad i pierapracoŭvać upakoŭku paśla vykarystańnia spažyŭcom. Zajmacca hetaj spravaj paasobku niemetazhodna, tamu ź inicyjatyvy hetych firmaŭ była stvorana pryvatnaja schiema ŭtylizacyi – «dualnaja systema», jakaja ŭziała na siabie vykanańnie hetych zadačaŭ. Tysiačy firmaŭ nieprymusova pryniali rašeńnie ŭdzielničać u hetym pracesie. Spłaciŭšy hrošy za pasłuhu, jany atrymlivajuć prava paznačyć svaju ŭpakoŭku «zialonaj kropkaj». Pavodle hetaha symbalu spažyviec daviedvajecca pra pierapracoŭku tary i viartaje jaje nazad. U Biełarusi hetuju rolu na siabie ŭziała dziaržava.

Pavodle źviestak kancernu «Biełresursy», štohod u Biełarusi ŭtvarajecca 900 tys. ton patencyjnaj druhasnaj syraviny, a pierapracoŭvajecca 240 tys. na sumu $20 młn.

U Mahilovie byŭ pabudavany pierapracoŭčy zavod plastyku mahutnaściu 7 tys. ton, u krainie ŭviedzieny asobny zbor syraviny, ale na siońnia zahružanaść pradpryjemstva – 2,5 tys. ton pet-butelek. Utvarajecca ž štohod 13 tys. (300 młn štuk). «Arhanizacyja materyjalna-techničnaj bazy dla zboru pet-butelek patrabuje vialikich vydatkaŭ, – tłumačyć načalnik adździełu druhasnaj syraviny kancernu «Biełresursy» Anatol Jacuk. – Ciapier u hetaj systemie pracuje kala 150 aŭtamabilaŭ i 20 presaŭ koštam 200 młn rubloŭ kožny. Abstalavańnie pierapracoŭčaha zavodu abyšłosia ŭ 2 młn eŭra. Ale i z takim abstalavańniem my adstajom, možna skazać, ad kultury narodu. Spažyŭcy hatovyja da asobnaha zboru, jany i pierapaŭniajuć našyja baki, a my nie paśpiavajem za imi».

Ź pierapracoŭkaj papiery i škła paŭstajuć inšyja pytańni. Pradpryjemstvy napoŭnicu zahružanyja, ale adkidaŭ utvarajecca ŭ 2–3 razy bolej. Vostra adčuvajecca patreba pavieličeńnia vytvorčych mahutnaściaŭ, a heta taksama patrabuje vialikich układańniaŭ.

Pavodle słovaŭ Anatola Jacuka, ajčynnyja pradprymalniki taksama cikaviacca hetym kirunkam, a tyja, što ŭžo zajmajucca zboram ci pierapracoŭkaj, robiać heta bolš paśpiachova, čym dziaržava. Ale surjoznych investycyjaŭ ź ich boku čakać nie davodzicca. Padatkovaj systemaj nia ŭličanyja asablivaści raboty z druhasnaj syravinaj. Toje, što syravina źbirajecca, a nie nabyvajecca za hrošy, upłyvaje na zalikovy PDV. Urešcie, ad cany prodažu na padatki pojdzie prykładna 40%. Z astatnich hrošaj biznesoviec musić sabrać, pierapracavać, spłacić padatak na ziamlu (patrebna vialikaja płošča dla nazapašvańnia, dasartoŭki i h.d.), ekalahičny zbor, vypłacić zarobki.

«Za 2005 hod rentabelnaść pradpryjemstva skłała mieniej za 10%, – skardzicca ŭładalnik UP «Biełźniešpradukt» Valery Kot. – Kali ja pačynaŭ zajmacca hetym napramkam u 1994 hodzie, heta ličba była 56%. Tady pierapracoŭvali hałoŭnym čynam adkidy pradpryjemstvaŭ, ich addavali za nievialikija srodki. Siońnia ŭ vyniku roznych pieraŭtvareńniaŭ tonu adkidaŭ pradpryjemstva pradaje prykładna za $500. Kab atrymać druhasnuju syravinu tańniej, uzdoŭž hałoŭnaha praspektu Miensku byli ŭstalavany našyja kantejnery dla adkidaŭ spažyŭcoŭ. Ale tańniej nie atrymałasia».

Pavodle słovaŭ sp.Valera, bolš paśpiachova zajmacca hetym napramkam možna tolki pry najaŭnaści ilhot i mahčymaści ich ažyćciaŭleńnia. Zakonam «Ab achovie navakolnaha asiarodździa» i zakonam «Ab adkidach» praduhledžanyja ilhoty ŭ padatkaabkładańni jurydyčnych asobaŭ i pryvatnych pradprymalnikaŭ, kredytavańnie mierapryjemstvaŭ pa achovie navakolnaha asiarodździa z respublikanskich i miascovych biudžetaŭ. Ale hrošy tam znachodziacca tolki dla dziaržaŭnych prahramaŭ.

Akramia hetaha, dziejnaść takoha pradpryjemstva zaŭsiody pad pilnym vokam pažarnych dy sanepidemstancyj. Papiera i plastyk – pažaraniebiaśpiečnyja, u butelkach zastajucca reštki napojaŭ, i letam na ich pach źlatajucca vosy. «Da nas prychodzić šmat entuzijastaŭ, mnohija sprabavali pracavać, ale bieź dziaržaŭnych ilhot i razumieńnia ŭsimi hetymi słužbami našych prablemaŭ chacia b na pieršapačatkovym etapie vyžyć pradpryjemstvu amal nie mahčyma. Usio, čym ja mahu ich siońnia padtrymać, heta damahčysia ad Minpryrody časovaha vyzvaleńnia ad ekalahičnaha padatku», – pieražyvaje spadar Jacuk.

❏

Za hod u Biełarusi

ŭtvarajecca 31 młn ton adkidaŭ. Ź ich 900 tys. musiać pierarablacca na druhasnuju syravinu. Z 570 tys. ton makulatury pierapracoŭvajecca 240 tys., z 27 tys. ton plastmasaŭ – 2,5 tys.

Mahutnaść škłopierapracoŭki składaje 60 tys. ton u hod pry ŭtvareńni 150 tys. U vyniku pierachodu šerahu pradpryjemstvaŭ na firmovuju taru dadatkova nieabchodna pierapracavać 180 tys. ton (500 młn. butelek).

• 0
• 0
• 0
• 0
• 0
• 0
• 0
• 0