«Ździekavalisia z majho dziciaci». Baćka školnicy raskazaŭ, jak jaje prymusili prasić prabačeńnia na kaleniach i pahražali, što zhvałciać

«Zabili strełku»

Mužčyna raskazvaje, što kanflikt adbyŭsia praz svarku jahonaj dački Mirasłavy ź inšaj dziaŭčynaj, Złataj. Pavodle jaho słoŭ, dziaŭčynki ŭžo kanfliktavali nie raz i jon vyrašaŭ hetyja pytańni ź jaje baćkam.

«Tut hety kanflikt pieraros u toje, što za Złatu zastupiŭsia chłopiec — uźnikli ŭ ich tam niejkija ŭzajemnyja abrazy. Za Mirasłavu taksama zastupiŭsia chłopčyk. Nu i, vobrazna kažučy, jany «zabili strełku». Dzie ŭžo ździekavalisia z majho dziciaci, prymušali stać na kaleni, prasić prabačeńnia, całavać ruku, kazali, [što] pastaviać rakam i zhvałciać. Heta było ŭsio ź niecenzurnaj łajankaj», — raskazvaje mužčyna.

Baćka paciarpiełaj školnicy nie vinavacić inšych vučniaŭ u tym, što tyja nie źviarnulisia da piedahohaŭ i nie raskazali pra toje, što adbyvajecca. Jon ličyć, što dzieci nie daviarajuć škole i mahli pabajacca być zackavanymi z boku adnahodkaŭ «za toje, što dzieści niešta raskazali». Pa słovach Uładzimira, jon užo čuŭ skarhi ad dački na abrazy z boku taho chłopca, ale «ŭsio vyrašaŭ mirna», «chadziŭ da jaho mamy i prasiŭ pryniać miery».

Paśla taho, što zdaryłasia, 19 lutaha, napisaŭ zajavu ŭ milicyju. Mužčyna zapytaŭ infarmacyju va UUS i spadziajecca, što ŭ milicyi z usim raźbiarucca. Pry hetym, miarkujučy ź jahonych słoŭ, kłasny kiraŭnik, a taksama pravaachoŭniki pravodzili apytańnie jahonaj dački biez prysutnaści baćkoŭ.

«Ja hatovy vyrašyć usio mirna, kali ŭ prysutnaści administracyi škoły hetyja dzieci vybačacca pierad maim dziciom i pahladziać mnie ŭ vočy. I kali majo dzicia kahości pakryŭdziła albo budzie dakazana, što kahości dzieści pakryŭdziŭ ja, taksama hatovy prynieści prabačeńni», — zajaviŭ Dziamiencijuk.

Uładzimir vykłaŭ skrynšoty telefonnaj pierapiski z čałaviekam, jaki, ź jahonych słoŭ, pradstaviŭsia ŭčastkovym i prasiŭ vyjści na suviaź. U paviedamleńniach toj prapanoŭvaŭ vyrašyć pytańnie pa telefonie, adkazvaŭ, što adpraŭka zapytanych Uładzimiram dakumientaŭ ad UUS «zojmie niekatory čas, a abmierkavać adno pytańnie treba raniej».

«Navošta ŭsio štučna ŭskładniać? Pierahavaryli i razyšlisia. Kali vas niešta biantežyć, mahu padjechać da vas dadomu i pierahavaryć tam», — napisaŭ jon u adkaz na admovu baćki heta rabić.

Paśla «milicyjanier» paprasiŭ vydalić «apublikavanyja ŭ sietcy Internet videa z hetaj nahody».

Pavialičyć

Pavialičyć

Na videa Uładzimir Dziamiencijuk kaža, što budzie abaraniać svaju dačku da kanca.

«Ja nikoli pra heta nie budu maŭčać. Dačuška, viedaj, što tata ciabie zaŭsiody abaronić, — skazaŭ jon, padziakavaŭšy dzieciam, jakija zastupalisia za Mirasłavu, i ŭ kamientary pad inšym videa dadaŭ: — Kali ja prapadu, to viedajcie, što ja išoŭ za dačušku. U mianie jość usie dokazy (skryn, aŭdyjo – i videazapisy). Usio nie skidaju. Čym vyrašycca ŭsio, skažu i vydalusia».

Škoła: «Nie našy vučni zładzili taki bałahan»

Žurnalistka «Lusterka» patelefanavała ŭ škołu № 30 Bresta jak zaniepakojenaja mama adnoj z vučanic. Jana spytała, ci pravodzicca ŭ škole pravierka paśla kanfliktu i publičnaha zvarotu baćki paciarpiełaj dziaŭčyny.

Namieśnik dyrektara pa vychavaŭčaj rabocie Michaił Kažamiakin adznačyŭ, što na videa Dziamiencijuka «mocna ŭsio pierabolšana».

«Tam kanflikt pamiž dźviuma dziaŭčynkami ŭ kłasie — jany naohuł dźvie siabroŭki. Niešta nie padzialili, i ich chłopčyki, tak by mović, zastupilisia za ich i pajšli raźbiracca. A potym usio pierarasło ŭ takoje, što jany i kampanii pryviali dla kolkaści, choć hetyja chłopcy taksama siabry pamiž saboj.

Ale heta nie našy vučni zładzili taki bałahan — heta tyja, kaho paklikali: z palitechničnaha kaledža, z univiersiteta (i navat nie našy vypuskniki)», — patłumačyŭ namieśnik dyrektara pa vychavaŭčaj rabocie.

U administracyi zapeŭnili, što ŭ škole «vielizarnaja kolkaść mierapryjemstvaŭ na temy bulinhu i seksualnaha hvałtu». I paraili ŭ kanfliktnych situacyjach baćkam i vučniam źviartacca da kłasnych kiraŭnikoŭ, psichołahaŭ i sacyjalnych piedahohaŭ.

«Abaviazkova źviartajciesia, padychodźcie, kali niejkija prablemy. Tamu što i hetamu ž tatu my prapanoŭvali: pryjdzicie ŭ škołu, pahavorym, raźbiaremsia. I prapanoŭvali sustrecca z baćkami taho chłopca, — dadaŭ piedahoh. — Niešta budziem vyrašać. Navošta treba było heta vystaŭlać na ŭvieś śviet, jašče i pra svaju dačku, niezrazumieła. Usim zaŭsiody možna sustrecca, abmierkavać, kanfidencyjna — jak vy ličycie patrebnym. Lepš spačatku źviarnucca ŭ škołu, nie vynosiačy, jak toj kazaŭ, śmiećcie z chaty».

Namieśnik dyrektara zapeŭniŭ, što ŭ škole nie było bulinhu ŭ dačynieńni da paciarpiełaj vučanicy.

«Pakul nijakaha rašeńnia niama, ale zajmajucca i pravaachoŭnyja orhany, i ŭpraŭleńnie adukacyi, — skazaŭ jon. — Ale, ja dumaju, vy viedajecie, što tam za błohier — hety mužčyna, jakoha vy bačyli.

Pra Uładzimira Dziamiencijuka vosieńniu 2024 hoda pisała vydańnie BG.Media. U fejsbuku mužčyna vykłaŭ post z raskazam pra siabie, dzie zhadvaje, što raniej kiravaŭ arhanizacyjaj «Inicyjatyva-M», realizoŭvaŭ u horadzie moładzievyja prajekty, «jeździŭ pa papraŭčych kałonijach i zaklikaŭ źniavolenych žyć pa zakonach». Taksama pryznajecca, što pracavaŭ na KDB «za biaspłatna, staraŭsia dla krainy, ale, jak tolki admoviŭsia pracavać na KDB, pačałosia piekła». Pa słovach mužčyny, jaho «źlili kryminalitetu, navat chacieli zastrelić u 2013 hodzie», a paśla padviarhali ckavańniu i pieraśledam, «dvojčy pryznavali chvorym pa linii psichijatryi, ale zmahaŭsia, i dyjahnaz prybrali».

Na tym kanale Uładzimira, dzie jon vykładvaŭ videa ab tym, što zdaryłasia z dačkoj, taksama jość post z zajavaj na imia hałoŭnaha doktara Bresckaha psichanieŭrałahičnaha dyspansiera, u jakim mužčyna kaža pra pryjom psichatropnych preparataŭ, prapisanych lekarami, i ich pabočnaje dziejańnie. Zajava taksama padpisanaja 19 lutaha 2025 hoda.

U aŭtara rolikaŭ pra školny kanflikt jość inšy tyktok, u im jon vykładvaŭ videa raniej. Naprykład, mužčyna prasiŭ pra sustreču z «prezidentam Biełarusi Alaksandram Łukašenkam». 

• 0
• 0
• 1
• 9
• 1
• 10
• 2
• 0