28 lutaha ŭkrainskaja i amierykanskaja delehacyi płanavali padpisać dvuchbakovaje pahadnieńnie ab vykapniach. Pierad padpisańniem Tramp, Zialenski i Vens praviali pres-kanfierencyju, na jakoj pasvarylisia — u žyvym efiry. Kanał «Byť Ili» publikuje stenahramu hetaj razmovy.
Pačałosia z pytańnia žurnalista pra toje, ci ličyć Tramp, što jon zanadta abjadnaŭsia z Pucinym.
Tramp: Kali b ja nie abjadnaŭsia z abodvuma ź ich, u nas nie było b ździełki. Jon [Zialenski] choča, kab ja kazaŭ kiepskija rečy pra Pucina, a potym telefanavaŭ jamu i tak: pryvitańnie, Uładzimir, jak tam u nas ździełka? Tak heta nie pracuje. Ja nie abjadnaŭsia z Pucinym, ja nie abjadnaŭsia ni z kim, ja abjadnaŭsia z ZŠA. Vy bačycie, kolki nianaviści ŭ jaho [Zialenskaha] da Pucina, tak vielmi ciažka zaklučać ździełki. I ja razumieju heta, ale i druhi bok taksama jaho nie vielmi lubić. Tak što heta nie pytańnie, z kim ja abjadnaŭsia. Vy chočacie, kab ja byŭ žorstkim — ja mahu być samym žorstkim čałaviekam u śviecie, ale tak u nas nie budzie ździełki.
Umiašaŭsia Vens.
Vens: Na praciahu čatyroch hadoŭ u nas byŭ prezident, jaki drenna kazaŭ pra Pucina, a potym Pucin uvarvaŭsia va Ukrainu i razburyŭ značnuju častku krainy. Šlach da miru i dabrabytu, mahčyma, lažyć u dypłamatyi. My sprabavali šlach Džo Bajdena — bić siabie ŭ hrudzi i ŭjaŭlać, što słovy prezidenta ZŠA značać bolš, čym jaho dziejańni. Što robić Amieryku dobraj krainaj — heta toje, što jana ŭdzielničaje ŭ dypłamatyi. Heta toje, što robić Tramp.
Zialenski: Mahu ja vas spytać?
Vens: Kaniešnie.
Zialenski: Jon akupavaŭ vialikija častki Ukrainy, uschod, Krym — u 2014-m. Na praciahu mnohich hadoŭ, nie tolki Bajdena, ale i Abamy, Trampa, Bajdena, ciapier znoŭ Trampa, i daj boh, kab Tramp zaraz spyniŭ jaho. Ale ŭ 2014-m nichto jaho nie spyniŭ. Jon akupavaŭ, zabiŭ.
Tramp: 2015-ty?
Zialenski: 2014-ty.
Tramp: Mianie tady nie było.
Zialenski: Tak. Ale z 2014 da 2022 była taja ž situacyja, ludzi pamirali na linii sutyknieńnia. Nichto nie spyniŭ jaho. U nas byli razmovy ź im. Ja ŭdvaich ź im havaryŭ. My padpisali, kali ja staŭ prezidentam, ździełku ŭ 2019-m. Tam byŭ Makron i Mierkiel — my padpisali prypynieńnie ahniu. Usie kazali mnie, što jon nikoli nie pojdzie. I jon parušyŭ prypynieńnie ahniu. Zabiŭ ludziej. Nie mianiaŭ pałonnych. My damovilisia ab hetym, ale jon hetaha nie zrabiŭ. Ab jakoj dypłamatyi vy kažacie, Džej Dzi?
Vens: Ja kažu ab dypłamatyi, jakaja spynić razbureńnie vašaj krainy.
Zialenski: Tak, ale kali vy jaho nie spynicie…
Vens: Spadar prezident, pry ŭsioj pavazie, ja dumaju, heta niepavaha z vašaha boku pryjechać u Bieły dom i spračacca ab hetym pierad amierykanskimi miedyja. Ciapier vy prymusova mabilizujecie pryzyŭnikoŭ, tamu što ŭ vas prablemy z žyvoj siłaj. Vy pavinny być udziačnyja prezidentu za toje, što jon sprabuje pakłaści hetamu kaniec.
Zialenski: Vy byli va Ukrainie, kab kazać ab našych prablemach? Schadzicie choć by raz.
Vens: Ja bačyŭ historyi. I ja viedaju, što adbyvajecca. Ludzi pryjazdžajuć da vas na prapahanda-tur. Vy nie zhodnyja, što ŭ vas prablemy z mabilizacyjaj? Vy dumajecie, što heta pavaha pryjechać u ofis prezidenta ZŠA i atakavać administracyju, jakaja sprabuje pieraškodzić razbureńniu vašaj krainy?
Zialenski: Padčas vajny va ŭsich jość prablemy. Navat u vas, ale ŭ vas jość vydatny akijan, tamu vy nie adčuvajecie. Ale vy adčujecie heta ŭ budučyni. Daj boh, kab u vas nie było vajny.
Tramp: Vy hetaha nie viedajecie. Nie viedajecie. Nie kažycie nam, što my adčujem. My chočam vyrašyć prablemy. Vy nie ŭ tym stanoviščy, kab dyktavać nam.
Zialenski: Ja nie kažu vam, ja adkazvaju na pytańnie.
Tramp: Vy nie ŭ stanoviščy, kab dyktavać nam, što my adčujem. My budziem adčuvać siabie vielmi dobra i vielmi mocna.
Zialenski: Vy adčujecie ŭpłyŭ.
Tramp: Vy nie ŭ vielmi dobrym stanoviščy. Vy dazvolili sabie być u vielmi drennym stanoviščy.
Zialenski: Z samaha pačatku vajny… Z samaha pačatku vajny…
Tramp: Vy nie ŭ tym stanoviščy. U vas niama kart na rukach. Z nami ŭ vas buduć karty.
Zialenski: Ja nie hulaju ŭ karty. Ja vielmi surjozny.
Tramp: Vy hulajecie ŭ karty. Vy hulajecie žyćciami miljonaŭ ludziej.
Zialenski: Ja prezident krainy padčas vajny.
Tramp: Vy hulajecie z Treciaj suśvietnaj.
Zialenski: Ab čym vy kažacie?
Tramp: I toje, što vy robicie — nie pavaha da krainy. Da hetaj krainy.
Zialenski: U mianie vialikaja pavaha da vašaj krainy.
Vens: Skazali vy choć raz dziakuj za ŭvieś hety čas?
Zialenski: Tak, i siońnia kazaŭ.
Vens: Vy pajechali ŭ Piensilvaniju i ŭdzielničali ŭ kampanii našych apanientaŭ. Skažycie niekalki słoŭ udziačnaści Amierycy i prezidentu, jaki choča vyratavać vašu krainu.
Zialenski: Kali łaska, vy dumajecie, što kali vy budziecie kazać pavyšanym hołasam pra vajnu…
Tramp: Jon nie kaža pavyšanym hołasam. U vašaj krainie vialikija prablemy.
Zialenski: Mahu ja zadać pytańnie?
Tramp: Pačakajcie. Nie-nie. Vy i tak nakažacie. U vašaj krainie vialikija prablemy.
Zialenski: Ja viedaju.
Tramp: Vy nie vybieraciesia z hetaha. U vas jość dobry šans narmalna vyjści dziakujučy nam.
Zialenski: Spadar prezident, my ŭ našaj krainie, my mocna staim. Z samaha pačatku vajny my byli adny, i my ŭdziačnyja. Ja kazaŭ dziakuj u hetym kabiniecie, i nie tolki ŭ hetym kabiniecie.
Tramp: Vy nie byli adny. Vy nie byli adny. My dali vam, hetamu durnomu prezidentu [Bajdenu] $350 miljardaŭ…
Zialenski: Vy hałasavali za hetaha prezidenta…
Tramp: My dali vam uzbrajeńnie. I vy zmahalisia śmieła, ale vy vykarystoŭvali naša ŭzbrajeńnie.
Zialenski: Ab čym my havorym? Vy zaprasili mianie…
Tramp: Kali b nie naša ŭzbrajeńnie, hetaja vajna b zakončyłasia za dva tydni.
Zialenski: Ja čuŭ heta ad Pucina, za try dni, za dva tydni…
Tramp: Mahčyma, navat mienš. Budzie vielmi ciažka zaklučyć ździełki takim čynam.
Vens: Skažycie dziakuj.
Zialenski: Ja šmat razoŭ kazaŭ dziakuj amierykanskamu narodu.
Vens: Pryniaty roznahałośsi. I davajcie abmiarkujem hetyja roznahałośsi, zamiest taho, kab bicca pierad amierykanskimi miedyja, kali vy nie majecie racyju. My viedajem, što vy nie majecie racyju.
Tramp: Ale ja dumaju, vielmi dobra, kab amierykancy pabačyli, što adbyvajecca. Vy pavinny być udziačnyja.
Zialenski: Ja ŭdziačny.
Tramp: U vas niama kart. U vas ludzi pamirajuć, u vas zakančvajucca sałdaty.
Zialenski: Ja viedaju, kali łaska, spadar prezident.
Tramp: A ciapier vy kažacie (kryvić jaho): ja nie chaču spynieńnia ahniu, ja nie chaču spynieńnia ahniu. Kali ŭ vas budzie spynieńnie ahniu, vy pavinny heta pryniać, kab kuli spynilisia, a vašy ludzi pierastali pamirać.
Zialenski: Kaniešnie, my chočam spynić vajnu.
Tramp: Ale vy kažacie, što nie chočacie spynieńnia ahniu.
Zialenski: Ale ja kazaŭ vam, nam patrebny harantyi.
Tramp: Bo spynieńnie ahniu budzie chutčej, čym damovy.
Zialenski: Spytajciesia, što našy ludzi dumajuć ab spynieńni ahniu?
Tramp: Tak nie było sa mnoj. Tak było z tym chłopcam pa imieni Bajden, jaki nie zanadta razumny čałaviek.
Zialenski: Ale heta byŭ vaš prezident.
Tramp: Tak było z Abamaj, chto daŭ vam koŭdry, a ja daŭ vam «Džavieliny», kab vy vybili ŭsie hetyja tanki. Abama daŭ vam koŭdry. Vy pavinny być bolš udziačnyja. Tamu što ja pavinien skazać vam: u vas niama kart. Z nami ŭ vas jość karty. Ale biez nas u vas nijakich kart. Tak budzie vielmi ciažka zaklučyć ździełku. Tamu što staŭleńnie pavinna źmianicca.
Žurnalist: Ale što kali Rasija parušyć spynieńnie ahniu? Ja razumieju, što heta napružanaja dyskusija…
Tramp: A što kali, a što kali. A što kali bomba ŭpadzie vam na hałavu zaraz? Što kali jany jaje parušać… Ja nie viedaju, jany b parušyli jaje pry Bajdenie, bo Bajdena jany nie pavažali, jany nie pavažali Abamu. Jany pavažali mianie. Pucin prajšoŭ praz šmat z mnoj. Vy čuli pra spravu Chantera Bajdena? Tam byŭ hučny demakratyčny skam. I jon prajšoŭ praz heta. My prajšli praz šmat i heta nie zakončycca vajnoj. Usio heta było z vanny Chantera Bajdena, ź jaho spalni. Heta było brydka. A potym jany kažuć, što, o, toj noŭtbuk byŭ padrobleny Rasijaj. Usio heta machlarstva. Usio, što ja mahu skazać: jon moh parušyć ździełki z Abamaj, z Bušam. Jon moh parušyć ździełki z Bajdenam. Moža być, ja nie viedaju. Ale jon nie parušyŭ ździełki sa mnoj. Jon [Pucin] choča ździełku, ja nie viedaju, ci zaklučyć jon. Ale prablema ŭ tym, što ja daŭ vam [Zialenskamu] mahčymaść być krutym chłopcam. Ale małavierahodna, što vy budziecie krutym chłopcam biez ZŠA. Vašy ludzi vielmi chrabryja. Ale my abo robim ździełku, abo vy pa-za hulnioj. A kali vy pa-za hulnioj — ja dumaju, vy adčujecie, heta budzie nie vielmi pryjemna. Ale ŭ vas niama kart».
Tramp — Zialenskamu: Biez našaj zbroi vy b nie pratramalisia b i dvuch tydniaŭ
Zialenski paśla zvadki z Trampam stelefanavaŭsia z prezidentam Francyi i hiensakam NATA
Bieły dom apublikavaŭ zajavu pa vynikach pres-kanfierencyi Trampa i Zialenskaha
Zialenski padziakavaŭ Amierycy za padtrymku i svoj vizit
Tramp i Zialenski pasvarylisia ŭ žyvym efiry
Filipienka raskazaŭ, ad kolkich svaich knih admoviŭsia b i čamu pradaŭ «Tesłu»2
Kamientary