Jak na zamovu FSB płanavali vykraści Chrysta Hrozieva — detali špijonskaj apieracyi, jakaja ciahnułasia dva hady

14 śniežnia 2020 hoda The Insider i Bellingcat apublikavali rasśledavańnie ab atručvańni Navalnaha. U im byli nazvanyja sapraŭdnyja imiony i imiony prykryćcia supracoŭnikaŭ FSB z Druhoj słužby i Centra śpiecyjalnych technałohij (NDI-2), jakija mieli dačynieńnie da hetaj spravy. U toj ža dzień Upraŭleńnie ŭłasnaj biaśpieki FSB pa asabistym daručeńni Uładzimira Pucina atrymała zahad vyśvietlić, jakim čynam źviestki mahli trapić da aŭtara rasśledavańnia — bałharskaha žurnalista Chrysta Hrozieva.

Jak piša The Insider, viečaram taho ž dnia źbiehły ŭ Rasiju zavierbavany FSB były apieracyjny dyrektar Wirecard Jan Marsalek praz svajho znajomaha bałharyna Arlina Rusieva prosić arhanizavać sačeńnie za Hrozievym. U pierapiscy z Marsalekam mužčyna pachvaliŭsia, što maje čatyry sakretnyja kamandy pa 12 čałaviek kožnaja i moža arhanizavać sačeńnie 24/7.

Akramia Rusieva, Marsalek z anałahičnaj prośbaj źviarnuŭsia da byłoha vysokapastaŭlenaha aficera aŭstryjskaj śpiecsłužby BVT Marcina Vajsa. Toj daručaje hetuju spravu svajmu padnačalenamu Ehista Otu.

U pierapiscy Vajs nazvaŭ Hrozieva «byłym ahientam CRU», što, mahčyma, było vydumkaj, ale praź niekalki dzion Uładzimir Pucin nazvaŭ rasśledavańnie «lehalizacyjaj danych amierykanskich śpiecsłužbaŭ».

Pavialičyć

30 studzienia 2021 hoda Hrozieŭ i inšy aŭtar rasśledavańnia, Raman Dabrachotaŭ, jaki znachodziŭsia ŭ Maskvie, stali aficyjnymi abjektami sačeńnia FSB.

Pieršaje fijaska FSB

U lutym 2021 hoda FSB vyśvietliła, što źviestki pra ahientaŭ žurnalistam zdabyli zvyčajnyja machlary z dapamohaj padroblenych dakumientaŭ — falšyvych zapytaŭ MUS i rašeńniaŭ suda adnaho z rajonaŭ Maskvy. Adnak FSB praciahnuła pieraśledavać Chrysta Hrozieva i Ramana Dabrachotava, spadziejučysia znajści dokazy ich suviazi z zachodnimi śpiecsłužbami.

6 sakavika ŭ aeraporcie «Šaramiećcieva» FSB pad vyhladam apytańnia ab COVID-19 zaprašaje Dabrachotava, jaki viartajecca z kamandziroŭki, na razmovu. U hety čas inšyja supracoŭniki biespaśpiachova sprabujuć atrymać dostup da jaho noŭtbuka i telefona.

Na praciahu niekalkich miesiacaŭ dźvie hrupy — adna pad kiraŭnictvam Ehista Ota, druhaja — Arlina Rusieva — sprabujuć vysačyć Hrozieva i atrymać dostup da jaho hadžetaŭ.

U lipieni abmiarkoŭvajecca ŭžo nie tolki sačeńnie, ale i vykradańnie. Rusieŭ prapanuje padsypać Hrozievu narkotyki i vyvieźci ŭ Maskvu, ale Marsalek admaŭlajecca.

26 lipienia Rusieŭ paviedamlaje, što Hrozieŭ u Bałharyi, i jaho lohka złavić. Jaho ludzi pamyłkova ličać, što žurnalist vałodaje łodkaj, na jakoj jon robić sełfi i vykładvaje ŭ internet. Niekalki dzion sačeńnia za łodkaj nie dajuć vynikaŭ, bo Hrozieva na joj užo niama.

Paralelna śpiecsłužby ŭ Maskvie sprabujuć nie dać vyjechać za miažu Dabrachotavu. U ramkach spravy ab paklopie jany pravodziać pieratrus u jaho kvatery, zabirajuć usie hadžety i zamiežnyja pašparty. Praz dva dni Dabrachotaŭ praź les pierachodzić rasijska-ŭkrainskuju miažu.

Kamanda Rusieva tym časam zmahła vyjści na śled Hrozieva i pačała sačeńnie za domam, u jakim bačyli žurnalista. Adnak špijony nie zaŭvažyli, jak jon adtul źjechaŭ ranicaj. U vyniku sačeńnie praciahvałasia dva dni, i abmiarkoŭvalisia mahčymaści praniknieńnia ŭ dom — siarod ich padpał abo napad. Ale ŭ apošni momant vyśvietliłasia, što Hrozieŭ užo ŭ Kijevie. Rusieŭ u panicy apraŭdvaŭsia, što Hrozieŭ moh vykarystoŭvać dvajnika.

Pieraśled praciahvajecca: Ukraina i Viena

Paśla ŭciokaŭ z Rasii Raman Dabrachotaŭ chavajecca ŭ Kijevie, dzie atrymlivaje časovy dakumient zamiest zamiežnaha pašparta. U kancy miesiaca jon sustrakajecca z Chrysta Hrozievym, ale nie ŭ Bałharyi, jak płanavałasia, a ŭ Karpatach.

Praź miesiac krynica ŭ SBU paviedamlaje Dabrachotavu, što ŭkrainskaja kryminalnaja hrupoŭka atrymała zakaz z Maskvy na jaho vykradańnie i vyvaz u Rasiju za $50 tysiač. Adnak bandyty nie paśpiavajuć jaho znajści — 30 žniŭnia Dabrachotaŭ źjazdžaje ŭ Aŭstryju i pasialajecca na toj ža vulicy, što i Hrozieŭ. U hety čas tudy pryjazdžajuć ludzi Marsaleka i zdymajuć kvateru nasuprać dla zručnaha nazirańnia.

Adnak kamanda Rusieva, jakaja składajecca ź niekalkich bałharaŭ, nie maje dośviedu ŭ raźviedcy. Siarod ich: 43-hadovy miedycynski kurjer Bisier Džambazaŭ, jaho 33-hadovaja siabroŭka Katryn Ivanova, 39-hadovy dekaratar Cichamir Ivančaŭ, jaho byłaja dziaŭčyna, 30-hadovaja kaśmietołah Vania Habierava, a taksama były bajec MMA Ivan Stajanaŭ.

Pavialičyć

Jany hublajuć Hrozieva ŭ horadzie i nie zaŭvažajuć, kali jon źjazdžaje za miažu. Rusieŭ ža piša Marsaleku ab vydumanych pośpiechach — «viarboŭcy» kanśjerža ŭ haścinicy i ściuardesy, pośpiechach Habieravaj u spakušeńni Hrozieva praz Facebook, jakim žurnalist na samoj spravie amal nie karystajecca.

Z svajho boku, FSB źmianiaje pohlad na toje, čyim ahientam źjaŭlajecca Hrozieŭ. Kali spačatku nazyvałasia CRU, to ciapier — MI-6. Ale dokazaŭ u ich pa-raniejšamu niama.

Palavańnie na pusty telefon i čužy noŭtbuk

U vieraśni 2021 hoda Hrozieŭ adpraŭlajecca ŭ Valensiju na sustreču Bellingcat. Za im sočać ahienty Marsaleka — jany zasialajucca ŭ toj ža hatel i pieradajuć fotazdymki sačeńnia. Dziakujučy padkuplenamu supracoŭniku Swissport, jany adsočvajuć pieraloty žurnalistaŭ.

Hałoŭnaja zadača zastajecca raniejšaj — vykraści telefon abo noŭtbuk žurnalistaŭ. Ahienty Rusieva razhladajuć rabavańnie, ale vyrašajuć dziejničać praz uzłom numaroŭ. Tak, u Valensii jany vykarystoŭvajuć pryładu dla kapiravańnia kodaŭ zamkoŭ, ale biespaśpiachova, bo błytajuć numary i zachodziać u čužy numar.

U lutym 2022 hoda Hrozieŭ lacić u Kijeŭ, i kamanda źbirajecca rušyć za im, ale Marsalek admianiaje misiju, namiakajučy, što ŭ FSB jość «inšyja płany».

Pieršy «pośpiech» prychodzić u červieni 2022 hoda: u Čarnahoryi jany ŭzłomvajuć numar Hrozieva i kraduć telefon. Adnak hadžet akazvajecca pustym — heta zapasny aparat dla pajezdak.

11 červienia 2022 hoda złačyncy pranikajuć u kvateru Hrozieva ŭ Vienie i dakładvajuć Marsaleku pra ŭzłom siejfa i vykradańnie noŭtbuka. Ale siejfa ŭ Hrozieva nikoli nie było, a noŭtbuk, chutčej za ŭsio, naležaŭ jaho niabožčycy-maci, u kvateru jakoj jany i trapili. Paźniej FSB atrymlivaje noŭtbuk, ale znachodzić tam tolki staryja fotazdymki — znoŭ pravał.

Zabić, kali vykraści nie atrymajecca

7 žniŭnia 2022 hoda Marsalek prapanuje Rusievu płan vykradańnia Ramana Dabrachotava ŭ Vialikabrytanii, dzie toj tady žyŭ, i pieradačy jaho rasijskim śpiecsłužbam u mižnarodnych vodach.

Jak alternatyŭny scenaryj złačyncy abmiarkoŭvajuć mahčymaść zabojstva. Rusieŭ prapanuje arhanizavać «niaščasny vypadak u dušy». Marsalek patrabuje «bolš dramatyzmu».

Adnak, niahledziačy na ​​hučnyja idei, jany navat nie viedajuć dakładnaha adrasa Dabrachotava, tady jak sami žurnalisty ŭžo daŭno vałodajuć usioj infarmacyjaj pra Marsaleka — miesca pražyvańnia ŭ Maskvie, paluboŭnic, kurataraŭ i navat vyniki jaho miedycynskich analizaŭ.

U siaredzinie žniŭnia Marsalek paviedamlaje, što FSB admoviłasia ad vykradańnia z-za vysokaj ryzyki: usia kamanda Rusieva žyła ŭ Brytanii, i palicyja lohka b ich vyličyła.

U śniežni 2022 hoda Rusieŭ pytajecca, ci sapraŭdy Rasija zapytała ordar na aryšt Hrozieva. Marsalek paćviardžaje.

U adkaz na pytańnie Rusieva, ci abvieściać Hrozieva ciapier u vyšuk praź Interpoł, Marsalek adkazvaje:

«Ja dumaju, usio, akramia vykradańnia, budzie biessensoŭna. Heta pavinna być u śpisie našych spraŭ na 2023 hod». Praz dva dni jon dadaje: «Ordar na aryšt, vidać, źjaŭlajecca pravavoj asnovaj, nieabchodnaj dla vykradańnia. Asabista ja liču, što Hrozieŭ nie vielmi kaštoŭnaja meta, ale, miarkujučy pa ŭsim, Pucin jaho surjozna nienavidzić».

Płanam na 2023 hod nie nakanavana było spraŭdzicca. U studzieni ŭsiu kamandu Rusieva, u tym liku jaho samoha, aryštoŭvajuć.

Pavialičyć

U ich ofisie vyjaŭlajuć ceły skład špijonskaha abstalavańnia, mnostva falšyvych dakumientaŭ, u tym liku falšyvyja žurnalisckija paśviedčańni, a ŭ ich telefonach znachodziać pierapisku z Marsalekam, jakaja zatym laža ŭ asnovu abvinavačańnia.

7 sakavika hetaha hoda naniatyja Marsalekam hramadzianie Bałharyi prysiažnymi Łondanskaha kryminalnaha suda Ołd-Biejli byli pryznanyja vinavatymi ŭ špijanažy na karyść Rasii.

• 22
• 0
• 8
• 7
• 1
• 0
• 2
• 0