U Hiermanii mužčyna, nazvaŭšysia «hienierał-lejtenantam», ceły hod ździekavaŭsia ź siamji i rychtavaŭ jaje da adbićcia vydumanaj ataki
U Hiermanii razhareŭsia skandał paśla vykryćcia Marvina B., jaki, vydajučy siabie za vysokapastaŭlenaha vajskoŭca, teraryzavaŭ siamju ŭ adnoj z maleńkich viosak Vierchniaj Švabii (paŭdniovy zachad Hiermanii), piša Bild.
Marvin B. pradstaŭlaŭsia «hienierał-lejtenantam» i supracoŭnikam śpiecnaza KSK, vykarystoŭvajučy manipulacyi dla padparadkavańnia davierlivych ludziej.
U žniŭni 2023 hoda Marvin B. paznajomiŭsia z 18-hadovaj dziaŭčynaj pa imieni Liza (imia źmieniena) i chutka ŭvajšoŭ u davier da jaje siamji. Jon pierakanaŭ ich, što na dom rychtujecca napad, i tolki jon moža pieratvaryć žyllo ŭ «abaronieny abjekt».
«Jon skazaŭ, što nam pahražaje śmierć i što nam nielha vychodzić z doma. Kab zastavacca ŭ formie, nam davodziłasia vykonvać praktykavańni ź miaškami ź piaskom. Jon taksama prymušaŭ nas skakać na adnoj nazie», — raspavioŭ žurnalistam baćka siamji.
Złačyniec prydumaŭ nieisnujučych sałdat, stvaryŭ falšyvyja akaŭnty ŭ sacsietkach i pačaŭ šantažavać členaŭ siamji.
Asabliva žorstkimi byli jaho dziejańni ŭ dačynieńni da žančyn.
Jon pahražaŭ dačce, što zabje vydumanaha «vajennaha doktara», kali jana nie pahodzicca na seksualny kantakt i nie zdymie heta na videa. Pad ciskam dziaŭčyna i jaje siabroŭka vykanali jaho patrabavańni.
Baćka siamji paźniej pryznaŭsia, što navat addaŭ złačyncu 30 000 jeŭra na «lačeńnie jaho chvoraj dački». Tolki praz hod siabroŭka siamji źviarnułasia ŭ palicyju, i praŭda raskryłasia.
Sud pryznaŭ Marvina B. vinavatym u dvuch vypadkach zhvałtavańnia, machlarstvie, parušeńni praviłaŭ darožnaha ruchu (jon kiravaŭ aŭtamabilem biez pravoŭ, prykryvajučysia «słužbovaj nieabchodnaściu»).
Marvina B. pryhavaryli da čatyroch z pałovaj hadoŭ pazbaŭleńnia voli.
Kamientary