U litoŭskim MUS raskrytykavali prapanovy pa novych abmiežavańniach dla biełarusaŭ
Viedamstva ličyć, što prapanavanyja miery stvorać dadatkovuju nahruzku na pamiežnikaŭ i Departamient mihracyi, a ŭ niekatorych vypadkach ich budzie ciažka realizavać.
Ministerstva ŭnutranych spraŭ Litvy vykazała zaniepakojenaść płanami pa dalejšym pastražeńni abmiežavańniaŭ dla hramadzian Rasii i Biełarusi, piša Delfi.
U litoŭskim viedamstvie ličać, što hałoŭnuju prapanovu — anulavańnie VNŽ dla tych rasijanaŭ i biełarusaŭ, jakija vyjazdžali na radzimu bolš za adzin raz za try miesiacy, — budzie składana arhanizavać.
«Dziaržaŭnaja pahraničnaja słužba nie zmoža adsačyć, kali čałaviek ujazdžaje ŭ Litvu praź inšuju krainu ES, naprykład, Polšču. A Departamient mihracyi nie zmoža pravieryć, kolki razoŭ hramadzianin pierasiok miažu Jeŭrasajuza», — zajaviła namieśnica ministra ŭnutranych spraŭ Alicyja Ščarbajcie.
Taksama ŭ MUS Litvy zajavili, što prapanova zabaranić padavać novyja zajavy na VNŽ dla biełarusaŭ supiarečyć jeŭrapiejskamu zakanadaŭstvu. U pryvatnaści, ES patrabuje zachoŭvać prava na ŭźjadnańnie siemjaŭ, a taksama nie abmiažoŭvać pierajezd vysokakvalifikavanych śpiecyjalistaŭ.
Na hety momant Siejm Litvy ŭžo padoŭžyŭ nacyjanalnyja sankcyi suprać hramadzian Rasii i Biełarusi da 2026 hoda, adnak novyja abmiežavańni pakul zastajucca na stadyi abmierkavańnia.
Kamientary