«Dzień vyzvaleńnia Amieryki». Donald Tramp abviaściŭ usiamu śvietu handlovuju vajnu

Tramp ličyć, što handlovyja barjery prymusiać siabroŭ i vorahaŭ pajści jamu na sastupki — finansavyja i terytaryjalnyja. Ekanamisty papiaredžvajuć, što ciapier žyć budzie ciažej usim, u tym liku amierykancam, jakija i zapłaciać uviedzieny Trampam padatak na impart.

«Siońnia — Dzień vyzvaleńnia, — skazaŭ Tramp. — Heta adzin z samych važnych dzion u amierykanskaj historyi, heta — dekłaracyja amierykanskaj ekanamičnaj niezaležnaści».

«My znoŭ zrobim Amieryku vialikaj i bahataj. Našu krainu abdzirali bolš za 50 hadoŭ. Takoha bolš nie budzie». Tramp svaim ukazam uvioŭ taryf 34% suprać Kitaja, 20% suprać Jeŭrasajuza, 24% suprać Japonii i 26% suprać Indyi.

Najbiadniejšyja krainy tradycyjna ŭ zbory dachodaŭ u biudžet bolš spadziajucca na impartnyja pošliny, čym na padatki.

Bahatyja — naadvarot: ich siaredni taryf na impart nie pieravyšaje niekalkich pracentaŭ. U vyniku mieraŭ Trampa ZŠA ciapier budzie spahaniać ź biednych krain, kštałtu Vjetnama i Mjanmy, impartnyja pošliny pad 50%.

Uvohule nivodnaja kraina nie paźbiehnie zboraŭ z amierykancaŭ za kuplu jaje tavaraŭ — «minimalny bazavy taryf» składzie 10%.

Ahulnaja pošlina ŭstupić u siłu 5 krasavika, pavyšanyja — 9 krasavika.

Adnak usio heta moža źmianicca ŭžo zaŭtra, jak heta nieadnarazova zdarałasia z papiarednimi taryfnymi rašeńniami Trampa. Jon skazaŭ, što hatovy da pieramovaŭ, i kali kamu nie padabajucca novyja pošliny — admianiajcie svaje, i pahladzim.

Nadzvyčajnyja miery

Kab uvieści taryfy ŭkazami ŭ abychod Kanhresa, Tramp pašyryŭ traktoŭku pahroz nacyjanalnaj biaśpiecy i ŭklučyŭ u ich lik handlovy deficyt ZŠA. Na hetaj padstavie jon abviaściŭ nadzvyčajnaje stanovišča, jakoje nadaje jamu paŭnamoctvy ŭvodzić pošliny biez ahladki na zakanadaŭcaŭ. ZŠA — najbujniejšaja ekanomika śvietu, ź jakoj žadajuć handlavać usie.

Tramp ličyć, što handlovyja partniory nažyvajucca na Amierycy, bo pradajuć joj bolš tavaraŭ, čym kuplajuć u jaje, a ich taryfy vyšejšyja za amierykanskija. Siońniašnija ŭviedzienyja taryfy zaklikanyja vyraŭniać praviły hulni, kaža jon. Try hałoŭnyja mety Trampa — Jeŭrasajuz (druhaja ekanomika śvietu), Kitaj (treciaja) i Kanada ź Mieksikaj (susiedzi i partniory pa mytnym sajuzie). Na ich prypadaje lvinaja dola deficytnaha tavaraabarotu ZŠA. Suprać ich i nakiravaŭ svoj taryfny hnieŭ amierykanski prezident.

Usie jany adkazvajuć, što svabodny handal nie źjaŭlajecca hulnioj z nulavoj sumaj, i ad jaho vyjhrajuć usie ŭdzielniki, što nahladna prademanstravała historyja suśvietnaj ekanomiki za apošnija paŭstahodździa. Usie jany rychtujucca ŭvieści pošliny ŭ adkaz, ale ŭsio jašče spadziajucca damovicca.

A pakul što śviet pračynajecca ŭ novaj realnaści, u jakoj samaja mocnaja i bahataja kraina płaniety adharodžvajecca ad usich taryfnymi barjerami i hatovaja razaryć susiedziaŭ dziela ŭłasnaha roskvitu.

Jakimi buduć taryfy paśla taho, jak kožnaja z krain damovicca abo paspračajecca z Trampam u vyniku budučych pieramovaŭ, pradkazać niemahčyma.

Adnak užo ciapier ekanamisty prykidvajuć, što pa rašeńni Trampa siaredni padatak na impartnyja tavary ŭ ZŠA vyraście da 10—15% ź ciapierašnich 3—4%.

Dla paraŭnańnia, u Jeŭrasajuzie ciapier siaredniaja pošlina — kala 5%, u Kitai — 7,5%, u Indyi — 17%.

Siaredni pakazčyk vielmi ŭmoŭny, jak siaredniaja tempieratura pa balnicy. Adnak jon pryblizna daje zrazumieć, jak pacierpić suśvietny handal i rost dabrabytu ŭ śviecie, kali abvieščanyja siońnia pošliny Trampa akažucca novaj realnaściu, a nie mimalotnaj prychaćciu, jak heta było z mnohimi jaho papiarednimi taryfnymi pačynańniami. Tramp abkładaŭ impartnymi padatkami roznyja krainy i tavary i ŭ pieršy termin, i na pačatku druhoha. Ale heta byli drobiazi ŭ paraŭnańni z tym, što jon ahučyŭ u Ružovym sadzie ŭ «Dzień vyzvaleńnia» Amieryki ad darmajedaŭ.

Tramp ličyć, što novyja pošliny adnoviać spraviadlivaść u handli. Kamanda Trampa rychtavała hetyja taryfy z momantu jaho viartańnia ŭ Bieły dom u studzieni.

Kali ŭ pieršy termin Tramp hałoŭnym čynam vioŭ handlovyja bai z Kitajem, to hetym razam akramia hałoŭnaha supiernika jon naceliŭsia i na ŭsich hałoŭnych siabroŭ.

• 2
• 1
• 5
• 29
• 1
• 0
• 1
• 0