Mnohim biełarusam za miažoj pastajanna śnicca hety kašmar. Što rabić?
Šmat kamu z emihrantaŭ śnicca: ty vypadkova traplaješ u Biełaruś i musiš uciakać, bo tam niebiaśpiečna. Što heta za fienomien?
Jurystka Kaciaryna Dziajkała raskazvaje, što časta bačyła padobnyja sny pieršyja dva hady emihracyi:
«Byccam ja pryjazdžaju ŭ Biełaruś, pakul tam jašče ŭsio nie skončyłasia. I tolki tam uśviedamlaju, što nie viedaju, jak budu jechać nazad, jak mianie ciapier vypuściać. Heta vielmi strašna. A kali pračynaješsia i razumieješ, što ty ŭ biaśpiecy — heta pačućcio, jakoje ni z čym nie paraŭnać.
Časam śniłasia, što ja ŭciakaju, a za mnoj honiacca i stralajuć u śpinu takija, prosta jak z kino, fašysty. A niadaŭna pryśniłasia madyfikavanaja viersija — što ja za miažoj vypadkova trapiła na terytoryju biełaruskaha pasolstva, i kali zrazumieła i stała vychodzić, pierad mnoj zamknulisia dźviery. I heta była panika».
Ale byvajuć u Kaciaryny i dobryja sny pra Biełaruś. Jana zhadvaje son pra Minsk, pra zality soncam praśpiekt. Ale hety son adroźnivajecca i časam viartańnia — u im havorka išła ŭžo pra demakratyčnuju Biełaruś.
Žurnalistka Volha Arsieńnieva taksama časam bačyć sny pra ŭcioki ź Biełarusi.
«Ja baču sny, nibyta ja znoŭ u Minsku. Ale ž zamiest radaści, što znoŭ baču rodnyja vulicy, ja adčuvaju paniku — maŭlaŭ, jak ža zdaryłasia, što ja apynułasia tam? Ja nie chaču ŭ turmu, ja nie vytrymaju katavańniaŭ, ja chaču žyć! I jak ciapier źbiehčy nazad? I dzie maja dačka, ja ž pavinna jaje taksama vyvieźci!
Nam z dačkoj było vielmi składana źjazdžać ź Biełarusi. Nichto, navat maja mama, nie viedaŭ, što my źjazdžajem. Nam čamuści admovili ŭ šenhienskich vizach, i z krainy my vyjazdžali z dapamohaj «Bajsoła», za što dziakuj im vialiki: kali b nie heta, ja b užo siadzieła ŭ turmie».
Volha kaža, što paśla takich snoŭ joj ciažka supakoicca, navat kali jana raspluščvaje vočy i bačyć, što znachodzicca ŭ biaśpiecy.
«Kali vy i nie brali ŭdzieł u pratestach, ale byli mocna ŭklučanyja ŭ padziei, vam mohuć śnicca takija sny»
Psichołah Vijaleta Nikicik razvažaje, što padziei 2020-ha, represii i emihracyja — heta ŭsichnaja biełaruskaja traŭma. Jana vielmi paŭpłyvała na kalektyŭnaje nieśviadomaje biełarusaŭ.
Takija pieražyvańni datyčać kožnaha, chto ličyć siabie biełarusam, čytaŭ pra pratesty ci braŭ u ich udzieł, kaža Vijaleta:
«Naprykład, ja ŭ žniŭni 2020-ha znachodziłasia ŭ ZŠA. Ale, jak i maje siabry, była ŭklučanaja ŭ padziei, my čytali naviny ź Biełarusi, hladzieli videarepartažy, i heta na nas mocna paŭpłyvała. Tamu kali vy i nie brali ŭdzieł u pratestach, ale byli mocna ŭklučanyja ŭ padziei, vam mohuć śnicca takija sny.
Što aznačaje taki son? Usio vielmi indyvidualna. Mahčyma, heta prosta častka kalektyŭnaha nieśviadomaha. Taksama treba ŭličvać, jakija pačućci byli ŭ čałavieka padčas hetaha snu. Mahčyma, taki son — prosta mietafaryčny adbitak hvałtu ci źmien, jakija ciapier adbyvajucca ŭ žyćci čałavieka».
Sny — pradukt našaha nieśviadomaha, sposab pakazać nam toje, što my nie razumiejem i nie asensoŭvajem u našym štodzionnym žyćci, što my vyšturchoŭvajem u nieśviadomaje. Mahčyma, vam pryśniŭsia taki son, tamu što vy šmat razmaŭlali na źviazanyja ź im temy ci znoŭ pačali ich zhadvać. Taksama takoje moža śnicca na niejkija hadaviny, źviazanyja z pratestami, na Dzień Voli.
Usio, što adbyvajecca ŭ vašym žyćci, moža śnicca praz zručnyja dla psichiki vobrazy, u tym liku i vobrazy ź minskich pratestaŭ. Naprykład, son z uciokami ź Biełarusi abaznačaje niejkaje zmahańnie ŭ vašym žyćci — naprykład, adbitak kanfliktu na pracy.
Važna, ź jakimi pačućciami i emocyjami vy pračnulisia paśla hetaha sna:
«Heta moža padkazać, što vy vyšturchoŭvajecie ŭ nieśviadomaje i što viartajecca da vas praz sny. Moža, niechta niedzie parušaje maje miežy, i ja nie mahu siabie abaranić, i praz son nieśviadomaje sprabuje da mianie dahrukacca nakont hetaha, pakazać, što ja niečaha nie zaŭvažaju».
My nie možam źmianić minułaje, jano prosta budzie mienš baleć, kaža psichołah. I dakładna nie treba bajacca hetych snoŭ. A najlepšy sposab — prosta padzialicca takimi snami z tymi, kamu daviaraješ: ź siabrami, partnioram, kalehami, psichołaham. Darečy, dobry instrumient dla analizu snoŭ — ChatGPT, maje klijenty taksama pra jaho kažuć», — adznačaje psichołah.
«Naša Niva» — bastyjon biełaruščyny
PADTRYMAĆCiapier čytajuć
Špakoŭski pra saŭładalnika «Varhiejminha» Kacałapava: Prafinansavaŭ pratesty na 296 tysiač dalaraŭ2
Kamientary