Vialikabrytanija moža admovicca ad adpraŭki miratvorcaŭ va Ukrainu z-za ryzyki vajny z Rasijaj
Vialikabrytanija i šerah jeŭrapiejskich krain, chutčej za ŭsio, admoviacca ad płana nakiravać dziasiatki tysiač sałdat va Ukrainu ŭ ramkach mižnarodnaj miratvorčaj misii. Jak paviedamlaje The Times sa spasyłkaj na dypłamatyčnuju krynicu, jakaja ŭdzielničaje ŭ pieramovach «kaalicyi achvotnych», asnoŭnaj pryčynaj hetaha stali aściarohi, što prysutnaść zamiežnych vojskaŭ moža pryvieści da pramoj kanfrantacyi z Rasijaj u vypadku parušeńnia režymu spynieńnia ahniu.
«Ryzyki zanadta vysokija, a dastupnyja siły nie adpaviadajuć maštabu zadačy. Brytanija zaŭsiody zajmała takuju pazicyju. Bolš ćviordy padychod prapanoŭvała Francyja», — raskazaŭ dypłamat na ŭmovach ananimnaści.
Pavodle infarmacyi vydańnia, u Łondanie i inšych jeŭrapiejskich stalicach ciapier surjozna razhladajecca alternatyŭny scenar, pry jakim zachodnija vajskoŭcy nie buduć raźmieščanyja na ŭkrainskaj terytoryi dla achovy haradoŭ, partoŭ i jadziernych abjektaŭ.
Šerah jeŭrapiejskich lidaraŭ miarkujuć, što demanstratyŭnaje ŭstrymańnie ad uvodu suchaputnych vojskaŭ moža prymusić Maskvu pierahledzieć ułasnyja «čyrvonyja linii» i paspryjać zaklučeńniu mirnaha pahadnieńnia.
Zamiest paŭnavartasnaha kantynhientu Brytanija i Francyja, jak miarkujecca, nakirujuć na zachad Ukrainy vajskovych instruktaraŭ. Heta dazvolić farmalna vykanać abaviazacielstvy pa prysutnaści na ŭkrainskaj terytoryi, ale biez pramoha ŭdziełu ŭ bajavych dziejańniach, u vypadku ich adnaŭleńnia, i biez raźmiaščeńnia pablizu linii frontu.
Taksama jeŭrapiejskija dziaržavy praciahvajuć abmiarkoŭvać mahčymaść abarony pavietranaj prastory Ukrainy z dapamohaj źniščalnikaŭ i sistem SPA — z metaj zabiaśpiečyć prykryćcio miratvorcaŭ, kali takija ŭsio ž buduć raźmieščanyja. Mahčyma, u budučaj misii prymie ŭdzieł i Turcyja — u roli marskoha partniora. Akramia taho, Brytanija i jaje sajuźniki pa-raniejšamu majuć namier akazvać Ukrainie vajskovuju padtrymku pastaŭkami ŭzbrajeńniaŭ, kab umacavać jaje abaronny patencyjał.
U ES, jak raskazała krynica, aścierahajucca, što maštabnaja prysutnaść vojskaŭ va Ukrainie padarvie mahčymaści Vialikabrytanii i inšych krain dla harantavańnia biaśpieki ŭschodniaha fłanhu NATA.
Łondan i Paryž u ramkach namahańniaŭ pa spynieńni ahniu razhladajuć ideju arhanizavać sustreču Donalda Trampa i Uładzimira Zialenskaha adrazu paśla pachavańnia Papy Rymskaha Franciška, pakolki taki krok moh by źnizić napružanaść i paskoryć pieramoŭny praces.
U Kijevie, pavodle danych The Times, taksama zachoŭvajecca skiepsis adnosna idei ŭvodu miratvorčych sił: ukrainskija čynoŭniki nie vierać, što Uładzimir Pucin pahodzicca na ich prysutnaść. Adna z krynic adznačyła:
«My praciahvajem adstojvać svaju pazicyju, ale spadziajemsia, što Maskva pierahledzić svaje «čyrvonyja linii». Ciapier pierad nami staić zadača — znajści takuju «zonu vysadki», dzie Ukraina nie budzie vymušanaja pierakročvać ułasnyja miežy dapuščalnaha».
Zachodni dypłamat taksama zaklikaŭ uzmacnić cisk na Rasiju i vykazaŭ zaniepakojenaść tym, što Tramp prajaŭlaje praźmiernuju łajalnaść da Kramla: «Jon stavicca da Rasiei ciaplej, čym da Ukrainy — i heta całkam nieprymalna».
Jeŭrasajuz papiaredziŭ ZŠA, što nie pryznaje Krym rasijskim
ZŠA prapanavali Kijevu pryznać Krym rasijskim i admovicca ad ustupleńnia ŭ NATA — WSJ
U svaim «mirnym płanie» ZŠA prapanujuć asłabić sankcyi suprać Rasii i pakinuć akupavanyja terytoryi Maskvie
Francyja i Vialikabrytanija adpraviać va Ukrainu sumiesnuju vajskovuju misiju
Kamientary