Čamu žonki futbolnych forvardaŭ atakavali adna adnu. U Anhlii zaviaršajecca «Sprava Vahaty Kryści»

Kolin Runi abvinavaciła Rebieku Vardzi ŭ tym, što taja brała infarmacyju ź jaje zakrytaha dla publiki instahram-akaŭnta i pradavała jaje tabłoidu The Sun. Vardzi padała na Runi pazoŭ ab paklopie, ale prajhrała. U vyniku jana ŭžo vypłaciła 1,8 miljona funtaŭ pa samoj spravie, a ciapier Viarchoŭny sud vyrašyŭ, što jana pavinna zapłacić jašče 1,4 miljona funtaŭ sudovych vydatkaŭ, piša Bi-bi-si.

Hetaja sprava prachodziła ŭ maksimalna adkrytym režymie, što zrabiła Kolin Runi i Rebieku Vardzi nie mienšymi zorkami, čym ich mužy. Abiedźvie ciapier pracujuć u miedyja i zajmajucca dabračynnaściu.

U presie ŭvieś praces nazvali «spravaj Vahaty Kryści» — ad naśmiešlivaj i navat ździeklivaj abrevijatury WAG (wives and girlfriends — žonki i siabroŭki). Tabłoidy daŭno tak prazvali niekatorych spadarožnic futbalistaŭ z-za ich davoli fryvolnaha ładu žyćcia: jany lubiać jeździć sa svaimi mužami na vialikija turniry ŭ Jeŭropu, dzie zakuplajucca adzieńniem u bucikach, a pa viečarach kampanijaj pjuć kaktejli ŭ darahich hatelach i časta traplajuć u skandały.

Hetaja historyja pačałasia ŭ 2019 hodzie, kali infarmacyja z zakrytaha instahram-akaŭnta Kolin Runi pačała źjaŭlacca ŭ tabłoidzie The Sun. Žonka lehiendarnaha anhlijskaha forvarda pačała ŭłasnaje rasśledavańnie. Jana adrazu ž vyklučyła ź liku padazravanych tych padpisčykaŭ, jakija naradzilisia abo žyvuć u Livierpuli, jak jana sama i jaje muž (sprava ŭ tym, što horad šmat hadoŭ bajkatavaŭ The Sun za praduziataje aśviatleńnie trahiedyi ŭ Chiłsbara, dzie ŭ 1989 hodzie ŭ ciskaninie zahinuli 97 fanataŭ futbolnaha kłuba «Livierpul»).

Kolin Runi źmianiła nałady svajho akaŭnta tak, što novyja pasty mahła ŭbačyć tolki Rebieka Vardzi, i pačała publikavać zaviedama iłžyvuju infarmacyju.

Tak čytačy The Sun daviedalisia, što ŭ domie siamji Runi zatapiła padvał, što Kolin Runi naviedała niejkaha čałavieka ŭ Mieksicy, jaki nibyta viedaje, jak jašče da začaćcia zrabić tak, kab naradziŭsia chłopčyk abo dziaŭčynka. Narešcie, tabłoid napisaŭ, što Kolin Runi voźmie ŭdzieł u tancavalnym šou, u jakim udzielničajuć prafiesijanały ŭ pary sa zorkami śvieckaha žyćcia. Ništo z hetaha nie było praŭdaj.

Tady Kolin Runi napisała ŭ tvitary (ciapier X), što abvinavačvaje ŭ «źlivach» Rebieku Vardzi. Taja ŭ adkaz padała ŭ Viarchoŭny sud Anhlii pazoŭ ab paklopie.

Sudovy praces pačaŭsia ŭ mai 2022 hoda. Apytanyja žurnalistami jurysty jašče tady adznačali, što padobnaja sprava ab paklopie, tym bolš adrazu ŭ vyšejšaj instancyi — heta nonsens. Zvyčajna takija pazovy ŭrehuloŭvajucca ŭ pryvatnym dasudovym paradku i ŭ maksimalna zakrytym režymie, u pieršuju čarhu, kab baki paźbiehli reputacyjnych strat.

Ale hety praces byŭ hučnym i nie raz śmiašyŭ žurnalistaŭ, što jaho aśviatlali, i publiku. Naprykład, abiedźvie hałoŭnyja ŭdzielnicy pastajanna pačynali svaje pakazańni sa słoŭ: «Kali ščyra…», čym u vyniku vyvieli ź siabie sudździu, jaki nahadaŭ, što jany dajuć pakazańni pad prysiahaj, i heta pavinna pa vyznačeńni aznačać, što jany praŭdzivyja.

Padčas dopytu Rebieki Vardzi vyśvietliłasia, što hałoŭnuju ŭliku, telefon ź pierapiskami, jana nibyta vypadkova patapiła ŭ Paŭnočnym mory, kali adpačyvała z mužam u Šatłandyi. A ahient Vardzi Kerałajn Uot, atrymalnica paviedamleńniaŭ i, pa ŭsioj bačnaści, pasiarednica (sud nie zmoh heta ŭstalavać dakładna) pamiž Vardzi i tabłoidam, skazała, što vypadkova vydaliła ich padčas niaŭdałaha reziervovaha kapijavańnia.

Advakaty Kolin Runi adkazali na heta spasyłkaj na precedent 1772 hoda, kali sud pastanaviŭ, što kali dokazy pa spravie źniščany naŭmysna, to mienavita jany pavinny stać hałoŭnymi pry vyniasieńni rašeńnia — navat kali jany prosta apisanyja vierbalna. Pavodle ich słoŭ, da sučasnych elektronnych pryład hety precedent taksama prymianialny.

Presa źviarnuła ŭvahu, što abiedźvie ŭdzielnicy pracesu pieratvaryli jaho ŭ pakaz mod, kožny raz źjaŭlajučysia na pasiadžeńniach u vopratcy ad hałoŭnych dyzajnieraŭ śvietu.

U sudzie ŭ jakaści śviedkaŭ vystupili i mužy, Uejn Runi i Džejmi Vardzi, što razam hulali za zbornuju Anhlii ŭ 2016 hodzie. Presie padałosia, što jany staviacca adzin da adnaho bolš družalubna, čym ich žonki. Naprykład, Rebieka Vardzi paraŭnała Kolin Runi z hołubam, pramoviŭšy: «Vy možacie skazać joj, što vy majecie racyju, a jana — nie, ale jana ŭsio roŭna nahadzić vam na hałavu».

U sudach Vialikabrytanii zabaroniena fatahrafavać, u zale možna pracavać tolki mastakam, jakija robiać skietčy. Troje ź ich, što pracavali ŭ adnym styli — Elizabiet Kuk, Džulija Kviencler i Pryscyła Koŭłman — stali asobnymi hierainiami hetaha pracesu — z-za ich svojeasablivaj maniery malunka, dzie hieroi byli mała padobnyja na siabie.

Tak, Uejn Runi atrymaŭ u sacsietkach i presie paraŭnańni ź viadomym svajoj paŭnatoj karalom Hienrycham VIII i prosta z bulbaj, a jaho žonka Kolin — z maci Normana Bejtsa z kultavaha filma Alfreda Chičkoka «Psicha». Rebieka Vardzi ŭdastoiłasia paraŭnańnia z Majkłam Džeksanam.

Asnoŭnaja častka suda zaviaršyłasia letam 2022 hoda. Sud paličyŭ pakazańni Kolin Runi značna bolš praŭdzivymi i nadziejnymi i prysudziŭ joj kampiensacyju ŭ pamiery 1,8 miljona funtaŭ. Rebieka Vardzi kazała, što vielmi zasmučanaja, ale abskardžvać rašeńnie nie budzie.

U hetyja dni sud vyrašaje, jaki z bakoŭ i u jakim abjomie apłacić sudovyja vydatki. Rašeńnie čakajecca na dniach, kali baki abhavorać, chto budzie pavinien reštu jašče nie abhavoranych vydatkaŭ, ale papiaredni vynik užo viadomy. Kala 90%, heta 1,4 miljona funtaŭ, pavinna budzie apłacić Rebieka Vardzi.

Taja nastojvała na sumie kala 100 tysiač i praciahvaje zmahacca litaralna za kožny funt. Naprykład, jana zapatrabavała vyklučyć z ahulnaj sumy paradku 230 funtaŭ, jakija advakaty Kolin Runi patracili na ježu ŭ restaranie i vadu ź mini-bara ŭ hateli. Advakaty adkazali na heta Rebiekie Vardzi, što jana «sama vinavataja ŭ svaim niaščaści» i joj varta zadumacca.

Rebieka Vardzi jašče ŭ 2023 hodzie zarehistravała nazvu «Vahata Kryści» ŭ jakaści tavarnaha znaka i płanuje vypuskać pad hetym brendam kaśmietyku, napoi, juvielirnyja vyraby i vopratku.

Žurnalist Bi-bi-si Poł Hlin, jaki aśviatlaŭ praces, pisaŭ, što heta napeŭna dapamoža joj apłacić častku vydatkaŭ.

• 0
• 0
• 0
• 0
• 0
• 0
• 0
• 0